ਐਮ.ਪੀ. ਤਾਮਾਰਾ ਜੈਨਸਨ ਵੱਲੋਂ ਬਿੱਲ C-218: ਮਾਨਸਿਕ ਬਿਮਾਰੀ ਲਈ ਇੱਛੁਕ ਮੌਤ ’ਤੇ ਪੱਕੀ ਰੋਕ ਲਗਾਉਣ ਦੀ ਮੰਗ

ਸਰੀ, (ਦਿਵਰੂਪ ਕੌਰ): ਕਲੋਵਰਡੇਲ-ਲੈਂਗਲੀ ਸਿਟੀ ਤੋਂ ਸੰਸਦ ਮੈਂਬਰ ਤਾਮਾਰਾ ਜੈਨਸਨ ਨੇ ਸਹਾਇਤਾ ਪ੍ਰਾਪਤ ਮੌਤ (MAiD) ਦੇ ਪ੍ਰਸਤਾਵਿਤ ਵਿਸਤਾਰ ਨੂੰ ਲੈ ਕੇ ਸੰਸਦੀ ਕਮੇਟੀ ਸਾਹਮਣੇ ਪੇਸ਼ ਹੋਈਆਂ ਗਵਾਹੀਆਂ ਦੇ ਅਧਾਰ ‘ਤੇ ਗੰਭੀਰ ਸਵਾਲ ਉਠਾਏ ਹਨ। ਫੈਡਰਲ ਸਰਕਾਰ 17 ਮਾਰਚ 2027 ਤੋਂ ਉਨ੍ਹਾਂ ਲੋਕਾਂ ਨੂੰ ਵੀ ਇਸ ਸਹੂਲਤ ਦੇ ਘੇਰੇ ਵਿੱਚ ਲਿਆਉਣ ਦੀ ਯੋਜਨਾ ਬਣਾ ਰਹੀ ਹੈ ਜੋ ਸਿਰਫ ਮਾਨਸਿਕ ਬਿਮਾਰੀ ਤੋਂ ਪੀੜਤ ਹਨ। ਜੈਨਸਨ ਨੇ 4 ਮਈ ਨੂੰ ਜਾਰੀ ਕੀਤੇ ਇੱਕ ਪ੍ਰੈਸ ਬਿਆਨ ਵਿੱਚ ਕਿਹਾ ਕਿ ਆਤਮ ਹੱਤਿਆ ਰੋਕੂ ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਹ ਕਦਮ ਮਦਦ ਅਤੇ ਨੁਕਸਾਨ ਦੇ ਵਿਚਕਾਰਲੀ ਲਕੀਰ ਨੂੰ ਧੁੰਦਲਾ ਕਰ ਸਕਦਾ ਹੈ। ਮੌਜੂਦਾ ਨਿਯਮਾਂ ਅਨੁਸਾਰ ਸਿਰਫ ਮਾਨਸਿਕ ਬਿਮਾਰੀ ਨਾਲ ਜੂਝ ਰਹੇ ਲੋਕ ਇਸ ਸਹੂਲਤ ਲਈ ਯੋਗ ਨਹੀਂ ਹਨ।
ਸੰਸਦੀ ਕਮੇਟੀ ਦੀ ਤਾਜ਼ਾ ਮੀਟਿੰਗ ਵਿੱਚ ਸਾਹਮਣੇ ਆਏ ਤੱਥਾਂ ਨੇ ਸੁਰੱਖਿਆ ਸਬੰਧੀ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਕੈਨੇਡਾ ਦੀ ਰਾਸ਼ਟਰੀ ਸੰਕਟ ਹੈਲਪਲਾਈਨ 9-8-8 ਦੀ ਮੁੱਖ ਮੈਡੀਕਲ ਅਫਸਰ ਡਾ. ਐਲੀਸਨ ਕ੍ਰਾਫੋਰਡ ਨੇ ਕਮੇਟੀ ਨੂੰ ਦੱਸਿਆ ਕਿ ਲਗਭਗ 7% ਲੋਕ ਜੋ ਇਸ ਸੇਵਾ ਦੀ ਵਰਤੋਂ ਕਰ ਰਹੇ ਹਨ, ਉਹ ਸਹਾਇਤਾ ਪ੍ਰਾਪਤ ਮੌਤ ਬਾਰੇ ਪੁੱਛਗਿੱਛ ਕਰਦੇ ਹਨ। ਹੈਰਾਨੀਜਨਕ ਤੌਰ ‘ਤੇ ਇਨ੍ਹਾਂ ਵਿੱਚੋਂ 74% ਲੋਕਾਂ ਨੇ ਪਿਛਲੇ ਦੋ ਦਿਨਾਂ ਦੌਰਾਨ ਆਤਮ ਹੱਤਿਆ ਬਾਰੇ ਸੋਚਿਆ ਸੀ। ਡਾ. ਕ੍ਰਾਫੋਰਡ ਅਨੁਸਾਰ ਅਜੇ ਤੱਕ ਅਜਿਹਾ ਕੋਈ ਭਰੋਸੇਮੰਦ ਕਲੀਨਿਕਲ ਤਰੀਕਾ ਮੌਜੂਦ ਨਹੀਂ ਹੈ ਜੋ ਆਤਮ ਹੱਤਿਆ ਦੇ ਇਰਾਦੇ ਅਤੇ ਮੌਤ ਦੀ ਤਰਕਸੰਗਤ ਇੱਛਾ ਵਿਚਕਾਰ ਸਪੱਸ਼ਟ ਫਰਕ ਕਰ ਸਕੇ।
ਤਾਮਾਰਾ ਜੈਨਸਨ ਨੇ ਇਸ ਸਥਿਤੀ ਨੂੰ ਬੇਹੱਦ ਵਿਰੋਧਾਭਾਸੀ ਦੱਸਿਆ ਹੈ। ਉਨ੍ਹਾਂ ਅਨੁਸਾਰ ਇੱਕ ਪਾਸੇ ਸਰਕਾਰ ਲੋਕਾਂ ਨੂੰ 9-8-8 ‘ਤੇ ਕਾਲ ਕਰਕੇ ਮਦਦ ਲੈਣ ਅਤੇ ਜੀਵਨ ਦੀ ਉਮੀਦ ਰੱਖਣ ਲਈ ਕਹਿੰਦੀ ਹੈ, ਪਰ ਦੂਜੇ ਪਾਸੇ ਉਨ੍ਹਾਂ ਹੀ ਲੋਕਾਂ ਨੂੰ ਸਰਕਾਰੀ ਤੌਰ ‘ਤੇ ਮੌਤ ਦੇਣ ਦੀ ਤਿਆਰੀ ਕਰ ਰਹੀ ਹੈ। ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਮਾਨਸਿਕ ਦੁੱਖਾਂ ਲਈ ਸਹਾਇਤਾ ਪ੍ਰਾਪਤ ਮੌਤ ਨੂੰ ਆਮ ਬਣਾਉਣ ਨਾਲ ਜਨਤਕ ਸਿਹਤ ‘ਤੇ ਬੁਰੇ ਪ੍ਰਭਾਵ ਪੈ ਸਕਦੇ ਹਨ। ਇਸ ਨਾਲ ਕਮਜ਼ੋਰ ਵਰਗਾਂ ਵਿੱਚ ਇੱਕ ਕਿਸਮ ਦਾ ‘ਕੰਟੇਜਨ ਇਫੈਕਟ’ ਪੈਦਾ ਹੋਣ ਦਾ ਖਤਰਾ ਹੈ, ਜਿੱਥੇ ਮੌਤ ਨੂੰ ਮਾਨਸਿਕ ਪੀੜਾ ਦਾ ਸਵੀਕਾਰਯੋਗ ਹੱਲ ਮੰਨਿਆ ਜਾਣ ਲੱਗਦਾ ਹੈ।