ਬ੍ਰਿਟਿਸ਼ ਕੋਲੰਬੀਆ ਵਿੱਚ ਨਫ਼ਰਤੀ ਅਪਰਾਧਾਂ ਨੂੰ ਰੋਕਣ ਲਈ ਸਰਕਾਰ ਵੱਲੋਂ 2,42,000 ਡਾਲਰ ਦੀ ਗ੍ਰਾਂਟ ਜਾਰੀ

ਸਰੀ, (ਦਿਵਰੂਪ ਕੌਰ): ਬ੍ਰਿਟਿਸ਼ ਕੋਲੰਬੀਆ ਵਿੱਚ ਧਾਰਮਿਕ ਸਥਾਨਾਂ ਅਤੇ ਹੋਰ ਕਮਿਊਨਿਟੀ ਸੈਂਟਰਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਸੂਬਾ ਸਰਕਾਰ ਵੱਲੋਂ ਇੱਕ ਬਹੁਤ ਹੀ ਸ਼ਲਾਘਾਯੋਗ ਕਦਮ ਚੁੱਕਿਆ ਗਿਆ ਹੈ। ਨਫ਼ਰਤੀ ਅਪਰਾਧਾਂ ਨੂੰ ਰੋਕਣ ਅਤੇ ਜਾਇਦਾਦ ਦੇ ਨੁਕਸਾਨ ਨਾਲ ਨਜਿੱਠਣ ਲਈ ਵੱਖ-ਵੱਖ ਸੰਸਥਾਵਾਂ ਨੂੰ 2,42,000 ਡਾਲਰ ਦੀ ਐਂਟੀ-ਹੇਟ ਗ੍ਰਾਂਟ ਦਿੱਤੀ ਜਾ ਰਹੀ ਹੈ। ਪਬਲਿਕ ਸੇਫਟੀ ਅਤੇ ਸਾਲਿਸਟਰ ਜਨਰਲ ਮੰਤਰੀ ਨੀਨਾ ਕ੍ਰੀਗਰ ਨੇ ਸੋਮਵਾਰ ਨੂੰ ਇਸ ਪਹਿਲਕਦਮੀ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਇੱਕ ਖੁਸ਼ਹਾਲ ਸੂਬਾ ਉਹੀ ਹੁੰਦਾ ਹੈ ਜਿੱਥੇ ਹਰ ਵਿਅਕਤੀ ਸੁਰੱਖਿਅਤ ਅਤੇ ਸਹਿਯੋਗੀ ਮਹਿਸੂਸ ਕਰੇ, ਖਾਸ ਕਰਕੇ ਉਨ੍ਹਾਂ ਥਾਵਾਂ ਤੇ ਜੋ ਸੱਭਿਆਚਾਰਕ ਵਿਭਿੰਨਤਾ ਅਤੇ ਪਛਾਣ ਦਾ ਜਸ਼ਨ ਮਨਾਉਂਦੀਆਂ ਹਨ। ਉਨ੍ਹਾਂ ਨੇ ਚਿੰਤਾ ਪ੍ਰਗਟਾਈ ਕਿ ਬੀਸੀ ਅਤੇ ਪੂਰੇ ਕੈਨੇਡਾ ਵਿੱਚ ਇਹੂਦੀ ਵਿਰੋਧੀ ਭਾਵਨਾਵਾਂ, ਇਸਲਾਮੋਫੋਬੀਆ ਅਤੇ ਨਫ਼ਰਤ ਦੇ ਹੋਰ ਰੂਪ ਵੱਧ ਰਹੇ ਹਨ, ਇਸ ਲਈ ਇਹ ਬਹੁਤ ਜ਼ਰੂਰੀ ਹੈ ਕਿ ਲੋਕ ਸਿਨੇਗੋਗਸ, ਮਸਜਿਦਾਂ ਅਤੇ ਹੋਰ ਸਾਂਝੀਆਂ ਥਾਵਾਂ ਤੇ ਆਪਣੇ ਆਪ ਨੂੰ ਪੂਰੀ ਤਰ੍ਹਾਂ ਸੁਰੱਖਿਅਤ ਮਹਿਸੂਸ ਕਰਨ।
