ਬੀ.ਸੀ. ਵਿੱਚ ਪੱਕੇ ਤੌਰ ‘ਤੇ ਡੇਅ-ਲਾਈਟ ਸੇਵਿੰਗ ਟਾਈਮ ਲਾਗੂ ਹੋਣ ’ਤੇ ਬੱਚਿਆਂ ਦੀ ਸੁਰੱਖਿਆ ਨੂੰ ਲੈ ਕੇ ਕੌਂਸਲਰ ਨੇ ਜਤਾਈ ਚਿੰਤਾ

ਹਨੇਰੇ ਵਿੱਚ ਸਕੂਲ ਜਾਣਗੇ ਬੱਚੇ? : ਕੌਂਸਲਰ ਕਿੰਬਰਲੇ ਗੁਇਰੀ, ਸਰਕਾਰ ਨੂੰ ਵਿਸ਼ੇਸ਼ ਕਦਮ ਚੁੱਕਣ ਦੀ ਅਪੀਲ
ਸਰੀ, (ਿਦਵਰੂਪ ਕੌਰ): ਬ੍ਰਿਟਿਸ਼ ਕੋਲੰਬੀਆ ਵਿੱਚ ਹਾਲ ਹੀ ਵਿੱਚ ਬਦਲੇ ਗਏ ਸਮੇਂ ਦੇ ਨਿਯਮਾਂ ਨੂੰ ਲੈ ਕੇ ਲੈਂਗਫੋਰਡ ਸ਼ਹਿਰ ਦੀ ਇੱਕ ਕੌਂਸਲਰ ਨੇ ਗੰਭੀਰ ਚਿੰਤਾ ਪ੍ਰਗਟਾਈ ਹੈ । ਵੈਨਕੂਵਰ ਆਈਲੈਂਡ ਸਥਿਤ ਲੈਂਗਫੋਰਡ ਦੀ ਕੌਂਸਲਰ ਕਿੰਬਰਲੇ ਗੁਇਰੀ ਨੇ ਚੇਤਾਵਨੀ ਦਿੱਤੀ ਹੈ ਕਿ ਪੱਕੇ ਤੌਰ ‘ਤੇ ਡੇਅ-ਲਾਈਟ ਸੇਵਿੰਗ ਟਾਈਮ (DST) ਲਾਗੂ ਹੋਣ ਨਾਲ ਸਕੂਲੀ ਬੱਚਿਆਂ ਦੀ ਸੁਰੱਖਿਆ ਖ਼ਤਰੇ ਵਿੱਚ ਪੈ ਸਕਦੀ ਹੈ । ਜ਼ਿਕਰਯੋਗ ਹੈ ਕਿ ਬ੍ਰਿਟਿਸ਼ ਕੋਲੰਬੀਆ ਨੇ ਮਾਰਚ ਦੇ ਸ਼ੁਰੂ ਵਿੱਚ ਆਖਰੀ ਵਾਰ ਘੜੀਆਂ ਨੂੰ ਇੱਕ ਘੰਟਾ ਅੱਗੇ ਕਰਕੇ ਸਾਰਾ ਸਾਲ ਇਸੇ ਸਮੇਂ ਨੂੰ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ ਹੈ । ਹਾਲਾਂਕਿ ਇਸ ਫੈਸਲੇ ਦਾ ਮਕਸਦ ਲੋਕਾਂ ਨੂੰ ਵਾਰ-ਵਾਰ ਸਮਾਂ ਬਦਲਣ ਦੀ ਪਰੇਸ਼ਾਨੀ ਤੋਂ ਮੁਕਤ ਕਰਨਾ ਸੀ, ਪਰ ਕੌਂਸਲਰ ਗੁਇਰੀ ਦਾ ਮੰਨਣਾ ਹੈ ਕਿ ਇਸ ਨਾਲ ਸਰਦੀਆਂ ਦੇ ਮਹੀਨਿਆਂ ਵਿੱਚ ਸਵੇਰ ਦਾ ਸਮਾਂ ਕਾਫ਼ੀ ਹਨੇਰਾ ਰਹੇਗਾ, ਜਿਸ ਦਾ ਸਿੱਧਾ ਅਸਰ ਪੈਦਲ ਸਕੂਲ ਜਾਣ ਵਾਲੇ ਬੱਚਿਆਂ ‘ਤੇ ਪਵੇਗਾ ।
ਕੌਂਸਲਰ ਗੁਇਰੀ ਨੇ ਵਿਸ਼ੇਸ਼ ਤੌਰ ‘ਤੇ ਨਵੰਬਰ ਤੋਂ ਫਰਵਰੀ ਤੱਕ ਦੇ ਸਮੇਂ ਦਾ ਹਵਾਲਾ ਦਿੱਤਾ, ਜਦੋਂ ਬੱਚੇ ਸਵੇਰੇ 8 ਵਜੇ ਦੇ ਕਰੀਬ ਆਪਣੇ ਘਰਾਂ ਤੋਂ ਸਕੂਲ ਲਈ ਨਿਕਲਦੇ ਹਨ । ਨਵੀਂ ਵਿਵਸਥਾ ਅਨੁਸਾਰ ਉਸ ਸਮੇਂ ਬਾਹਰ ਪੂਰੀ ਤਰ੍ਹਾਂ ਹਨੇਰਾ ਹੋਵੇਗਾ, ਜੋ ਕਿ ਬੱਚਿਆਂ ਲਈ ਬਹੁਤ ਖ਼ਤਰਨਾਕ ਸਾਬਤ ਹੋ ਸਕਦਾ ਹੈ । ਗੁਇਰੀ ਨੇ ਕਿਹਾ ਕਿ ਸਾਨੂੰ ਉਨ੍ਹਾਂ ਬਰਸਾਤੀ ਦਿਨਾਂ ਬਾਰੇ ਸੋਚਣ ਦੀ ਲੋੜ ਹੈ ਜਦੋਂ ਗੱਡੀਆਂ ਦੇ ਸ਼ੀਸ਼ਿਆਂ ‘ਤੇ ਰੌਸ਼ਨੀ ਦਾ ਪ੍ਰਤੀਬਿੰਬ ਪੈਦਾ ਹੁੰਦਾ ਹੈ ਅਤੇ ਡਰਾਈਵਰਾਂ ਲਈ ਸੜਕ ‘ਤੇ ਚੱਲ ਰਹੇ ਪੈਦਲ ਯਾਤਰੀਆਂ ਨੂੰ ਦੇਖਣਾ ਬਹੁਤ ਮੁਸ਼ਕਲ ਹੋ ਜਾਂਦਾ ਹੈ । ਉਨ੍ਹਾਂ ਅਨੁਸਾਰ ਕਈ ਅਜਿਹੇ ਗੁਆਂਢੀ ਇਲਾਕੇ ਹਨ ਜਿੱਥੇ ਪੈਦਲ ਚੱਲਣ ਵਾਲਿਆਂ ਦੀ ਸੁਰੱਖਿਆ ਲਈ ਲੋੜੀਂਦਾ ਬੁਨਿਆਦੀ ਢਾਂਚਾ ਮੌਜੂਦ ਨਹੀਂ ਹੈ, ਅਜਿਹੀ ਹਾਲਤ ਵਿੱਚ ਹਨੇਰਾ ਹਾਦਸਿਆਂ ਦੇ ਖ਼ਤਰੇ ਨੂੰ ਕਈ ਗੁਣਾ ਵਧਾ ਸਕਦਾ ਹੈ।
ਇਸ ਮੁੱਦੇ ਨੂੰ ਪ੍ਰਸ਼ਾਸਨਿਕ ਪੱਧਰ ‘ਤੇ ਉਠਾਉਣ ਲਈ ਕੌਂਸਲਰ ਗੁਇਰੀ ਨੇ ਸੋਮਵਾਰ ਨੂੰ ਕੌਂਸਲ ਦੀ ਮੀਟਿੰਗ ਵਿੱਚ ਇੱਕ ਅਹਿਮ ਮਤਾ ਪੇਸ਼ ਕੀਤਾ । ਇਸ ਮਤੇ ਰਾਹੀਂ ਸਿਟੀ ਸਟਾਫ ਨੂੰ ਹਦਾਇਤ ਕੀਤੀ ਗਈ ਹੈ ਕਿ ਉਹ ਸਿੱਖਿਆ ਅਤੇ ਬਾਲ ਸੰਭਾਲ ਮੰਤਰੀ, ਆਵਾਜਾਈ ਅਤੇ ਟ੍ਰਾਂਜ਼ਿਟ ਮੰਤਰੀ ਅਤੇ ਪ੍ਰੀਮੀਅਰ ਦਫ਼ਤਰ ਨੂੰ ਇੱਕ ਰਸਮੀ ਪੱਤਰ ਲਿਖਣ । ਇਸ ਪੱਤਰ ਵਿੱਚ ਸਾਰਾ ਸਾਲ ਪੈਸੀਫਿਕ ਡੇਅ-ਲਾਈਟ ਟਾਈਮ ਲਾਗੂ ਰਹਿਣ ਕਾਰਨ ਬੱਚਿਆਂ ਦੀ ਸੁਰੱਖਿਆ ‘ਤੇ ਪੈਣ ਵਾਲੇ ਮਾੜੇ ਪ੍ਰਭਾਵਾਂ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਦਿੱਤੀ ਜਾਵੇਗੀ । ਇਸ ਤੋਂ ਇਲਾਵਾ, ਇਸ ਪੱਤਰ ਦੀ ਇੱਕ ਕਾਪੀ ਬ੍ਰਿਟਿਸ਼ ਕੋਲੰਬੀਆ ਦੀਆਂ ਸਾਰੀਆਂ ਸਥਾਨਕ ਸਰਕਾਰਾਂ ਨੂੰ ਵੀ ਭੇਜੀ ਜਾਵੇਗੀ ਤਾਂ ਜੋ ਇਸ ਸਾਂਝੀ ਚਿੰਤਾ ‘ਤੇ ਇਕਜੁੱਟ ਹੋ ਕੇ ਵਿਚਾਰ ਕੀਤਾ ਜਾ ਸਕੇ ।
ਕੌਂਸਲਰ ਗੁਇਰੀ ਨੇ ਸਰਕਾਰ ਨੂੰ ਸੁਰੱਖਿਆ ਵਧਾਉਣ ਲਈ ਕੁਝ ਵਿਹਾਰਕ ਸੁਝਾਅ ਵੀ ਦਿੱਤੇ ਹਨ । ਉਹ ਚਾਹੁੰਦੇ ਹਨ ਕਿ ਸੂਬਾ ਸਰਕਾਰ ‘ਐਕਟਿਵ ਟ੍ਰਾਂਸਪੋਰਟੇਸ਼ਨ ਇਨਫਰਾਸਟਰੱਕਚਰ ਗ੍ਰਾਂਟ’ ਪ੍ਰੋਗਰਾਮ ਨੂੰ ਮੁੜ ਖੋਲ੍ਹੇ ਤਾਂ ਜੋ ਸਕੂਲਾਂ ਦੇ ਨੇੜੇ ਪੈਦਲ ਚੱਲਣ ਵਾਲੇ ਰਸਤਿਆਂ ਨੂੰ ਬਿਹਤਰ ਬਣਾਇਆ ਜਾ ਸਕੇ । ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਵਿਦਿਆਰਥੀਆਂ ਨੂੰ ਉੱਚ-ਵਿਜ਼ੀਬਿਲਟੀ (high-res) ਵਾਲੀਆਂ ਵੈਸਟਾਂ ਅਤੇ ਚਮਕਦਾਰ ਵਸਤੂਆਂ ਵੰਡਣ ਦਾ ਇੱਕ ਵਿਸ਼ੇਸ਼ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਮੰਗ ਕੀਤੀ ਹੈ ਤਾਂ ਜੋ ਹਨੇਰੇ ਵਿੱਚ ਉਹ ਡਰਾਈਵਰਾਂ ਨੂੰ ਸਾਫ਼ ਨਜ਼ਰ ਆ ਸਕਣ । ਗੁਇਰੀ ਨੇ ‘ਸੁਸਾਇਟੀ ਫਾਰ ਚਿਲਡਰਨ ਐਂਡ ਯੂਥ ਆਫ ਬੀ.