ਸਰੀ, (ਦਿਵਰੂਪ ਕੌਰ): ਬ੍ਰਿਟੇਨ ਦੇ ਸ਼ਾਹੀ ਪਰਿਵਾਰ ਲਈ ਵੀਰਵਾਰ ਦਾ ਦਿਨ ਇੱਕ ਬਹੁਤ ਹੀ ਵੱਡੇ ਅਤੇ ਇਤਿਹਾਸਕ ਝਟਕੇ ਵਾਲਾ ਸਾਬਤ ਹੋਇਆ ਹੈ। ਸੈਕਸ ਅਪਰਾਧੀ ਵਜੋਂ ਸਜ਼ਾ ਯਾਫਤਾ ਜੈਫਰੀ ਐਪਸਟੀਨ ਨਾਲ ਸਬੰਧਾਂ ਕਾਰਨ ਆਪਣੇ ਸ਼ਾਹੀ ਖਿਤਾਬ ਗੁਆ ਚੁੱਕੇ ਸਾਬਕਾ ਪ੍ਰਿੰਸ ਐਂਡਰਿਊ ਮਾਊਂਟਬੈਟਨ ਵਿੰਡਸਰ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ ਹੈ। ਇਹ ਗ੍ਰਿਫਤਾਰੀ ਜਨਤਕ ਅਹੁਦੇ ਉੱਤੇ ਰਹਿੰਦਿਆਂ ਕਥਿਤ ਤੌਰ ਉੱਤੇ ਦੁਰਵਿਹਾਰ ਕਰਨ ਦੇ ਗੰਭੀਰ ਸ਼ੱਕ ਦੇ ਆਧਾਰ ਉੱਤੇ ਕੀਤੀ ਗਈ ਹੈ। ਭਾਵੇਂ ਕਿ ਐਂਡਰਿਊ ਲਗਾਤਾਰ ਐਪਸਟੀਨ ਨਾਲ ਆਪਣੀ ਦੋਸਤੀ ਦੇ ਸਬੰਧ ਵਿੱਚ ਕਿਸੇ ਵੀ ਤਰ੍ਹਾਂ ਦੇ ਗਲਤ ਕੰਮ ਤੋਂ ਇਨਕਾਰ ਕਰਦੇ ਆ ਰਹੇ ਹਨ ਪਰ ਮਰਹੂਮ ਫਾਈਨਾਂਸਰ ਨਾਲ ਉਹਨਾਂ ਦੇ ਸਬੰਧਾਂ ਨੇ ਇੱਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਸ਼ਾਹੀ ਪਰਿਵਾਰ ਨੂੰ ਮੁਸ਼ਕਲਾਂ ਵਿੱਚ ਪਾਇਆ ਹੋਇਆ ਹੈ। ਕਿਸੇ ਮੌਜੂਦਾ ਬਾਦਸ਼ਾਹ ਦੇ ਭਰਾ ਦੀ ਇਸ ਤਰ੍ਹਾਂ ਗ੍ਰਿਫਤਾਰੀ ਹੋਣਾ ਆਧੁਨਿਕ ਸਮੇਂ ਵਿੱਚ ਬਿਨਾਂ ਕਿਸੇ ਮਿਸਾਲ ਦੇ ਇੱਕ ਬਹੁਤ ਹੀ ਅਸਾਧਾਰਨ ਘਟਨਾਕ੍ਰਮ ਹੈ। ਇਸ ਵੱਡੀ ਕਾਰਵਾਈ ਨਾਲ ਬ੍ਰਿਟਿਸ਼ ਤਾਜ ਯਾਨੀ ਕਰਾਊਨ ਉੱਤੇ ਜਵਾਬਦੇਹੀ ਦਾ ਹੋਰ ਵੀ ਜ਼ਿਆਦਾ ਦਬਾਅ ਪੈਣਾ ਪੂਰੀ ਤਰ੍ਹਾਂ ਲਾਜ਼ਮੀ ਹੋ ਗਿਆ ਹੈ।
ਇਸ ਸਾਰੀ ਕਾਰਵਾਈ ਬਾਰੇ ਜਾਣਕਾਰੀ ਦਿੰਦਿਆਂ ਥੇਮਸ ਵੈਲੀ ਪੁਲਿਸ ਨੇ ਦੱਸਿਆ ਕਿ ਪੂਰਬੀ ਇੰਗਲੈਂਡ ਦੇ ਨਾਰਫੋਕ ਇਲਾਕੇ ਤੋਂ 60 ਦੇ ਦਹਾਕੇ ਵਾਲੀ ਉਮਰ ਦੇ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕਰਕੇ ਹਿਰਾਸਤ ਵਿੱਚ ਰੱਖਿਆ ਗਿਆ ਹੈ। ਲੰਡਨ ਦੇ ਪੱਛਮੀ ਖੇਤਰਾਂ ਦੀ ਨਿਗਰਾਨੀ ਕਰਨ ਵਾਲੀ ਇਸ ਪੁਲਿਸ ਫੋਰਸ ਨੇ ਬ੍ਰਿਟੇਨ ਦੀਆਂ ਮਿਆਰੀ ਕਾਨੂੰਨੀ ਪ੍ਰਕਿਰਿਆਵਾਂ ਦੀ ਪਾਲਣਾ ਕਰਦਿਆਂ ਸ਼ੱਕੀ ਵਿਅਕਤੀ ਦੀ ਪਛਾਣ ਜਨਤਕ ਨਹੀਂ ਕੀਤੀ ਹੈ। ਪਰ ਜਦੋਂ ਪੱਤਰਕਾਰਾਂ ਵੱਲੋਂ ਐਂਡਰਿਊ ਦੀ ਗ੍ਰਿਫਤਾਰੀ ਦੀ ਪੁਸ਼ਟੀ ਕਰਨ ਲਈ ਕਿਹਾ ਗਿਆ ਤਾਂ ਪੁਲਿਸ ਨੇ ਸਿੱਧਾ ਆਪਣੇ ਅਧਿਕਾਰਤ ਬਿਆਨ ਵੱਲ ਇਸ਼ਾਰਾ ਕਰ ਦਿੱਤਾ ਜਿਸ ਤੋਂ ਸਥਿਤੀ ਪੂਰੀ ਤਰ੍ਹਾਂ ਸਪੱਸ਼ਟ ਹੋ ਗਈ। ਪੁਲਿਸ ਨੇ ਇਸ ਤੋਂ ਪਹਿਲਾਂ ਦੱਸਿਆ ਸੀ ਕਿ ਉਹ ਉਹਨਾਂ ਰਿਪੋਰਟਾਂ ਦਾ ਬਾਰੀਕੀ ਨਾਲ ਮੁਲਾਂਕਣ ਕਰ ਰਹੇ ਹਨ ਜਿਨ੍ਹਾਂ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਮਾਊਂਟਬੈਟਨ ਵਿੰਡਸਰ ਨੇ 2010 ਵਿੱਚ ਐਪਸਟੀਨ ਨੂੰ ਕੁਝ ਬਹੁਤ ਹੀ ਖੁਫੀਆ ਵਪਾਰਕ ਰਿਪੋਰਟਾਂ ਭੇਜੀਆਂ ਸਨ। ਇਹ ਉਸ ਸਮੇਂ ਦੀ ਗੱਲ ਹੈ ਜਦੋਂ ਸਾਬਕਾ ਪ੍ਰਿੰਸ ਕੌਮਾਂਤਰੀ ਵਪਾਰ ਲਈ ਬ੍ਰਿਟੇਨ ਦੇ ਵਿਸ਼ੇਸ਼ ਦੂਤ ਵਜੋਂ ਆਪਣੀਆਂ ਸੇਵਾਵਾਂ ਨਿਭਾ ਰਹੇ ਸਨ। ਇਹ ਅਹਿਮ ਰਿਪੋਰਟਾਂ ਦੋਵਾਂ ਵਿਅਕਤੀਆਂ ਵਿਚਕਾਰ ਹੋਏ ਉਸ ਪੱਤਰ ਵਿਹਾਰ ਤੋਂ ਸਾਹਮਣੇ ਆਈਆਂ ਸਨ ਜੋ ਪਿਛਲੇ ਮਹੀਨੇ ਜਾਰੀ ਕੀਤੇ ਗਏ ਅਮਰੀਕੀ ਨਿਆਂ ਵਿਭਾਗ ਦੇ ਲੱਖਾਂ ਪੰਨਿਆਂ ਦੇ ਦਸਤਾਵੇਜ਼ਾਂ ਦਾ ਹਿੱਸਾ ਸਨ। ਅਸਿਸਟੈਂਟ ਚੀਫ ਕਾਂਸਟੇਬਲ ਓਲੀਵਰ ਰਾਈਟ ਨੇ ਆਪਣੇ ਬਿਆਨ ਵਿੱਚ ਸਪੱਸ਼ਟ ਕੀਤਾ ਕਿ ਇੱਕ ਡੂੰਘੇ ਮੁਲਾਂਕਣ ਤੋਂ ਬਾਅਦ ਅਸੀਂ ਹੁਣ ਜਨਤਕ ਅਹੁਦੇ ਉੱਤੇ ਦੁਰਵਿਹਾਰ ਦੇ ਇਸ ਗੰਭੀਰ ਦੋਸ਼ ਦੀ ਬਕਾਇਦਾ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਜਾਂਚ ਨੂੰ ਅੱਗੇ ਵਧਾਉਂਦਿਆਂ ਪੁਲਿਸ ਅਧਿਕਾਰੀਆਂ ਨੇ ਇਹ ਵੀ ਦੱਸਿਆ ਕਿ ਉਹ ਇਸ ਸਬੰਧ ਵਿੱਚ ਦੋ ਵੱਖ ਵੱਖ ਜਾਇਦਾਦਾਂ ਦੀ ਬਾਰੀਕੀ ਨਾਲ ਤਲਾਸ਼ੀ ਵੀ ਲੈ ਰਹੇ ਹਨ। ਇਹ ਅਹਿਮ ਗ੍ਰਿਫਤਾਰੀ ਉਸ ਸਮੇਂ ਅਮਲ ਵਿੱਚ ਆਈ ਜਦੋਂ ਇੰਟਰਨੈੱਟ ਉੱਤੇ ਕੁਝ ਅਜਿਹੀਆਂ ਤਸਵੀਰਾਂ ਵਾਇਰਲ ਹੋਣੀਆਂ ਸ਼ੁਰੂ ਹੋ ਗਈਆਂ ਸਨ ਜਿਨ੍ਹਾਂ ਵਿੱਚ ਨਾਰਫੋਕ ਦੇ ਸੈਂਡਰਿੰਘਮ ਅਸਟੇਟ ਵਿਖੇ ਐਂਡਰਿਊ ਦੇ ਘਰ ਵੁੱਡ ਫਾਰਮ ਦੇ ਬਾਹਰ ਪੁਲਿਸ ਦੀਆਂ ਬਿਨਾਂ ਮਾਰਕ ਵਾਲੀਆਂ ਗੱਡੀਆਂ ਖੜ੍ਹੀਆਂ ਦਿਖਾਈ ਦੇ ਰਹੀਆਂ ਸਨ ਅਤੇ ਸਾਦੇ ਕੱਪੜਿਆਂ ਵਿੱਚ ਪੁਲਿਸ ਅਧਿਕਾਰੀ ਇਕੱਠੇ ਹੋ ਰਹੇ ਸਨ। ਇਸ ਵੱਡੀ ਅਤੇ ਇਤਿਹਾਸਕ ਗ੍ਰਿਫਤਾਰੀ ਤੋਂ ਤੁਰੰਤ ਬਾਅਦ ਮੌਜੂਦਾ ਬਾਦਸ਼ਾਹ ਕਿੰਗ ਚਾਰਲਸ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ ਇਸ ਜਾਂਚ ਵਿੱਚ ਕਾਨੂੰਨ ਨੂੰ ਆਪਣਾ ਕੰਮ ਬਿਨਾਂ ਕਿਸੇ ਦਖਲਅੰਦਾਜ਼ੀ ਦੇ ਕਰਨਾ ਚਾਹੀਦਾ ਹੈ। ਇਸਦੇ ਨਾਲ ਹੀ ਉਹਨਾਂ ਨੇ ਬ੍ਰਿਟਿਸ਼ ਜਨਤਾ ਨੂੰ ਵੀ ਇਹ ਭਰੋਸਾ ਦਿਵਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਕਿ ਉਹ ਬਤੌਰ ਬਾਦਸ਼ਾਹ ਬਿਨਾਂ ਕਿਸੇ ਪ੍ਰਭਾਵ ਦੇ ਉਹਨਾਂ ਦੀ ਸੇਵਾ ਨਿਰੰਤਰ ਜਾਰੀ ਰੱਖਣਗੇ। ਪਿਛਲੇ ਹਫਤੇ ਬਕਿੰਘਮ ਪੈਲੇਸ ਵੱਲੋਂ ਇਹ ਬੇਮਿਸਾਲ ਐਲਾਨ ਵੀ ਕੀਤਾ ਗਿਆ ਸੀ ਕਿ ਉਹ ਐਪਸਟੀਨ ਨਾਲ ਐਂਡਰਿਊ ਦੇ ਸਬੰਧਾਂ ਦੀ ਪੁਲਿਸ ਜਾਂਚ ਦੀ ਸੂਰਤ ਵਿੱਚ ਪੂਰਾ ਸਹਿਯੋਗ ਦੇਣ ਲਈ ਤਿਆਰ ਹਨ।
