ਫੈਡਰਲ ਸਰਕਾਰ ਵੱਲੋਂ ਬ੍ਰਿਟਿਸ਼ ਕੋਲੰਬੀਆ ਦੇ ਤਿੰਨ ਕਲੀਨ-ਐਨਰਜੀ ਪ੍ਰੋਜੈਕਟਾਂ ਲਈ ਫੰਡਿੰਗ ਦਾ ਐਲਾਨ

ਸਰੀ, (ਦਿਵਰੂਪ ਕੌਰ): ਫੈਡਰਲ ਸਰਕਾਰ ਵੱਲੋਂ ਮੰਗਲਵਾਰ ਨੂੰ ਐਲਾਨੀ ਗਈ 16 ਮਿਲੀਅਨ ਡਾਲਰ ਦੀ ਫੰਡਿੰਗ ਵਿੱਚ ਬ੍ਰਿਟਿਸ਼ ਕੋਲੰਬੀਆ ਦੇ ਤਿੰਨ ਕਲੀਨ-ਐਨਰਜੀ ਪ੍ਰੋਜੈਕਟ ਸ਼ਾਮਲ ਹਨ। ਸਰਕਾਰ ਨੇ ਐਲਾਨ ਕੀਤਾ ਹੈ ਕਿ ਕੁੱਲ ਪੰਜ ਪ੍ਰੋਜੈਕਟਾਂ ਨੂੰ ਇਹ ਫੰਡਿੰਗ ਮਿਲੇਗੀ ਜਿਨ੍ਹਾਂ ਵਿੱਚੋਂ ਤਿੰਨ ਬੀਸੀ ਵਿੱਚ, ਇੱਕ ਯੂਕੋਨ ਵਿੱਚ ਅਤੇ ਇੱਕ ਉੱਤਰੀ ਪੱਛਮੀ ਪ੍ਰਦੇਸ਼ਾਂ ਵਿੱਚ ਸਥਿਤ ਹੈ। ਬ੍ਰਿਟਿਸ਼ ਕੋਲੰਬੀਆ ਵਿੱਚ ਇਹ ਤਿੰਨ ਪ੍ਰੋਜੈਕਟ ਪੇਂਟਿਕਟਨ, ਪ੍ਰਿੰਸ ਰੂਪਰਟ ਅਤੇ ਵੈਂਡਰਹੂਫ ਵਰਗੇ ਅਹਿਮ ਖੇਤਰਾਂ ਵਿੱਚ ਸਥਿਤ ਹਨ ਜੋ ਕਿ ਸੂਬੇ ਦੇ ਊਰਜਾ ਵਿਕਾਸ ਵਿੱਚ ਮਦਦ ਕਰਨਗੇ।
ਓਕਾਨਾਗਨ-ਸਿਮਿਲਕਾਮੀਨ ਦਾ ਖੇਤਰੀ ਜ਼ਿਲ੍ਹਾ ਪੇਂਟਿਕਟਨ ਪ੍ਰੋਜੈਕਟ ਫੰਡਿੰਗ ਦਾ ਪ੍ਰਾਪਤਕਰਤਾ ਹੈ ਜੋ ਕਿ ਨਵਿਆਉਣਯੋਗ ਅਤੇ ਬਿਜਲੀਕਰਨ ਸੰਬੰਧੀ ਸੰਭਾਵਨਾਵਾਂ ਦੇ ਅਧਿਐਨ ਲਈ ਹੈ। ਇਸ ਖੇਤਰੀ ਜ਼ਿਲ੍ਹੇ ਨੂੰ 582,504 ਡਾਲਰ ਪ੍ਰਾਪਤ ਹੋ ਰਹੇ ਹਨ ਜੋ ਕਿ 38 ਸਹੂਲਤਾਂ ਉੱਤੇ ਊਰਜਾ ਆਡਿਟ ਅਤੇ ਹੋਰ ਸਮੀਖਿਆਵਾਂ ਦੀ ਇੱਕ ਲੜੀ ਵਜੋਂ ਵਰਤੇ ਜਾਣਗੇ। ਦੂਜੇ ਪਾਸੇ ਮੇਟਲਾਕਾਟਲਾ ਡਿਵੈਲਪਮੈਂਟ ਕਾਰਪੋਰੇਸ਼ਨ ਪ੍ਰਿੰਸ ਰੂਪਰਟ ਵਿੱਚ ਮੇਟਲਾਕਾਟਲਾ ਮਾਊਂਟ ਹੇਜ਼ ਵਿੰਡ ਪ੍ਰੋਜੈਕਟ ਲਈ ਫੰਡ ਪ੍ਰਾਪਤਕਰਤਾ ਹੈ। ਕਾਰਪੋਰੇਸ਼ਨ ਨੂੰ ਫੈਡਰਲ ਸਰਕਾਰ ਵੱਲੋਂ 2 ਮਿਲੀਅਨ ਡਾਲਰ ਪ੍ਰਾਪਤ ਹੋਏ ਹਨ।
