ਮੂਲ ਨਿਵਾਸੀ ਉਮੀਦਵਾਰਾਂ ਨੂੰ ਮਿਊਂਸੀਪਲ ਚੋਣਾਂ ਲਈ ਦਿੱਤੀ ਜਾਵੇਗੀ ਵਿਸ਼ੇਸ਼ ਸਿਖਲਾਈ

ਸਰੀ, (ਦਿਵਰੂਪ ਕੌਰ): ਕੈਨੇਡਾ ਦੇ ਰਾਜਨੀਤਿਕ ਢਾਂਚੇ ਵਿੱਚ ਮੂਲ ਨਿਵਾਸੀਆਂ ਦੀ ਭਾਗੀਦਾਰੀ ਵਧਾਉਣ ਲਈ ਇੱਕ ਬਹੁਤ ਹੀ ਸ਼ਲਾਘਾਯੋਗ ਕਦਮ ਚੁੱਕਿਆ ਗਿਆ ਹੈ। ਫਸਟ ਨੇਸ਼ਨਜ਼ ਲੀਡਰਸ਼ਿਪ ਐਂਡ ਗਵਰਨੈਂਸ ਐਸੋਸੀਏਸ਼ਨ (ਐਫ.ਐਨ.ਐਲ.ਜੀ.ਏ.) ਨੇ ਕਲਾਈਮੇਟ ਕਾਕਸ ਨਾਮ ਦੀ ਸੰਸਥਾ ਨਾਲ ਇੱਕ ਅਹਿਮ ਭਾਈਵਾਲੀ ਕੀਤੀ ਹੈ। ਇਸ ਸਮਝੌਤੇ ਦਾ ਮੁੱਖ ਮਕਸਦ ਉਨ੍ਹਾਂ ਮੂਲ ਨਿਵਾਸੀ ਉਮੀਦਵਾਰਾਂ ਨੂੰ ਵਿਸ਼ੇਸ਼ ਸਿਖਲਾਈ ਪ੍ਰਦਾਨ ਕਰਨਾ ਹੈ ਜੋ ਮਿਊਂਸੀਪਲ ਚੋਣਾਂ ਵਿੱਚ ਹਿੱਸਾ ਲੈ ਰਹੇ ਹਨ ਅਤੇ ਜਲਵਾਯੂ ਨਾਲ ਸਬੰਧਤ ਨੀਤੀਆਂ ਦੀ ਵਕਾਲਤ ਕਰਨਾ ਚਾਹੁੰਦੇ ਹਨ।
ਇਸ ਭਾਈਵਾਲੀ ਤਹਿਤ ਚੋਣ ਮੈਦਾਨ ਵਿੱਚ ਉਤਰਨ ਵਾਲੇ ਫਸਟ ਨੇਸ਼ਨਜ਼ ਉਮੀਦਵਾਰਾਂ ਨੂੰ ਕਲਾਈਮੇਟ ਕਾਕਸ ਦੇ ਮੁਹਿੰਮ ਸਕੂਲ ਤੱਕ ਮੁਫਤ ਪਹੁੰਚ ਮਿਲੇਗੀ। ਇਹ ਪ੍ਰੋਗਰਾਮ ਚੋਣ ਮੁਹਿੰਮਾਂ ਚਲਾਉਣ ਵਾਲੇ ਤਜਰਬੇਕਾਰ ਮੈਨੇਜਰਾਂ ਵੱਲੋਂ ਤਿਆਰ ਕੀਤਾ ਗਿਆ ਹੈ ਜੋ ਉਮੀਦਵਾਰਾਂ ਨੂੰ ਚੋਣ ਜਿੱਤਣ ਦੇ ਗੁਰ ਸਿਖਾਏਗਾ। ਇਹ ਸਿਖਲਾਈ ਉਮੀਦਵਾਰਾਂ ਨੂੰ ਅਜਿਹੇ ਸਾਧਨ ਅਤੇ ਹੁਨਰ ਪ੍ਰਦਾਨ ਕਰੇਗੀ ਜਿਸ ਨਾਲ ਉਹ ਆਪਣੇ ਭਾਈਚਾਰੇ ਦੇ ਮੁੱਦਿਆਂ ਨੂੰ ਸਹੀ ਢੰਗ ਨਾਲ ਉਠਾ ਸਕਣਗੇ।
ਇਸ ਪ੍ਰੋਗਰਾਮ ਤਹਿਤ ਉਮੀਦਵਾਰਾਂ ਨੂੰ ਦੇਸ਼ ਭਰ ਵਿੱਚ ਚੋਣਾਂ ਜਿੱਤ ਚੁੱਕੇ ਮਾਹਰਾਂ ਦੇ ਨੈੱਟਵਰਕ ਨਾਲ ਵੀ ਜੋੜਿਆ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਐਫ.ਐਨ.ਐਲ.ਜੀ.ਏ. ਦੀ ਸਥਾਪਨਾ ਮਾਈਕਲ ਮੋਸੇਸ ਵੱਲੋਂ ਕੀਤੀ ਗਈ ਸੀ ਜੋ ਕਿ ਲੋਅਰ ਨਿਕੋਲਾ ਇੰਡੀਅਨ ਬੈਂਡ ਦੇ ਮੈਂਬਰ ਹਨ ਅਤੇ ਵਿਲੀਅਮਜ਼ ਲੇਕ ਦੇ ਸਿਟੀ ਕੌਂਸਲਰ ਵੀ ਹਨ। ਇਸ ਨਵੀਂ ਭਾਈਵਾਲੀ ਰਾਹੀਂ ਉਮੀਦਵਾਰਾਂ ਨੂੰ ਤਜਰਬੇਕਾਰ ਸਲਾਹਕਾਰਾਂ ਤੱਕ ਪਹੁੰਚ ਮਿਲੇਗੀ ਜਿਨ੍ਹਾਂ ਵਿੱਚ ਮੌਜੂਦਾ ਅਤੇ ਸਾਬਕਾ ਚੁਣੇ ਹੋਏ ਨੇਤਾ ਸ਼ਾਮਲ ਹੋਣਗੇ। ਇਸ ਤੋਂ ਇਲਾਵਾ ਮੂਲ ਨਿਵਾਸੀ ਅਤੇ ਗੈਰ-ਮੂਲ ਨਿਵਾਸੀ ਨੇਤਾ ਵੀ ਆਪਣਾ ਤਜਰਬਾ ਸਾਂਝਾ ਕਰਨਗੇ ਜਿਸ ਨਾਲ ਇੱਕ ਵੱਖਰੇ ਸੱਭਿਆਚਾਰਕ ਅਤੇ ਰਾਜਨੀਤਿਕ ਦ੍ਰਿਸ਼ਟੀਕੋਣ ਵਾਲਾ ਮਜ਼ਬੂਤ ਸਹਾਇਤਾ ਨੈੱਟਵਰਕ ਤਿਆਰ ਹੋਵੇਗਾ।
ਮਾਈਕਲ ਮੋਸੇਸ ਨੇ ਇਸ ਸਮਝੌਤੇ ਉੱਤੇ ਡੂੰਘੀ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਦੋਵਾਂ ਸੰਸਥਾਵਾਂ ਦੇ ਟੀਚੇ ਅਤੇ ਕਦਰਾਂ ਕੀਮਤਾਂ ਆਪਸ ਵਿੱਚ ਮੇਲ ਖਾਂਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਮੂਲ ਨਿਵਾਸੀ ਲੋਕ ਹਮੇਸ਼ਾ ਤੋਂ ਹੀ ਜਲਵਾਯੂ ਪਰਿਵਰਤਨ ਬਾਰੇ ਜਾਗਰੂਕ ਰਹੇ ਹਨ ਕਿਉਂਕਿ ਵਾਤਾਵਰਣ ਵਿੱਚ ਆਉਣ ਵਾਲਾ ਬਦਲਾਅ ਸਿੱਧੇ ਤੌਰ ਉੱਤੇ ਉਨ੍ਹਾਂ ਦੇ ਜੀਵਨ, ਪਾਣੀ ਅਤੇ ਜੰਗਲੀ ਜੀਵਾਂ ਨੂੰ ਪ੍ਰਭਾਵਿਤ ਕਰਦਾ ਹੈ।
ਕਲਾਈਮੇਟ ਕਾਕਸ ਦੀ ਕਾਰਜਕਾਰੀ ਨਿਰਦੇਸ਼ਕ ਜ਼ੋਏ ਗ੍ਰਾਮਸ ਨੇ ਇਸ ਮੌਕੇ ਬੋਲਦਿਆਂ ਕਿਹਾ ਕਿ ਭਾਈਚਾਰਿਆਂ ਨੂੰ ਸੁਰੱਖਿਅਤ, ਸਿਹਤਮੰਦ ਅਤੇ ਖੁਸ਼ਹਾਲ ਬਣਾਉਣ ਲਈ ਅਜਿਹੀਆਂ ਠੋਸ ਨੀਤੀਆਂ ਦੀ ਲੋੜ ਹੈ ਜੋ ਜਲਵਾਯੂ ਪਰਿਵਰਤਨ ਦੇ ਪ੍ਰਭਾਵਾਂ ਨੂੰ ਘਟਾ ਸਕਣ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਅੱਜ ਦੇ ਸਮੇਂ ਵਿੱਚ ਜਦੋਂ ਸਮਾਜ ਵਿੱਚ ਧਰੁਵੀਕਰਨ ਅਤੇ ਗਲਤ ਜਾਣਕਾਰੀ ਦਾ ਬੋਲਬਾਲਾ ਹੈ, ਤਾਂ ਸਾਨੂੰ ਸਥਾਨਕ ਲੋਕਤੰਤਰ ਨੂੰ ਹੋਰ ਮਜ਼ਬੂਤ ਕਰਨ ਦੀ ਲੋੜ ਹੈ।
ਇਸਦੇ ਲਈ ਆਪਸੀ ਸਬੰਧ ਬਣਾਉਣੇ, ਸਾਂਝੇ ਹੱਲ ਲੱਭਣੇ ਅਤੇ ਇੱਕ ਦੂਜੇ ਦੇ ਵਿਚਾਰਾਂ ਦਾ ਸਤਿਕਾਰ ਕਰਨਾ ਬਹੁਤ ਜ਼ਰੂਰੀ ਹੈ। ਇਹ ਦੋਵੇਂ ਸੰਸਥਾਵਾਂ ਹੁਣ ਮੌਜੂਦਾ ਚੁਣੇ ਹੋਏ ਸਥਾਨਕ ਨੇਤਾਵਾਂ ਨਾਲ ਮਿਲ ਕੇ ਕੰਮ ਕਰ ਰਹੀਆਂ ਹਨ ਤਾਂ ਜੋ ਮੂਲ ਨਿਵਾਸੀ ਅਤੇ ਗੈਰ-ਮੂਲ ਨਿਵਾਸੀ ਭਾਈਚਾਰਿਆਂ ਵਿਚਕਾਰ ਸਹਿਯੋਗ ਦੇ ਨਵੇਂ ਰਸਤੇ ਲੱਭੇ ਜਾ ਸਕਣ। ਇਹ ਪਹਿਲਕਦਮੀ ਨਾ ਸਿਰਫ਼ ਵਾਤਾਵਰਣ ਦੀ ਰੱਖਿਆ ਲਈ ਅਹਿਮ ਹੈ ਸਗੋਂ ਰਾਜਨੀਤੀ ਵਿੱਚ ਸਭਨਾਂ ਦੀ ਸ਼ਮੂਲੀਅਤ ਯਕੀਨੀ ਬਣਾਉਣ ਲਈ ਵੀ ਇੱਕ ਵੱਡਾ ਕਦਮ ਹੈ। This report was written by Divroop Kaur as part of the Local Journalism Initiative.