ਸੀ.’ ਦੇ ‘ਵਾਕਿੰਗ ਸਕੂਲ ਬੱਸ’ ਪ੍ਰੋਗਰਾਮ ਦੇ ਵਿਸਥਾਰ ‘ਤੇ ਵੀ ਜ਼ੋਰ ਦਿੱਤਾ, ਜਿਸ ਵਿੱਚ ਬੱਚੇ ਇੱਕ ਸਮੂਹ ਦੇ ਰੂਪ ਵਿੱਚ ਨਿਗਰਾਨੀ ਹੇਠ ਸਕੂਲ ਜਾਂਦੇ ਹਨ ।
ਦੂਜੇ ਪਾਸੇ ਬ੍ਰਿਟਿਸ਼ ਕੋਲੰਬੀਆ ਦੇ ਪ੍ਰੀਮੀਅਰ ਡੇਵਿਡ ਈਬੀ ਨੇ ਬੁੱਧਵਾਰ ਨੂੰ ਇਸ ਮਾਮਲੇ ‘ਤੇ ਪ੍ਰਤੀਕਿਰਿਆ ਦਿੱਤੀ । ਉਨ੍ਹਾਂ ਭਰੋਸਾ ਦਿਵਾਇਆ ਕਿ ਸੜਕਾਂ ‘ਤੇ ਟ੍ਰੈਫਿਕ ਸੁਰੱਖਿਆ ਨੂੰ ਵਧਾਇਆ ਜਾਵੇਗਾ ਅਤੇ ਸੂਬਾ ਸਰਕਾਰ ਇਸ ਗੱਲ ਦੀ ਲਗਾਤਾਰ ਨਿਗਰਾਨੀ ਕਰੇਗੀ ਕਿ ਸੁਰੱਖਿਆ ਨਿਯਮਾਂ ਦੀ ਪਾਲਣਾ ਸਹੀ ਢੰਗ ਨਾਲ ਹੋ ਰਹੀ ਹੈ । ਪ੍ਰੀਮੀਅਰ ਈਬੀ ਨੇ ਪੱਕੇ ਤੌਰ ‘ਤੇ ਡੇਅ-ਲਾਈਟ ਸੇਵਿੰਗ ਟਾਈਮ ਦਾ ਬਚਾਅ ਕਰਦਿਆਂ ਕਿਹਾ ਕਿ ਇਸ ਨਾਲ ਉਨ੍ਹਾਂ ਨਕਾਰਾਤਮਕ ਸਿਹਤ ਪ੍ਰਭਾਵਾਂ ਤੋਂ ਬਚਿਆ ਜਾ ਸਕੇਗਾ ਜੋ ਵਾਰ-ਵਾਰ ਘੜੀਆਂ ਬਦਲਣ ਨਾਲ ਪੈਦਾ ਹੁੰਦੇ ਸਨ । ਉਨ੍ਹਾਂ ਅਨੁਸਾਰ ਸਮਾਂ ਬਦਲਣ ਕਾਰਨ ਅਕਸਰ ਸੜਕ ਹਾਦਸਿਆਂ ਵਿੱਚ ਵਾਧਾ ਦੇਖਣ ਨੂੰ ਮਿਲਦਾ ਸੀ, ਜੋ ਹੁਣ ਰੁਕ ਜਾਵੇਗਾ । ਸਰਕਾਰ ਹੁਣ ਨਵੀਂ ਵਿਵਸਥਾ ਨੂੰ ਸਫਲ ਬਣਾਉਣ ਲਈ ਸੁਰੱਖਿਆ ਉਪਾਵਾਂ ‘ਤੇ ਆਪਣਾ ਧਿਆਨ ਕੇਂਦਰਿਤ ਕਰੇਗੀ । This report was written by Divroop Kaur as part of the Local Journalism Initiative.