ਇਹ ਵਿੰਡ ਪ੍ਰੋਜੈਕਟ ਇੱਕ ਪ੍ਰਸਤਾਵਿਤ 100 ਪ੍ਰਤੀਸ਼ਤ ਫਸਟ ਨੇਸ਼ਨ ਦੀ ਮਲਕੀਅਤ ਵਾਲੇ 40-ਮੈਗਾਵਾਟ ਵਿੰਡ ਫਾਰਮ ਲਈ ਸੰਭਾਵਨਾ ਪੜਾਅ ਉੱਤੇ ਧਿਆਨ ਕੇਂਦਰਿਤ ਕਰੇਗਾ ਜੋ ਕਿ ਪ੍ਰਿੰਸ ਰੂਪਰਟ ਖੇਤਰ ਨੂੰ ਬਿਜਲੀ ਸਮਰੱਥਾ ਪ੍ਰਦਾਨ ਕਰੇਗਾ। ਇਸਦੇ ਨਾਲ ਹੀ ਸੈਕੂਜ਼ ਫਸਟ ਨੇਸ਼ਨ ਵੈਂਡਰਹੂਫ ਵਿੱਚ ਹੈਲਹਤਸ’ਈ ਪਾਵਰ ਪ੍ਰੋਜੈਕਟ ਲਈ 1.5 ਮਿਲੀਅਨ ਡਾਲਰ ਪ੍ਰਾਪਤ ਕਰਨ ਵਾਲੀ ਸੰਸਥਾ ਹੈ। ਇਹ ਪ੍ਰੋਜੈਕਟ ਇੱਕ ਪ੍ਰਸਤਾਵਿਤ 200-ਮੈਗਾਵਾਟ ਵਿੰਡ ਫਾਰਮ ਲਈ ਪ੍ਰੀ-ਵਿਕਾਸ ਗਤੀਵਿਧੀਆਂ ਉੱਤੇ ਧਿਆਨ ਕੇਂਦਰਿਤ ਕਰੇਗਾ ਜੋ ਕਿ ਵੈਂਡਰਹੂਫ ਤੋਂ 30 ਕਿਲੋਮੀਟਰ ਦੱਖਣ ਵਿੱਚ ਸਥਿਤ ਹੋਵੇਗਾ ਅਤੇ ਇਹ ਸਵਦੇਸ਼ੀ ਭਾਈਚਾਰਿਆਂ ਦੀ ਅਗਵਾਈ ਵਾਲਾ ਹੋਵੇਗਾ।
ਇਸ ਤੋਂ ਇਲਾਵਾ ਯੂਕੋਨ ਪ੍ਰੋਜੈਕਟ ਨੂੰ 7.5 ਮਿਲੀਅਨ ਡਾਲਰ ਮਿਲ ਰਹੇ ਹਨ ਜਦੋਂ ਕਿ ਨਾਰਥਵੈਸਟ ਟੈਰੀਟਰੀਜ਼ ਪ੍ਰੋਜੈਕਟ ਲਈ 4.4 ਮਿਲੀਅਨ ਡਾਲਰ ਨਿਰਧਾਰਤ ਕੀਤੇ ਗਏ ਹਨ। ਇਹ ਫੰਡਿੰਗ 14 ਮਈ ਨੂੰ ਇੱਕ ਯੋਜਨਾਬੱਧ ਰਾਸ਼ਟਰੀ ਬਿਜਲੀ ਰਣਨੀਤੀ ਲਈ ਕੀਤੇ ਗਏ ਐਲਾਨ ਤੋਂ ਬਾਅਦ ਜਾਰੀ ਕੀਤੀ ਗਈ ਹੈ। ਆਧੁਨਿਕ ਊਰਜਾ ਟੀਚਿਆਂ ਨੂੰ ਪੂਰਾ ਕਰਨ ਲਈ ਫੈਡਰਲ ਸਰਕਾਰ ਦਾ ਇਹ ਇੱਕ ਬਹੁਤ ਹੀ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ। This report was written by Divroop Kaur as part of the Local Journalism Initiative.