ਲੋਅਰ ਮੇਨਲੈਂਡ ਵਿੱਚ ਕਰੋੜਾਂ ਦੇ ਨਸ਼ੇ ਅਤੇ ਹਥਿਆਰ ਬਰਾਮਦ

ਸਰੀ, (ਦਿਵਰੂਪ ਕੌਰ): ਬ੍ਰਿਟਿਸ਼ ਕੋਲੰਬੀਆ ਦੀ ਕੰਬਾਈਨਡ ਫੋਰਸਿਜ਼ ਸਪੈਸ਼ਲ ਐਨਫੋਰਸਮੈਂਟ ਯੂਨਿਟ (CFSEU-BC) ਵੱਲੋਂ ਕੀਤੀ ਗਈ ਇੱਕ ਵਿਸ਼ੇਸ਼ ਜਾਂਚ ਦੇ ਨਤੀਜੇ ਵਜੋਂ ਲੋਅਰ ਮੇਨਲੈਂਡ ਵਿੱਚ ਸਰਗਰਮ ਇੱਕ ਸੰਗਠਿਤ ਅਪਰਾਧਿਕ ਗਰੁੱਪ ਨਾਲ ਸਬੰਧਤ ਭਾਰੀ ਮਾਤਰਾ ਵਿੱਚ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥ, ਹਥਿਆਰ, ਨਕਦੀ ਅਤੇ ਹੋਰ ਅਹਿਮ ਸਬੂਤ ਜ਼ਬਤ ਕੀਤੇ ਗਏ ਹਨ। ਇਹ ਜਾਂਚ ਅਕਤੂਬਰ 2025 ਵਿੱਚ ਸ਼ੁਰੂ ਕੀਤੀ ਗਈ ਸੀ। ਇਸ ਦਾ ਮੁੱਖ ਕੇਂਦਰ ਇੱਕ ਅਜਿਹਾ ਗਰੁੱਪ ਸੀ ਜੋ ਬਰਨਬੀ, ਵੈਨਕੂਵਰ, ਕੋਕੀਟਲਮ, ਰਿਚਮੰਡ, ਨਿਊ ਵੈਸਟਮਿੰਸਟਰ ਅਤੇ ਸਰੀ ਸਮੇਤ ਕਈ ਸ਼ਹਿਰਾਂ ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਨ ਵਾਲੇ ਇੱਕ ਵਿਆਪਕ ਨੈੱਟਵਰਕ ਨੂੰ ਚਲਾ ਰਿਹਾ ਸੀ। ਜਾਂਚ ਦੌਰਾਨ ਅਧਿਕਾਰੀਆਂ ਨੇ ਅਜਿਹੇ ਕਈ ਟਿਕਾਣਿਆਂ ਦੀ ਪਛਾਣ ਕੀਤੀ ਜਿਨ੍ਹਾਂ ਦੀ ਵਰਤੋਂ ਨਸ਼ਾ ਤਸਕਰੀ ਲਈ ਕੀਤੀ ਜਾ ਰਹੀ ਸੀ।
ਇਸ ਕਾਰਵਾਈ ਦੇ ਤਹਿਤ 2 ਜੂਨ 2026 ਨੂੰ ਸੀਐਫਐਸਈਯੂ-ਬੀਸੀ ਨੇ ਲੋਅਰ ਮੇਨਲੈਂਡ ਐਮਰਜੈਂਸੀ ਰਿਸਪੌਂਸ ਟੀਮ (ERT) ਦੀ ਸਹਾਇਤਾ ਨਾਲ ਕੋਕੀਟਲਮ ਅਤੇ ਡੈਲਟਾ ਸਥਿਤ ਚਾਰ ਵੱਖ-ਵੱਖ ਸ਼ਹਿਰੀ ਟਿਕਾਣਿਆਂ ‘ਤੇ ਸਰਚ ਵਾਰੰਟ ਤਹਿਤ ਛਾਪੇਮਾਰੀ ਕੀਤੀ। ਤਲਾਸ਼ੀ ਦੌਰਾਨ ਜਾਂਚਕਰਤਾਵਾਂ ਨੇ ਲਗਭਗ 2 ਕਿਲੋਗ੍ਰਾਮ ਫੈਂਟਾਨਿਲ, 2 ਕਿਲੋਗ੍ਰਾਮ ਕਰੈਕ ਕੋਕੀਨ, ਅੱਧਾ ਕਿਲੋਗ੍ਰਾਮ ਕ੍ਰਿਸਟਲ ਮੈਥਾਮਫੇਟਾਮਾਈਨ ਅਤੇ ਵੈਕਿਊਮ-ਸੀਲਡ ਪੈਕਟਾਂ ਵਿੱਚ ਬੰਦ 50 ਪੌਂਡ ਕੈਨਾਬਿਸ (ਭੰਗ) ਬਰਾਮਦ ਕੀਤੀ। ਇਸ ਤੋਂ ਇਲਾਵਾ ਮੌਕੇ ਤੋਂ ਦੋ ਗਲੋਕ ਹਥਿਆਰ, ਜਿਨ੍ਹਾਂ ਵਿੱਚ ਇੱਕ 9 ਐਮਐਮ ਦੀ ਹੈਂਡਗਨ ਮੈਗਜ਼ੀਨ ਸਮੇਤ ਸ਼ਾਮਲ ਹੈ, ਜ਼ਬਤ ਕੀਤੇ ਗਏ। ਪੁਲਿਸ ਨੇ ਨਸ਼ੇ ਦੀ ਮਿਲਾਵਟ ਲਈ ਵਰਤੀ ਜਾਣ ਵਾਲੀ 20 ਕਿਲੋਗ੍ਰਾਮ ਕੈਫੀਨ, ਲਗਭਗ 21,000 ਡਾਲਰ ਦੀ ਨਕਦੀ, ਅੱਧਾ ਪੌਂਡ ਮੈਜਿਕ ਮਸ਼ਰੂਮ ਅਤੇ ਕਈ ਮੋਬਾਈਲ ਫ਼ੋਨ ਵੀ ਆਪਣੇ ਕਬਜ਼ੇ ਵਿੱਚ ਲਏ ਹਨ।
ਕਾਰਜਕਾਰੀ ਸੰਚਾਲਨ ਅਧਿਕਾਰੀ ਸਟਾਫ-ਸਾਰਜੈਂਟ ਰਾਇਨ ਜੌਹਨਸਟਨ ਨੇ ਦੱਸਿਆ ਕਿ ਇਸ ਕਾਰਵਾਈ ਨੇ ਲੰਬੇ ਸਮੇਂ ਤੋਂ ਗੈਰ-ਕਾਨੂੰਨੀ ਮੁਨਾਫ਼ਾ ਕਮਾਉਣ ਵਾਲੇ ਇੱਕ ਗਰੁੱਪ ਨੂੰ ਨਿਸ਼ਾਨਾ ਬਣਾਇਆ ਹੈ। ਇਹ ਸਫ਼ਲਤਾ ਪੁਲਿਸ ਭਾਈਵਾਲਾਂ ਦੀ ਅਪਰਾਧਿਕ ਨੈੱਟਵਰਕਾਂ ਨੂੰ ਤੋੜਨ ਅਤੇ ਜਨਤਕ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਦੀ ਪ੍ਰਤੀਬੱਧਤਾ ਨੂੰ ਦਰਸਾਉਂਦੀ ਹੈ। ਛਾਪੇਮਾਰੀ ਦੌਰਾਨ ਕਈ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਜਿਨ੍ਹਾਂ ਨੂੰ ਅਗਲੀ ਜਾਂਚ ਤੱਕ ਰਿਹਾਅ ਕਰ ਦਿੱਤਾ ਗਿਆ ਹੈ ਅਤੇ ਜਲਦੀ ਹੀ ਉਨ੍ਹਾਂ ਵਿਰੁੱਧ ਰਸਮੀ ਦੋਸ਼ ਆਇਦ ਕੀਤੇ ਜਾਣਗੇ। ਇਸ ਸਾਂਝੀ ਕਾਰਵਾਈ ਵਿੱਚ ਕੋਕੀਟਲਮ ਆਰਸੀਐਮਪੀ, ਚਿਲੀਵੈਕ ਆਰਸੀਐਮਪੀ, ਡੈਲਟਾ ਬਾਈਲਾਅ ਸਰਵਿਸਿਜ਼ ਅਤੇ ਫੋਰੈਂਸਿਕ ਟੀਮਾਂ ਨੇ ਅਹਿਮ ਯੋਗਦਾਨ ਪਾਇਆ। This report was written by Divroop Kaur as part of the Local Journalism Initiative.