ਫਰਵਰੀ ‘ਚ ਇੱਕ ਹਫ਼ਤੇ ਲਈ ਬੰਦ ਰਹੇਗਾ ਪੁਟੋਲੋ ਪੁਲ, ਸਰੀ-ਨਿਊ ਵੈਸਟਮਿੰਸਟਰ ਸੰਪਰਕ ਟੁੱਟੇਗਾ

ਸਰੀ, (ਦਿਵਰੂਪ ਕੌਰ): ਫਰਵਰੀ ਮਹੀਨੇ ਦੇ ਸ਼ੁਰੂ ਵਿੱਚ ਸਰੀ ਅਤੇ ਨਿਊ ਵੈਸਟਮਿੰਸਟਰ ਵਿਚਾਲੇ ਸਫਰ ਕਰਨ ਵਾਲੇ ਡਰਾਈਵਰਾਂ ਨੂੰ ਵੱਡੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਪਟੂਲੋ ਪੁਲ ਰਿਪਲੇਸਮੈਂਟ ਪ੍ਰੋਜੈਕਟ ਦੀ ਵੈੱਬਸਾਈਟ ‘ਤੇ ਜਾਰੀ ਕੀਤੀ ਗਈ ਜਾਣਕਾਰੀ ਮੁਤਾਬਕ, ਪੁਰਾਣੇ ਪਟੂਲੋ ਪੁਲ ਅਤੇ ਨਵੇਂ ਬਣ ਰਹੇ ‘ਸਟੈਲੋਵਾਸਮ’ (Stal̕əw̓asəm) ਪੁਲ ਨੂੰ ਲਗਭਗ ਇੱਕ ਹਫ਼ਤੇ ਲਈ ਪੂਰੀ ਤਰ੍ਹਾਂ ਬੰਦ ਰੱਖਿਆ ਜਾਵੇਗਾ। ਇਹ ਬੰਦ ਫਰਵਰੀ ਦੇ ਸ਼ੁਰੂਆਤੀ ਦਿਨਾਂ ਵਿੱਚ ਹੋਵੇਗਾ, ਹਾਲਾਂਕਿ ਇਸਦੀਆਂ ਪੱਕੀਆਂ ਤਰੀਕਾਂ ਦਾ ਐਲਾਨ ਹੋਣਾ ਅਜੇ ਬਾਕੀ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਕੰਮ ਮੌਸਮ ‘ਤੇ ਨਿਰਭਰ ਕਰੇਗਾ ਅਤੇ ਤਰੀਕਾਂ ਤੈਅ ਹੁੰਦੇ ਹੀ ਜਨਤਕ ਕਰ ਦਿੱਤੀਆਂ ਜਾਣਗੀਆਂ। ਇਸ ਇੱਕ ਹਫ਼ਤੇ ਦੌਰਾਨ ਫਰੇਜ਼ਰ ਦਰਿਆ ਦੇ ਇਸ ਹਿੱਸੇ ਤੋਂ ਕਿਸੇ ਵੀ ਵਾਹਨ ਨੂੰ ਲੰਘਣ ਦੀ ਇਜਾਜ਼ਤ ਨਹੀਂ ਹੋਵੇਗੀ।
ਇਸ ਪੂਰਨ ਬੰਦ ਦਾ ਮੁੱਖ ਕਾਰਨ ਨਵੇਂ ਪੁਲ ਨੂੰ ਸਰੀ ਅਤੇ ਨਿਊ ਵੈਸਟਮਿੰਸਟਰ ਵਾਲੇ ਪਾਸੇ ਦੀਆਂ ਮੌਜੂਦਾ ਸੜਕਾਂ ਨਾਲ ਜੋੜਨਾ ਹੈ। ਨਿਰਮਾਣ ਕਾਰਜ ਦੇ ਇਸ ਅਹਿਮ ਪੜਾਅ ਨੂੰ ਪੂਰਾ ਕਰਨ ਲਈ ਆਵਾਜਾਈ ਨੂੰ ਰੋਕਣਾ ਲਾਜ਼ਮੀ ਹੈ। ਪੁਲ ਬੰਦ ਹੋਣ ਕਾਰਨ ਰੋਜ਼ਾਨਾ ਆਉਣ-ਜਾਣ ਵਾਲੇ ਲੋਕਾਂ ਨੂੰ ਪੋਰਟ ਮਾਨ ਬ੍ਰਿਜ (Port Mann Bridge) ਅਤੇ ਐਲੈਕਸ ਫਰੇਜ਼ਰ ਬ੍ਰਿਜ (Alex Fraser Bridge) ਵਰਗੇ ਬਦਲਵੇਂ ਰਸਤੇ ਅਪਣਾਉਣੇ ਪੈਣਗੇ, ਜਿਸ ਕਾਰਨ ਇਨ੍ਹਾਂ ਪੁਲਾਂ ‘ਤੇ ਵੀ ਆਵਾਜਾਈ ਦਾ ਭਾਰੀ ਦਬਾਅ ਵਧਣ ਦੀ ਸੰਭਾਵਨਾ ਹੈ। ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੀ ਯਾਤਰਾ ਲਈ ਵਾਧੂ ਸਮਾਂ ਲੈ ਕੇ ਚੱਲਣ ਅਤੇ ਪਹਿਲਾਂ ਤੋਂ ਯੋਜਨਾ ਬਣਾਉਣ।
ਰਿਪੋਰਟ ਮੁਤਾਬਕ, ਇਸ ਬੰਦ ਤੋਂ ਬਾਅਦ ਫਰਵਰੀ ਦੇ ਅਖੀਰ ਤੱਕ ਨਵੇਂ ‘ਸਟੈਲੋਵਾਸਮ’ ਪੁਲ ਦੀਆਂ ਚਾਰੇ ਲੇਨਾਂ ਆਵਾਜਾਈ ਲਈ ਖੋਲ੍ਹ ਦਿੱਤੀਆਂ ਜਾਣਗੀਆਂ। ਇਸ ਵਿੱਚ ਨਿਊ ਵੈਸਟਮਿੰਸਟਰ ਵਾਲੇ ਪਾਸੇ ਨਵਾਂ ਰਾਇਲ ਐਵੇਨਿਊ ਆਨ-ਰੈਂਪ ਵੀ ਸ਼ਾਮਲ ਹੋਵੇਗਾ। ਜ਼ਿਕਰਯੋਗ ਹੈ ਕਿ 1.6 ਬਿਲੀਅਨ ਡਾਲਰ ਦੀ ਲਾਗਤ ਵਾਲੇ ਇਸ ਪ੍ਰੋਜੈਕਟ ਵਿੱਚ ਕਈ ਵਾਰ ਦੇਰੀ ਹੋ ਚੁੱਕੀ ਹੈ। ਬੀਤੀ 24 ਦਸੰਬਰ ਨੂੰ ਸਰਕਾਰ ਨੇ ਵਾਅਦੇ ਮੁਤਾਬਕ ਇੱਕ ਲੇਨ ਖੋਲ੍ਹ ਦਿੱਤੀ ਸੀ, ਪਰ ਪੂਰੀ ਤਰ੍ਹਾਂ ਚਾਲੂ ਹੋਣ ਲਈ ਅਜੇ ਹੋਰ ਕੰਮ ਬਾਕੀ ਹੈ। This report was written by Divroop Kaur as part of the Local Journalism Initiative.