ਇਹ ਗ੍ਰਾਂਟ ਸਿਵਲ ਫੋਰਫਿਚਰ ਗ੍ਰਾਂਟ ਪ੍ਰੋਗਰਾਮ ਦੇ ਐਂਟੀ-ਹੇਟ ਸਟ੍ਰੀਮ ਤਹਿਤ ਮੁਹੱਈਆ ਕਰਵਾਈ ਜਾ ਰਹੀ ਹੈ ਜਿਸ ਵਿੱਚ ਯੋਗ ਧਾਰਮਿਕ ਸਥਾਨ, ਸੱਭਿਆਚਾਰਕ ਕਮਿਊਨਿਟੀ ਸੈਂਟਰ ਅਤੇ 2SLGBTQIA+ ਵਰਗੇ ਹੋਰ ਜੋਖਮ ਵਾਲੇ ਸਮੂਹ ਸ਼ਾਮਲ ਹਨ। ਇਸ ਸਾਲ 20 ਵੱਖ-ਵੱਖ ਸੰਸਥਾਵਾਂ ਨੂੰ ਸੁਰੱਖਿਆ ਉਪਾਵਾਂ ਲਈ 24 ਗ੍ਰਾਂਟਾਂ ਦਿੱਤੀਆਂ ਜਾ ਰਹੀਆਂ ਹਨ। ਇਨ੍ਹਾਂ ਫੰਡਾਂ ਦੀ ਵਰਤੋਂ ਉੱਨਤ ਸੁਰੱਖਿਆ ਉਪਕਰਣ ਲਗਾਉਣ, ਕੰਧਾਂ ਤੋਂ ਗ੍ਰੈਫਿਟੀ ਹਟਾਉਣ ਅਤੇ ਨੁਕਸਾਨੀ ਗਈ ਜਾਇਦਾਦ ਦੀ ਮੁਰੰਮਤ ਕਰਨ ਲਈ ਕੀਤੀ ਜਾਵੇਗੀ। ਇਹ ਗ੍ਰਾਂਟਾਂ ਸੂਬਾਈ ਸਰਕਾਰ ਦੇ ਨਫ਼ਰਤ ਅਧਾਰਤ ਅਪਰਾਧਾਂ ਨੂੰ ਰੋਕਣ ਅਤੇ ਬ੍ਰਿਟਿਸ਼ ਕੋਲੰਬੀਆ ਨੂੰ ਸਾਰਿਆਂ ਲਈ ਇੱਕ ਸੁਰੱਖਿਅਤ ਸਥਾਨ ਬਣਾਉਣ ਦੇ ਲਗਾਤਾਰ ਯਤਨਾਂ ਦਾ ਹੀ ਹਿੱਸਾ ਹਨ। ਸਿਵਲ ਫੋਰਫਿਚਰ ਆਫਿਸ ਦੀ ਸਥਾਪਨਾ 2006 ਵਿੱਚ ਕੀਤੀ ਗਈ ਸੀ ਜਿਸਦਾ ਉਦੇਸ਼ ਗੈਰ-ਕਾਨੂੰਨੀ ਗਤੀਵਿਧੀਆਂ ਰਾਹੀਂ ਕਮਾਏ ਗਏ ਪੈਸੇ ਨੂੰ ਜ਼ਬਤ ਕਰਕੇ ਉਸਨੂੰ ਕਮਿਊਨਿਟੀ ਦੀ ਸੁਰੱਖਿਆ ਵਾਲੇ ਪ੍ਰੋਗਰਾਮਾਂ ਵਿੱਚ ਲਗਾਉਣਾ ਹੈ। ਅਣਦੱਸੀ ਦੌਲਤ ਦੇ ਆਦੇਸ਼ਾਂ ਵਰਗੇ ਨਵੇਂ ਕਾਨੂੰਨਾਂ ਨਾਲ ਅਪਰਾਧਿਕ ਸੰਗਠਨਾਂ ਦੇ ਮੁਨਾਫੇ ਤੇ ਸਿੱਧੀ ਸੱਟ ਮਾਰੀ ਜਾ ਰਹੀ ਹੈ।
