ਸੌਖਾ ਨਹੀਂ ਹੁੰਦਾ

ਸੌਖਾ ਨਹੀਂ ਹੁੰਦਾ

ਕਹਿੰਦੇ ਨੇ
ਸਭ ਤੋਂ ਔਖਾ ਹੁੰਦਾ
ਪੁੱਤ ਦੀ ਅਰਥੀ ਚੁੱਕਣਾ
ਪਿਓ ਦੇ ਮੋਢਿਆਂ ਤੇ
ਸਾਰੀਆਂ
ਆਸਾਂ ਉਮੀਦਾਂ ਦਾ
ਸੁਆਹ ਹੋ ਜਾਣਾ
ਚਿਤਾ ਦੀ ਅਗਨ ਵਿੱਚ।
ਸੌਖਾ ਨਹੀਂ ਹੁੰਦਾ।
ਪੁੱਤ ਲਈ ਵੀ ਸੌਖਾ ਨਹੀਂ
ਪਿਤਾ ਦੇ ਜਨਾਜ਼ੇ ਨੂੰ
ਮੋਢਾ ਦੇਣਾ
ਜਿਸਦੀ ਉਂਗਲੀ ਫੜ ਕੇ
ਤੁਰਨਾ ਸਿੱਖਿਆ
ਜਿਸ ਦੇ ਸਿਰ ਤੇ
ਹਵਾ ‘ਚ ਉੱਡਣਾ ਸਿੱਖਿਆ
ਜੋ ਹੌਸਲਾ ਵੀ ਸੀ
ਬੁਨਿਆਦ ਵੀ
ਜਿਸ ਨੇ ਪੁੱਤਰ ਦੇ ਜਨਮ ਤੇ
ਵੰਡੇ ਸੀ ਲੱਡੂ
ਟੰਗੇ ਸੀ ਪੱਤੇ
ਦਹਿਲੀਜ਼ ਤੇ ਬੰਦਨਬਾਰ।
ਉਸ ਦੀ ਚਿਤਾ ਨੂੰ
ਅਗਨ ਦੇਣੀ
ਕਿੰਨੀ ਔਖੀ ਹੈ
ਇਹ ਪੁੱਤ ਹੀ ਜਾਣਦਾ ਹੈ

ਲੇਖਕ : ਹਰਪ੍ਰੀਤ ਕੌਰ ਸੰਧੂ