ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਨਗਣਨਾ ਦਾ ਬਿਗਲ, ਮਈ 2026 ’ਚ ਹੋਵੇਗੀ ਕੈਨੇਡਾ ਦੀ ਜਨਗਣਨਾ

ਸਰੀ, (ਦਿਵਰੂਪ ਕੌਰ): ਕੈਨੇਡਾ ਸਰਕਾਰ ਨੇ ਸਾਲ 2026 ਦੀ ਜਨਗਣਨਾ (Census of Population) ਦੀਆਂ ਤਿਆਰੀਆਂ ਨੂੰ ਅੰਤਿਮ ਰੂਪ ਦੇਣਾ ਸ਼ੁਰੂ ਕਰ ਦਿੱਤਾ ਹੈ, ਜੋ ਕਿ ਦੇਸ਼ ਦੇ ਭਵਿੱਖ ਦੀਆਂ ਨੀਤੀਆਂ ਅਤੇ ਸਰਕਾਰੀ ਸੇਵਾਵਾਂ ਨੂੰ ਤੈਅ ਕਰਨ ਵਿੱਚ ਸਭ ਤੋਂ ਅਹਿਮ ਭੂਮਿਕਾ ਨਿਭਾਏਗੀ। ਇਸ ਵਿਸ਼ਾਲ ਪ੍ਰਕਿਰਿਆ ਨੂੰ ਸਿਰੇ ਚਾੜ੍ਹਨ ਲਈ ਸਟੈਟਿਸਟਿਕਸ ਕੈਨੇਡਾ ਨੇ ਦੇਸ਼ ਭਰ ਵਿੱਚ ਲਗਭਗ 32,000 ਅਸਾਮੀਆਂ ਭਰਨ ਦਾ ਐਲਾਨ ਕੀਤਾ ਹੈ। ਇਹ ਜਨਗਣਨਾ ਮਈ 2026 ਵਿੱਚ ਸ਼ੁਰੂ ਹੋਵੇਗੀ, ਜੋ ਕੈਨੇਡਾ ਦੀ ਆਬਾਦੀ, ਭਾਸ਼ਾ, ਸਿੱਖਿਆ ਅਤੇ ਰੁਜ਼ਗਾਰ ਦਾ ਇੱਕ ਸਟੀਕ ਚਿੱਤਰ ਪੇਸ਼ ਕਰੇਗੀ। ਸਰਕਾਰ ਅਤੇ ਕਾਰੋਬਾਰੀ ਸੰਸਥਾਵਾਂ ਇਸ ਡੇਟਾ ਦੀ ਵਰਤੋਂ ਇਹ ਸਮਝਣ ਲਈ ਕਰਨਗੀਆਂ ਕਿ ਕੈਨੇਡੀਅਨ ਲੋਕ ਕਿਵੇਂ ਰਹਿ ਰਹੇ ਹਨ ਅਤੇ ਵੱਖ-ਵੱਖ ਖੇਤਰਾਂ ਵਿੱਚ ਕਿਹੜੀਆਂ ਸਹੂਲਤਾਂ ਦੀ ਲੋੜ ਹੈ।
ਕੈਨੇਡਾ ਵਿੱਚ ਹਰ ਪੰਜ ਸਾਲ ਬਾਅਦ ਜਨਗਣਨਾ ਕਰਵਾਈ ਜਾਂਦੀ ਹੈ, ਜੋ ਦੇਸ਼ ਦਾ ਇੱਕ ਵਿਆਪਕ ਅੰਕੜਾ ਪੋਰਟਰੇਟ ਤਿਆਰ ਕਰਦੀ ਹੈ। ਸਟੈਟਿਸਟਿਕਸ ਕੈਨੇਡਾ ਅਨੁਸਾਰ, ਇਹ ਜਾਣਕਾਰੀ ਸਿਰਫ਼ ਮੌਜੂਦਾ ਸਥਿਤੀ ਨੂੰ ਹੀ ਨਹੀਂ ਦਰਸਾਉਂਦੀ, ਸਗੋਂ ਇਹ ਵੀ ਦੱਸਦੀ ਹੈ ਕਿ ਸਮੇਂ ਦੇ ਨਾਲ ਆਬਾਦੀ ਵਿੱਚ ਕੀ ਬਦਲਾਅ ਆਏ ਹਨ। ਇਸ ਜਾਣਕਾਰੀ ਰਾਹੀਂ ਕਾਰੋਬਾਰੀ ਆਪਣੇ ਗਾਹਕਾਂ ਦੀਆਂ ਲੋੜਾਂ ਸਮਝ ਸਕਦੇ ਹਨ, ਸਰਕਾਰਾਂ ਨਵੇਂ ਭਾਈਚਾਰਕ ਪ੍ਰੋਗਰਾਮ ਉਲੀਕ ਸਕਦੀਆਂ ਹਨ ਅਤੇ ਸਥਾਨਕ ਪ੍ਰਸ਼ਾਸਨ ਸਕੂਲਾਂ ਦੀ ਸਹੀ ਜਗ੍ਹਾ ਅਤੇ ਬਿਹਤਰ ਆਵਾਜਾਈ ਪ੍ਰਬੰਧਾਂ ਬਾਰੇ ਫੈਸਲੇ ਲੈ ਸਕਦਾ ਹੈ। ਇਸ ਤੋਂ ਇਲਾਵਾ, ਜਨਗਣਨਾ ਦਾ ਡੇਟਾ ਚੋਣ ਹਲਕਿਆਂ ਦੀਆਂ ਹੱਦਬੰਦੀਆਂ ਤੈਅ ਕਰਨ ਅਤੇ ਸਵਦੇਸ਼ੀ ਲੋਕਾਂ, ਪ੍ਰਵਾਸੀਆਂ, ਬਜ਼ੁਰਗਾਂ ਅਤੇ ਇਕੱਲੇ ਮਾਪਿਆਂ ਲਈ ਵਿਸ਼ੇਸ਼ ਯੋਜਨਾਵਾਂ ਬਣਾਉਣ ਵਿੱਚ ਵੀ ਮਦਦਗਾਰ ਹੁੰਦਾ ਹੈ। ਇਸ ਵਾਰ ਵੀ 75 ਫ਼ੀਸਦੀ ਕੈਨੇਡੀਅਨਾਂ ਨੂੰ ‘ਸ਼ੋਰਟ-ਫਾਰਮ’ ਜਨਗਣਨਾ ਪ੍ਰਾਪਤ ਹੋਵੇਗੀ, ਜਿਸ ਵਿੱਚ ਜਨਮ ਮਿਤੀ, ਉਮਰ, ਲਿੰਗ, ਭਾਸ਼ਾ ਦਾ ਗਿਆਨ ਅਤੇ ਫੌਜੀ ਤਜਰਬੇ ਵਰਗੇ ਮੁੱਢਲੇ ਸਵਾਲ ਹੋਣਗੇ। ਬਾਕੀ 25 ਫ਼ੀਸਦੀ ਪਰਿਵਾਰਾਂ ਨੂੰ ‘ਲੌਂਗ-ਫਾਰਮ’ ਜਨਗਣਨਾ ਭਰਨੀ ਹੋਵੇਗੀ, ਜਿਸ ਵਿੱਚ ਸਿੱਖਿਆ, ਰੁਜ਼ਗਾਰ, ਆਮਦਨ, ਨਸਲੀ ਪਿਛੋਕੜ ਅਤੇ ਰੋਜ਼ਾਨਾ ਦੀਆਂ ਗਤੀਵਿਧੀਆਂ ਬਾਰੇ ਵਿਸਤ੍ਰਿਤ ਜਾਣਕਾਰੀ ਮੰਗੀ ਜਾਵੇਗੀ। ਇਸ ਕਾਰਜ ਲਈ ਸਟੈਟਿਸਟਿਕਸ ਕੈਨੇਡਾ ਨੂੰ ਮਾਰਚ ਤੋਂ ਜੁਲਾਈ 2026 ਤੱਕ 32,000 ਕਰਮਚਾਰੀਆਂ ਦੀ ਲੋੜ ਹੈ। ਇਸ ਵਿੱਚ ਗਣਨਾਕਾਰ (Enumerators) ਲਈ $25.87 ਪ੍ਰਤੀ ਘੰਟਾ ਅਤੇ ਕਰੂ ਲੀਡਰਾਂ ਲਈ $31.32 ਪ੍ਰਤੀ ਘੰਟਾ ਦੀ ਤਨਖਾਹ ਨਿਰਧਾਰਤ ਕੀਤੀ ਗਈ ਹੈ, ਜਿਸ ਨਾਲ ਹੋਰ ਅਧਿਕਾਰਤ ਖਰਚੇ ਵੀ ਦਿੱਤੇ ਜਾਣਗੇ।
ਨੌਕਰੀ ਲਈ ਬਿਨੈਕਾਰਾਂ ਦਾ ਬਾਲਗ ਹੋਣਾ (ਸੂਬੇ ਦੇ ਨਿਯਮਾਂ ਅਨੁਸਾਰ), ਕੈਨੇਡਾ ਦਾ ਵਾਸੀ ਹੋਣਾ ਅਤੇ ਕੈਨੇਡੀਅਨ ਨਾਗਰਿਕ ਜਾਂ ਪੱਕੇ ਨਿਵਾਸੀ (PR) ਹੋਣਾ ਲਾਜ਼ਮੀ ਹੈ। ਵਰਕ ਪਰਮਿਟ ਵਾਲੇ ਉਮੀਦਵਾਰ ਵੀ ਅਪਲਾਈ ਕਰ ਸਕਦੇ ਹਨ। ਇਹ ਭਰਤੀ ਮੁਹਿੰਮ ਅਜਿਹੇ ਸਮੇਂ ਆਈ ਹੈ ਜਦੋਂ ਕੈਨੇਡਾ ਦੀ ਆਰਥਿਕ ਵਿਕਾਸ ਦਰ ਨੂੰ ਲੈ ਕੇ ਚਿੰਤਾਵਾਂ ਜਤਾਈਆਂ ਜਾ ਰਹੀਆਂ ਹਨ। ਭਾਵੇਂ ਨਵੰਬਰ 2025 ਵਿੱਚ ਬੇਰੁਜ਼ਗਾਰੀ ਦੀ ਦਰ ਵਿੱਚ ਗਿਰਾਵਟ ਆਈ ਸੀ, ਪਰ ਡੈਲੋਇਟ ਵਰਗੀਆਂ ਸੰਸਥਾਵਾਂ ਨੇ ਵਪਾਰਕ ਜੰਗ ਅਤੇ ਟੈਰਿਫਾਂ ਕਾਰਨ 2026 ਵਿੱਚ ਆਰਥਿਕ ਸੁਸਤੀ ਦੀ ਭਵਿੱਖਬਾਣੀ ਕੀਤੀ ਹੈ। ਅਜਿਹੇ ਵਿੱਚ ਇਹ ਨੌਕਰੀਆਂ ਕੈਨੇਡੀਅਨਾਂ ਲਈ ਵਿੱਤੀ ਸਹਾਰਾ ਬਣ ਸਕਦੀਆਂ ਹਨ। ਜਨਗਣਨਾ ਲਈ ਜ਼ਿਆਦਾਤਰ ਲੋਕ ਆਨਲਾਈਨ ਹਿੱਸਾ ਲੈ ਸਕਣਗੇ, ਪਰ ਗਣਨਾਕਾਰਾਂ ਨੂੰ ਉਨ੍ਹਾਂ ਘਰਾਂ ਵਿੱਚ ਜਾਣਾ ਪਵੇਗਾ ਜਿੱਥੋਂ ਜਾਣਕਾਰੀ ਨਹੀਂ ਮਿਲਦੀ। ਅਧਿਕਾਰੀਆਂ ਨੇ ਅਪੀਲ ਕੀਤੀ ਹੈ ਕਿ ਲੋਕ ਇਸ ਰਾਸ਼ਟਰੀ ਮਹੱਤਤਾ ਵਾਲੇ ਕੰਮ ਵਿੱਚ ਪੂਰਾ ਸਹਿਯੋਗ ਦੇਣ।