ਸਾਲ 2027 ਵਿੱਚ ਗਲੋਬਲ ਤਾਪਮਾਨ ਨਵੇਂ ਪੱਧਰ ’ਤੇ ਪਹੁੰਚਣ ਦੀ ਸੰਭਾਵਨਾ : ਮੌਸਮ ਵਿਭਾਗ

ਸਰੀ, (ਦਿਵਰੂਪ ਕੌਰ): ਵਿਸ਼ਵ ਭਰ ਦੇ ਮੌਸਮ ਵਿਗਿਆਨੀਆਂ ਨੇ ਅਧਿਕਾਰਤ ਤੌਰ ‘ਤੇ ‘ਅਲ ਨੀਨੋ’ ਮੌਸਮ ਪ੍ਰਣਾਲੀ ਦੇ ਬਣਨ ਦਾ ਐਲਾਨ ਕੀਤਾ ਹੈ, ਜਿਸ ਕਾਰਨ ਯੂਕੋਨ ਅਤੇ ਕੈਨੇਡਾ ਦੇ ਪੱਛਮੀ ਸੂਬਿਆਂ ਵਿੱਚ ਅਗਲੇ ਸੀਜ਼ਨ ਦੌਰਾਨ ਆਮ ਨਾਲੋਂ ਵੱਧ ਨਿੱਘੀ ਸਰਦੀ ਪੈਣ ਦੀ ਸੰਭਾਵਨਾ ਹੈ। ਅਮਰੀਕਾ ਦੇ ਨੈਸ਼ਨਲ ਓਸ਼ੀਅਨਿਕ ਐਂਡ ਐਟਮੌਸਫੇਰਿਕ ਐਡਮਿਨਿਸਟ੍ਰੇਸ਼ਨ (NOAA) ਨੇ ਵਿਸ਼ਵ ਮੌਸਮ ਵਿਗਿਆਨ ਸੰਗਠਨ ਅਤੇ ਸੰਯੁਕਤ ਰਾਸ਼ਟਰ ਦੀਆਂ ਭਵਿੱਖਬਾਣੀਆਂ ਤੋਂ ਬਾਅਦ 11 ਜੂਨ ਨੂੰ ਅਲ ਨੀਨੋ ਸਾਲ ਦਾ ਐਲਾਨ ਕੀਤਾ ਹੈ। ਇਨਵਾਇਰਨਮੈਂਟ ਐਂਡ ਕਲਾਈਮੇਟ ਚੇਂਜ ਕੈਨੇਡਾ (ECCC) ਦੇ ਖੋਜ ਵਿਗਿਆਨੀ ਬਿੱਲ ਮੇਰੀਫੀਲਡ ਨੇ ਦੱਸਿਆ ਕਿ ਅਲ ਨੀਨੋ ਅਤੇ ਇਸ ਦੀ ਸਹਿਯੋਗੀ ਪ੍ਰਣਾਲੀ ਲਾ ਨੀਨਾ ਦਾ ਨਿਰਮਾਣ ਪ੍ਰਸ਼ਾਂਤ ਮਹਾਂਸਾਗਰ ਵਿੱਚ ਭੂ-ਮੱਧ ਰੇਖਾ ਦੇ ਨੇੜੇ ਪਾਣੀ ਦੇ ਕੁਦਰਤੀ ਤੌਰ ‘ਤੇ ਗਰਮ ਅਤੇ ਠੰਢਾ ਹੋਣ ਦੇ ਚੱਕਰ ਕਾਰਨ ਹੁੰਦਾ ਹੈ। ਮਹਾਂਸਾਗਰ ਦੀ ਸਤ੍ਹਾ ਦਾ ਤਾਪਮਾਨ ਵਧਣ ਨਾਲ ਹਵਾ ਦੇ ਪੈਟਰਨ ਵਿੱਚ ਤਬਦੀਲੀ ਆਉਂਦੀ ਹੈ, ਜੋ ਪੋਲਰ ਜੈੱਟ ਸਟ੍ਰੀਮ ਦੇ ਰਸਤੇ ਨੂੰ ਬਦਲ ਦਿੰਦੀ ਹੈ। ਆਮ ਤੌਰ ‘ਤੇ ਇਹ ਜੈੱਟ ਸਟ੍ਰੀਮ ਪੱਛਮੀ ਕੈਨੇਡਾ ਵਿੱਚ ਠੰਢੀ ਹਵਾ ਲਿਆਉਂਦੀ ਹੈ, ਪਰ ਅਲ ਨੀਨੋ ਕਾਰਨ ਇਹ ਉੱਤਰ ਵੱਲ ਖਿਸਕ ਜਾਂਦੀ ਹੈ, ਜਿਸ ਨਾਲ ਸਰਦੀਆਂ ਵਿੱਚ ਤਾਪਮਾਨ ਹਲਕਾ ਰਹਿੰਦਾ ਹੈ। ਵਿਗਿਆਨੀਆਂ ਅਨੁਸਾਰ ਇਸ ਵਾਰ ਦਾ ਅਲ ਨੀਨੋ ਬਹੁਤ ਮਜ਼ਬੂਤ ਹੈ, ਜਿਸ ਕਾਰਨ ਇਸ ਨੂੰ ‘ਸੁਪਰ ਅਲ ਨੀਨੋ’ ਵੀ ਕਿਹਾ ਜਾ ਰਿਹਾ ਹੈ। ਅਜਿਹਾ ਉਦੋਂ ਹੁੰਦਾ ਹੈ ਜਦੋਂ ਟ੍ਰੌਪੀਕਲ ਪ੍ਰਸ਼ਾਂਤ ਮਹਾਂਸਾਗਰ ਦਾ ਪਾਣੀ ਇੱਕ ਨਿਸ਼ਚਿਤ ਸਮੇਂ ਲਈ ਆਮ ਨਾਲੋਂ 2 ਡਿਗਰੀ ਸੈਲਸੀਅਸ ਵੱਧ ਗਰਮ ਹੋ ਜਾਂਦਾ ਹੈ। ਇਸ ਤੋਂ ਪਹਿਲਾਂ 2015 ਵਿੱਚ ਅਜਿਹਾ ਦੇਖਿਆ ਗਿਆ ਸੀ, ਜਦੋਂ ਸਰਦੀਆਂ ਵਿੱਚ ਤਾਪਮਾਨ ਆਮ ਨਾਲੋਂ 6 ਤੋਂ 8 ਡਿਗਰੀ ਵੱਧ ਰਿਹਾ ਸੀ। ਹਾਲਾਂਕਿ 2025-2026 ਦੀ ਭਾਰੀ ਠੰਢ ਤੋਂ ਬਾਅਦ ਯੂਕੋਨ ਦੇ ਲੋਕਾਂ ਲਈ ਇਹ ਰਾਹਤ ਵਾਲੀ ਖ਼ਬਰ ਹੋ ਸਕਦੀ ਹੈ, ਪਰ ਇਸ ਦਾ ਅਸਰ ਲੰਬੇ ਸਮੇਂ ਤੱਕ ਰਹੇਗਾ। ਇਸ ਕਾਰਨ ਮੀਂਹ ਘੱਟ ਪੈਣ, ਬਸੰਤ ਜਲਦੀ ਆਉਣ ਅਤੇ ਗਰਮੀਆਂ ਬਹੁਤ ਤੇਜ਼ ਹੋਣ ਦੀ ਸੰਭਾਵਨਾ ਹੈ। ਵਿਗਿਆਨੀਆਂ ਮੁਤਾਬਕ ਸਮੁੰਦਰ ਦੀ ਇਹ ਗਰਮੀ ਵਾਯੂਮੰਡਲ ਵਿੱਚ ਫੈਲਣ ਕਾਰਨ ਪੂਰੀ ਦੁਨੀਆ ਵਿੱਚ 2027 ਸਭ ਤੋਂ ਗਰਮ ਸਾਲ ਸਾਬਤ ਹੋ ਸਕਦਾ ਹੈ। This report was written by Divroop Kaur as part of the Local Journalism Initiative.