ਇਸ ਫੰਡਿੰਗ ਦਾ ਸਰੀ ਸ਼ਹਿਰ ਨੂੰ ਵੀ ਬਹੁਤ ਲਾਭ ਹੋਵੇਗਾ। ਸਰੀ ਸਿਟੀ ਸੈਂਟਰ ਤੋਂ ਵਿਧਾਇਕ ਆਮਨਾ ਸ਼ਾਹ ਨੇ ਕਿਹਾ ਕਿ ਉਨ੍ਹਾਂ ਨੂੰ ਮਾਣ ਹੈ ਕਿ ਇਹ ਫੰਡ ਸਰੀ ਵਿੱਚ ਨੌਜਵਾਨਾਂ ਅਤੇ ਪਰਿਵਾਰਾਂ ਦੀ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਵਾਲੇ ਪ੍ਰੋਗਰਾਮਾਂ ਦਾ ਸਮਰਥਨ ਕਰ ਰਹੇ ਹਨ। ਸਰੀ ਵਿੱਚ ਸੈਂਟਰ ਫਾਰ ਚਾਈਲਡ ਡਿਵੈਲਪਮੈਂਟ ਆਫ ਦਿ ਲੋਅਰ ਮੇਨਲੈਂਡ ਦੇ ਸੋਫੀਜ਼ ਪਲੇਸ ਚਾਈਲਡ ਐਂਡ ਯੂਥ ਐਡਵੋਕੇਸੀ ਸੈਂਟਰ ਲਈ ਸੇਵਾਵਾਂ ਦੇਣ ਵਾਸਤੇ 2,00,000 ਡਾਲਰ ਮਨਜ਼ੂਰ ਕੀਤੇ ਗਏ ਹਨ। ਇਸੇ ਤਰ੍ਹਾਂ ਬੀਸੀ ਲਾਇਨਜ਼ ਫੁੱਟਬਾਲ ਲਿਮਟਿਡ ਪਾਰਟਨਰਸ਼ਿਪ ਦੇ ਲਾਇਨਜ਼ ਪ੍ਰਾਈਡ ਪ੍ਰੋਜੈਕਟ ਨੂੰ 75,000 ਡਾਲਰ ਦਿੱਤੇ ਗਏ ਹਨ ਜੋ 13 ਤੋਂ 16 ਸਾਲ ਦੇ ਜੋਖਮ ਵਾਲੇ ਨੌਜਵਾਨਾਂ ਨੂੰ ਫਲੈਗ ਫੁੱਟਬਾਲ ਰਾਹੀਂ ਸਹੀ ਰਸਤੇ ਤੇ ਲਿਆਉਣ ਅਤੇ ਗੈਂਗ ਕਲਚਰ ਤੋਂ ਦੂਰ ਰੱਖਣ ਲਈ ਕੰਮ ਕਰੇਗਾ। ਸਰੀ ਵੂਮੈਨਜ਼ ਸੈਂਟਰ ਦੀ ਇੰਟਰਵਿਊ ਰੂਮ ਤਕਨਾਲੋਜੀ ਨੂੰ ਬਿਹਤਰ ਬਣਾਉਣ ਲਈ ਵੀ 43,843 ਡਾਲਰ ਦੀ ਰਾਸ਼ੀ ਦਿੱਤੀ ਗਈ ਹੈ। ਕੁੱਲ ਮਿਲਾ ਕੇ ਬੀਸੀ ਨਿਊ ਡੈਮੋਕ੍ਰੇਟ ਸਰਕਾਰ ਇਸ ਪ੍ਰੋਗਰਾਮ ਰਾਹੀਂ ਪੂਰੇ ਸੂਬੇ ਵਿੱਚ 173 ਕਮਿਊਨਿਟੀ ਪ੍ਰੋਜੈਕਟਾਂ ਲਈ 8.23 ਮਿਲੀਅਨ ਡਾਲਰ ਪ੍ਰਦਾਨ ਕਰ ਰਹੀ ਹੈ। This report was written by Divroop Kaur as part of the Local Journalism Initiative.