ਵੀਰਵਾਰ ਨੂੰ ਜਿਨ੍ਹਾਂ ਦੋਸ਼ਾਂ ਦੀ ਪੁਲਿਸ ਵੱਲੋਂ ਜਾਂਚ ਕੀਤੀ ਜਾ ਰਹੀ ਹੈ ਉਹ ਵਰਜੀਨੀਆ ਗਿਫਰੇ ਵੱਲੋਂ ਲਗਾਏ ਗਏ ਦੋਸ਼ਾਂ ਤੋਂ ਬਿਲਕੁਲ ਵੱਖਰੇ ਹਨ।
ਵਰਜੀਨੀਆ ਨੇ ਦਾਅਵਾ ਕੀਤਾ ਸੀ ਕਿ 2001 ਵਿੱਚ ਜਦੋਂ ਉਹ ਸਿਰਫ 17 ਸਾਲਾਂ ਦੀ ਸੀ ਤਾਂ ਉਸਨੂੰ ਐਂਡਰਿਊ ਨਾਲ ਸਰੀਰਕ ਸਬੰਧ ਬਣਾਉਣ ਲਈ ਬ੍ਰਿਟੇਨ ਲਿਆਂਦਾ ਗਿਆ ਸੀ। ਇਸ ਪੀੜਤ ਲੜਕੀ ਨੇ ਪਿਛਲੇ ਸਾਲ ਖੁਦਕੁਸ਼ੀ ਕਰਕੇ ਆਪਣੀ ਜਾਨ ਦੇ ਦਿੱਤੀ ਸੀ। ਇਸ ਸਭ ਦੇ ਬਾਵਜੂਦ ਗਿਫਰੇ ਦੇ ਪਰਿਵਾਰ ਨੇ ਹੁਣ ਹੋਈ ਇਸ ਤਾਜ਼ਾ ਗ੍ਰਿਫਤਾਰੀ ਦੀ ਭਰਪੂਰ ਸ਼ਲਾਘਾ ਕੀਤੀ ਹੈ। ਪਰਿਵਾਰ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਅੱਜ ਇਸ ਖਬਰ ਨਾਲ ਸਾਡੇ ਟੁੱਟੇ ਹੋਏ ਦਿਲਾਂ ਨੂੰ ਥੋੜ੍ਹਾ ਸਕੂਨ ਮਿਲਿਆ ਹੈ ਕਿ ਕੋਈ ਵੀ ਕਾਨੂੰਨ ਤੋਂ ਉੱਪਰ ਨਹੀਂ ਹੈ ਭਾਵੇਂ ਉਹ ਸ਼ਾਹੀ ਪਰਿਵਾਰ ਦਾ ਮੈਂਬਰ ਹੀ ਕਿਉਂ ਨਾ ਹੋਵੇ। ਪਰਿਵਾਰ ਨੇ ਭਾਵੁਕ ਹੁੰਦਿਆਂ ਇਹ ਵੀ ਕਿਹਾ ਕਿ ਉਹ ਕਦੇ ਵੀ ਅਸਲੀ ਰਾਜਕੁਮਾਰ ਨਹੀਂ ਸੀ ਅਤੇ ਵਰਜੀਨੀਆ ਨੇ ਹਰ ਜਗ੍ਹਾ ਦੇ ਬਚੇ ਹੋਏ ਪੀੜਤਾਂ ਲਈ ਇਹ ਲੜਾਈ ਲੜੀ ਸੀ।
