ਬਿਜਲੀ

ਘੜੀ ਮੁੜੀ ਹੀ ਬੰਦ ਪਏ, ਪੱਖਿਆਂ ਨੂੰ ਵਿੰਹਦੇ ਰਹਿੰਦੇ ਹਾਂ
ਘਰਾਂ ਦੇ ਅੰਦਰ ਜੀਅ ਘੁੱਟਦਾ, ਗਲੀਆਂ ਵਿੱਚ ਆ ਆ ਬਹਿੰਦੇ ਹਾਂ

ਨਹਾਉਣ ਤੋਂ ਬੈਠੇ ਰਹਿੰਦੇ ਹਾਂ, ਘੁੱਟ ਪਾਣੀ ਦੀ ਨਾ ਥਿਆਉਂਦੀ ਏ
ਸੱਚ ਪੁੱਛੋ ਤਾਂ ਸੱਜਣੋਂ ਅੱਜਕੱਲ੍ਹ, ਬਿਜਲੀ ਬੜਾ ਸਤਾਉਂਦੀ ਏ

ਥੋੜ੍ਹਾ ਚਿਰ ਤਾਂ ਕੱਢ ਜਾਂਦੇ, ਪਰ ਅੰਤ ਨੂੰ ਹਾਰਦੇ ਨੇ
ਮੰਤਰੀਆਂ ਦੇ ਹੂਟਰ ਵਾਂਗੂੰ, ਇਨਵਰਟਰ ਚੀਕਾਂ ਮਾਰਦੇ ਨੇ

ਫਿਰ ਕਿਹੜਾ ਪੱਖਾ ਬੰਦ ਕਰੀਏ, ਕੋਈ ਸਮਝ ਨਾ ਆਉਂਦੀ ਏ
ਸੱਚ ਪੁੱਛੋ ਤਾਂ ਸੱਜਣੋਂ ਅੱਜਕੱਲ੍ਹ, ਬਿਜਲੀ ਬੜਾ ਸਤਾਉਂਦੀ ਏ

ਛੋਟੇ ਛੋਟੇ ਘਰਾਂ ਦੇ ਅੰਦਰ, ਦਿਨੇ ਹਨੇਰਾ ਰਹਿੰਦਾ ਏ
ਜਿਉਂ ਬਿਨ ਕਾਵਾਂ ਤੋਂ ਅੱਜਕੱਲ੍ਹ ਬਈ ਖਾਲ਼ੀ ਬਨੇਰਾ ਰਹਿੰਦਾ ਏ

ਪਰ ਟੱਸ ਤੋਂ ਇਹ ਮੱਸ ਨਾ ਹੋਵੇ, ਆਪਣਾ ਆਪ ਵਿਖਾਉਂਦੀ ਏ
ਸੱਚ ਪੁੱਛੋ ਤਾਂ ਸੱਜਣੋਂ ਅੱਜਕੱਲ੍ਹ ਬਿਜਲੀ ਬੜਾ ਸਤਾਉਂਦੀ ਏ

ਓਹ ਆ ਗਈ ਓਏ ਓਹ ਆ ਗਈ ਓਏ, ਪੈਂਦੇ ਬੜੇ ਭੁਲੇਖੇ ਨੇ
ਜਿਹੜੇ ਏਸੀਆਂ ਦੇ ਵਿੱਚ ਰਹਿੰਦੇ ਸੀ, ਅੱਜ ਪੱਖੀਆਂ ਝਲਦੇ ਵੇਖੇ ਨੇ

ਲੀਡਰਾਂ ਦੇ ਲਾਰਿਆਂ ਵਾਂਗੂੰ, ਹੁਣ ਇਹ ਵੀ ਲਾਰੇ ਲਾਉਂਦੀ ਏ
ਸੱਚ ਪੁੱਛੋ ਤਾਂ ਸੱਜਣੋਂ ਅੱਜਕੱਲ੍ਹ, ਬਿਜਲੀ ਬੜਾ ਸਤਾਉਂਦੀ ਏ

ਲੇਖਕ?:?ਬੂਟਾ ਗੁਲਾਮੀ ਵਾਲਾ, ਸੰਪਰਕ: 94171-97395