ਕੋਬਲ ਹਿੱਲ ਕਮਿਊਨਿਟੀ ਪਾਰਕ ਵਿੱਚ ਨਵੇਂ ਬੈਂਡਸ਼ੈੱਲ ਦੀ ਉਸਾਰੀ ਦਾ ਕੰਮ ਸ਼ੁਰੂ

ਸਰੀ, (ਦਿਵਰੂਪ ਕੌਰ): ਕੋਬਲ ਹਿੱਲ ਖੇਤਰ ਦੇ ਸੰਗੀਤ ਪ੍ਰੇਮੀਆਂ ਅਤੇ ਸਥਾਨਕ ਨਿਵਾਸੀਆਂ ਲਈ ਇੱਕ ਬਹੁਤ ਹੀ ਖੁਸ਼ੀ ਵਾਲੀ ਖਬਰ ਹੈ। ਖਰਾਬ ਮੌਸਮ ਹੁਣ ਉਨ੍ਹਾਂ ਦੇ ਮਨੋਰੰਜਨ ਵਿੱਚ ਵਿਘਨ ਨਹੀਂ ਪਾ ਸਕੇਗਾ ਕਿਉਂਕਿ ਕਮਿਊਨਿਟੀ ਪਾਰਕ ਵਿੱਚ ਇੱਕ ਨਵੇਂ ਬੈਂਡਸ਼ੈੱਲ ਦੀ ਉਸਾਰੀ ਦਾ ਨੀਂਹ ਪੱਥਰ ਰੱਖ ਦਿੱਤਾ ਗਿਆ ਹੈ। ਸੋਮਵਾਰ ਦੀ ਇੱਕ ਸੁਹਾਵਣੀ ਸਵੇਰ ਨੂੰ ਕਾਉਚਨ ਵੈਲੀ ਰੀਜਨਲ ਡਿਸਟ੍ਰਿਕਟ, ਬਿਲਟ ਕੰਟਰੈਕਟਿੰਗ ਲਿਮਟਿਡ ਅਤੇ ਕੋਬਲ ਹਿੱਲ ਇਵੈਂਟਸ ਸੁਸਾਇਟੀ ਦੇ ਨੁਮਾਇੰਦਿਆਂ ਨੇ ਕੋਬਲਸਟੋਨ ਪਬ ਦੇ ਸਾਹਮਣੇ ਸਥਿਤ ਪਾਰਕ ਵਿੱਚ ਇਕੱਠੇ ਹੋ ਕੇ ਇਸ ਪ੍ਰੋਜੈਕਟ ਦੀ ਰਸਮੀ ਸ਼ੁਰੂਆਤ ਕੀਤੀ। ਇਹ ਕਦਮ ਸਾਲਾਨਾ ‘ਮਿਊਜ਼ਿਕ ਇਨ ਦਾ ਪਾਰਕ’ ਪ੍ਰੋਗਰਾਮ ਸ਼ੁਰੂ ਹੋਣ ਤੋਂ ਕੁਝ ਮਹੀਨੇ ਪਹਿਲਾਂ ਚੁੱਕਿਆ ਗਿਆ ਹੈ। ਕੋਬਲ ਹਿੱਲ ਦੇ ਡਾਇਰੈਕਟਰ ਮਾਈਕ ਵਿਲਸਨ ਨੇ ਇਸ ਮੌਕੇ ਆਪਣੀ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਇਸ ਸ਼ਾਨਦਾਰ ਭਾਈਚਾਰਕ ਪ੍ਰੋਜੈਕਟ ਨੂੰ ਜ਼ਮੀਨੀ ਪੱਧਰ ਉੱਤੇ ਸ਼ੁਰੂ ਹੁੰਦਾ ਦੇਖਣਾ ਇੱਕ ਬਹੁਤ ਹੀ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਪ੍ਰੋਜੈਕਟ ਮਿਊਜ਼ਿਕ ਇਨ ਦਾ ਪਾਰਕ ਦੀ ਲਗਾਤਾਰ ਵੱਧ ਰਹੀ ਲੋਕਪ੍ਰਿਅਤਾ ਦਾ ਹੀ ਨਤੀਜਾ ਹੈ ਜਿਸ ਵਿੱਚ ਸ਼ੁਰੂਆਤੀ ਦਿਨਾਂ ਦੇ 20-30 ਦਰਸ਼ਕਾਂ ਤੋਂ ਵੱਧ ਕੇ ਹੁਣ 800 ਦੇ ਕਰੀਬ ਲੋਕ ਸ਼ਾਮਲ ਹੋਣ ਲੱਗ ਪਏ ਹਨ।
ਸੀਵੀਆਰਡੀ ਬੋਰਡ ਦੀ ਚੇਅਰਪਰਸਨ ਕੇਟ ਸੇਗਲ ਨੇ ਇਸ ਨਵੇਂ ਬੈਂਡਸ਼ੈੱਲ ਨੂੰ ਇਲਾਕੇ ਲਈ ਇੱਕ ਸ਼ਾਨਦਾਰ ਤੋਹਫਾ ਕਰਾਰ ਦਿੱਤਾ ਹੈ। ਉਨ੍ਹਾਂ ਦੱਸਿਆ ਕਿ ਸੰਗੀਤ ਦੇ ਪ੍ਰੋਗਰਾਮ ਹਰ ਗਰਮੀਆਂ ਵਿੱਚ ਹਜ਼ਾਰਾਂ ਲੋਕਾਂ ਨੂੰ ਇਕੱਠੇ ਕਰਦੇ ਹਨ ਅਤੇ ਅਜਿਹੇ ਸਮਾਗਮ ਪੇਂਡੂ ਖੇਤਰਾਂ ਵਿੱਚ ਭਾਈਚਾਰਕ ਸਾਂਝ ਮਜ਼ਬੂਤ ਕਰਨ ਲਈ ਬਹੁਤ ਅਹਿਮ ਭੂਮਿਕਾ ਨਿਭਾਉਂਦੇ ਹਨ। ਉਨ੍ਹਾਂ ਭਰੋਸਾ ਜਤਾਇਆ ਕਿ ਇਸ ਮੰਚ ਦੇ ਬਣਨ ਨਾਲ ਇੱਥੇ ਸਾਰਾ ਸਾਲ ਪ੍ਰੋਗਰਾਮ ਕਰਵਾਏ ਜਾ ਸਕਣਗੇ ਅਤੇ ਸੰਗੀਤਕਾਰਾਂ ਦੇ ਸਾਜ਼ ਮੀਂਹ ਜਾਂ ਧੁੱਪ ਤੋਂ ਪੂਰੀ ਤਰ੍ਹਾਂ ਸੁਰੱਖਿਅਤ ਰਹਿਣਗੇ। ਇਹ ਪ੍ਰੋਜੈਕਟ ਪਿਛਲੇ ਚਾਰ ਸਾਲਾਂ ਤੋਂ ਵਿਚਾਰ ਅਧੀਨ ਸੀ ਅਤੇ ਇਸਦੀ ਉਸਾਰੀ ਪਾਰਕਸਵਿਲ ਦੀ ਇੱਕ ਨਾਮਵਰ ਕੰਪਨੀ ਬਿਲਟ ਕੰਟਰੈਕਟਿੰਗ ਲਿਮਟਿਡ ਵੱਲੋਂ ਸਥਾਨਕ ਡਗਲਸ ਫਿਰ ਦੀ ਲੱਕੜ ਨਾਲ ਕੀਤੀ ਜਾਵੇਗੀ। ਕੰਪਨੀ ਦੇ ਪ੍ਰੋਜੈਕਟ ਮੈਨੇਜਰ ਸਟੀਵ ਲਾਰੈਂਸ ਨੇ ਕਿਹਾ ਕਿ ਇਹ ਢਾਂਚਾ ਬਹੁਤ ਮਜ਼ਬੂਤ ਹੋਵੇਗਾ ਅਤੇ ਆਉਣ ਵਾਲੀਆਂ ਕਈ ਪੀੜ੍ਹੀਆਂ ਤੱਕ ਸਥਾਨਕ ਲੋਕਾਂ ਦੇ ਕੰਮ ਆਵੇਗਾ। ਇਸ ਥਾਂ ਦਾ ਇਤਿਹਾਸ ਵੀ ਕਾਫੀ ਦਿਲਚਸਪ ਹੈ। ਪਹਿਲਾਂ ਇਹ ਥਾਂ ਸੂਬਾਈ ਟਰਾਂਸਪੋਰਟ ਮੰਤਰਾਲੇ ਦਾ ਇੱਕ ਮੇਨਟੇਨੈਂਸ ਯਾਰਡ ਹੁੰਦੀ ਸੀ ਜਿਸ ਨੂੰ ਹੁਣ ਸੀਵੀਆਰਡੀ ਦੀ ਮਦਦ ਨਾਲ ਇੱਕ ਜੀਵੰਤ ਕਮਿਊਨਿਟੀ ਪਾਰਕ ਵਿੱਚ ਬਦਲ ਦਿੱਤਾ ਗਿਆ ਹੈ। ਡਾਇਰੈਕਟਰ ਵਿਲਸਨ ਨੇ ਦੱਸਿਆ ਕਿ ਇਸ ਪ੍ਰੋਜੈਕਟ ਲਈ ਫੰਡ ਇਕੱਠਾ ਕਰਨ ਵਿੱਚ ਸਥਾਨਕ ਕਾਰੋਬਾਰੀਆਂ ਅਤੇ ਆਮ ਲੋਕਾਂ ਨੇ ਬਹੁਤ ਵੱਡਾ ਯੋਗਦਾਨ ਪਾਇਆ ਹੈ। ਉਦਾਹਰਣ ਵਜੋਂ ਐਮਕਾਨ ਸਰਵਿਸਿਜ਼ ਨੇ ਬੁਨਿਆਦ ਪੁੱਟਣ ਲਈ ਮੁਫਤ ਮਸ਼ੀਨਰੀ ਦਿੱਤੀ। ਇਹ ਨਵਾਂ ਮੰਚ ਮਈ ਜਾਂ ਜੂਨ ਤੱਕ ਬਣ ਕੇ ਤਿਆਰ ਹੋਣ ਦੀ ਉਮੀਦ ਹੈ ਅਤੇ ਇਸਦਾ ਰਸਮੀ ਉਦਘਾਟਨ 9 ਜੁਲਾਈ ਨੂੰ ਕੀਤਾ ਜਾਵੇਗਾ। ਇਸ ਮੰਚ ਦਾ ਡਿਜ਼ਾਈਨ ਖੁੱਲ੍ਹਾ ਰੱਖਿਆ ਗਿਆ ਹੈ ਤਾਂ ਜੋ ਹਰ ਕੋਈ ਇਸਦੀ ਵਰਤੋਂ ਕਰ ਸਕੇ। ਇਹ ਨੇੜਲੇ ਸ਼ਹੀਦੀ ਸਮਾਰਕ ਦੀ ਸੁੰਦਰਤਾ ਵਿੱਚ ਵੀ ਵਾਧਾ ਕਰੇਗਾ ਜਿੱਥੇ ਹਰ ਸਾਲ ਰਿਮੈਂਬਰੈਂਸ ਡੇਅ ਉੱਤੇ ਵੱਡੀ ਗਿਣਤੀ ਵਿੱਚ ਲੋਕ ਸ਼ਰਧਾਂਜਲੀ ਦੇਣ ਪਹੁੰਚਦੇ ਹਨ। This report was written by Divroop Kaur as part of the Local Journalism Initiative.