ਰੋਇਲ ਹੋਲੋਵੇ ਯੂਨੀਵਰਸਿਟੀ ਆਫ ਲੰਡਨ ਦੇ ਸ਼ਾਹੀ ਮਾਹਿਰ ਕਰੇਗ ਪ੍ਰੈਸਕੋਟ ਨੇ ਇਸ ਘਟਨਾ ਉੱਤੇ ਟਿੱਪਣੀ ਕਰਦਿਆਂ ਕਿਹਾ ਕਿ ਆਧੁਨਿਕ ਸਮੇਂ ਵਿੱਚ ਸ਼ਾਹੀ ਪਰਿਵਾਰ ਦੇ ਕਿਸੇ ਮੈਂਬਰ ਦਾ ਅਹੁਦੇ ਤੋਂ ਇਸ ਤਰ੍ਹਾਂ ਡਿੱਗਣਾ ਸਭ ਤੋਂ ਹੈਰਾਨੀਜਨਕ ਘਟਨਾ ਹੈ। ਇਤਿਹਾਸ ਦੇ ਪੰਨੇ ਫਰੋਲੀਏ ਤਾਂ ਆਖਰੀ ਵਾਰ ਕਿਸੇ ਸੀਨੀਅਰ ਸ਼ਾਹੀ ਮੈਂਬਰ ਨੂੰ ਲਗਭਗ 400 ਸਾਲ ਪਹਿਲਾਂ ਗ੍ਰਿਫਤਾਰ ਕੀਤਾ ਗਿਆ ਸੀ। ਇਹ ਘਟਨਾ ਕਿੰਗ ਚਾਰਲਸ ਪਹਿਲੇ ਦੇ ਸ਼ਾਸਨਕਾਲ ਦੌਰਾਨ ਵਾਪਰੀ ਸੀ ਜਦੋਂ ਤਾਜ ਅਤੇ ਸੰਸਦ ਵਿਚਕਾਰ ਸੱਤਾ ਦਾ ਸੰਘਰਸ਼ ਵੱਧ ਗਿਆ ਸੀ। ਜਦੋਂ ਰਾਜੇ ਨੇ 1642 ਵਿੱਚ ਹਾਊਸ ਆਫ ਕਾਮਨਜ਼ ਵਿੱਚ ਸੰਸਦ ਮੈਂਬਰਾਂ ਨੂੰ ਗ੍ਰਿਫਤਾਰ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ ਤਾਂ ਅੰਗਰੇਜ਼ੀ ਘਰੇਲੂ ਯੁੱਧ ਸ਼ੁਰੂ ਹੋ ਗਿਆ ਸੀ ਜੋ ਓਲੀਵਰ ਕ੍ਰੋਮਵੈਲ ਦੀਆਂ ਸੰਸਦੀ ਫੌਜਾਂ ਦੀ ਜਿੱਤ ਨਾਲ ਖਤਮ ਹੋਇਆ ਸੀ। ਉਸ ਵੇਲੇ ਚਾਰਲਸ ਨੂੰ ਗ੍ਰਿਫਤਾਰ ਕਰਕੇ ਦੇਸ਼ਧ੍ਰੋਹ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ ਅਤੇ 1649 ਵਿੱਚ ਉਸਦਾ ਸਿਰ ਕਲਮ ਕਰ ਦਿੱਤਾ ਗਿਆ ਸੀ। ਇਸ ਮੌਜੂਦਾ ਮਾਮਲੇ ਵਿੱਚ ਮਰਹੂਮ ਮਹਾਰਾਣੀ ਐਲਿਜ਼ਾਬੈਥ ਨੇ ਵੀ ਬੀਬੀਸੀ ਨਾਲ ਇੱਕ ਵਿਵਾਦਤ ਇੰਟਰਵਿਊ ਤੋਂ ਬਾਅਦ 2019 ਵਿੱਚ ਐਂਡਰਿਊ ਨੂੰ ਸ਼ਾਹੀ ਡਿਊਟੀਆਂ ਅਤੇ ਚੈਰਿਟੀ ਕੰਮ ਛੱਡਣ ਲਈ ਮਜਬੂਰ ਕਰ ਦਿੱਤਾ ਸੀ। ਪਿਛਲੇ ਸਾਲ ਇੱਕ ਕਿਤਾਬ ਵਿੱਚ ਹੋਰ ਵੇਰਵੇ ਸਾਹਮਣੇ ਆਉਣ ਤੋਂ ਬਾਅਦ ਮੌਜੂਦਾ ਬਾਦਸ਼ਾਹ ਨੇ ਉਸਤੋਂ ਪ੍ਰਿੰਸ ਅਖਵਾਉਣ ਦਾ ਅਧਿਕਾਰ ਖੋਹ ਲਿਆ ਸੀ ਅਤੇ ਉਸਨੂੰ ਘਰ ਬਦਲਣ ਦੇ ਸਖਤ ਆਦੇਸ਼ ਦਿੱਤੇ ਸਨ।
