ਬ੍ਰਿਟੇਨ ਦੀ ਫੌਜ ਵਿੱਚ ਸ਼ਾਮਲ ਹੋਣਗੇ ਸੈਲਫ ਫਲਾਇੰਗ ਫਾਈਟਰ ਜੈੱਟ

ਸਰੀ, (ਦਿਵਰੂਪ ਕੌਰ): ਬ੍ਰਿਟੇਨ ਨੇ ਮੰਗਲਵਾਰ ਨੂੰ ਆਪਣੀ ਨਵੀਂ ਰੱਖਿਆ ਯੋਜਨਾ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਨਵੀਂ ਯੋਜਨਾ ਤਹਿਤ ਭਵਿੱਖ ਦੀ ਫੌਜ ਵਿੱਚ ਸੈਲਫ ਫਲਾਇੰਗ ਫਾਈਟਰ ਜੈੱਟ, ਬਿਨਾਂ ਅਮਲੇ ਵਾਲੀਆਂ ਪਣਡੁੱਬੀਆਂ ਅਤੇ ਡਰੋਨਾਂ ਨੂੰ ਅਹਿਮ ਸਥਾਨ ਦਿੱਤਾ ਜਾਵੇਗਾ। ਇਹ ਯੋਜਨਾ ਦਰਸਾਉਂਦੀ ਹੈ ਕਿ ਤਕਨਾਲੋਜੀ ਨੇ ਵਿਸ਼ਵ ਪੱਧਰ ਉੱਤੇ ਯੁੱਧ ਦੇ ਤਰੀਕਿਆਂ ਨੂੰ ਕਿਵੇਂ ਬਦਲ ਦਿੱਤਾ ਹੈ। ਨਾਟੋ ਦੇ ਹੋਰ ਦੇਸ਼ਾਂ ਵਾਂਗ ਬ੍ਰਿਟੇਨ ਉੱਤੇ ਵੀ ਆਪਣੇ ਰੱਖਿਆ ਖਰਚੇ ਵਧਾਉਣ ਦਾ ਦਬਾਅ ਲਗਾਤਾਰ ਬਣਿਆ ਹੋਇਆ ਹੈ। ਇਹ ਦਬਾਅ ਰੂਸ ਦੇ ਵੱਧ ਰਹੇ ਹਮਲਾਵਰ ਰੁਖ ਅਤੇ ਅਮਰੀਕਾ ਦੀ ਘੱਟ ਰਹੀ ਭਰੋਸੇਯੋਗਤਾ ਦੇ ਮੱਦੇਨਜ਼ਰ ਪਾਇਆ ਜਾ ਰਿਹਾ ਹੈ।
ਬ੍ਰਿਟੇਨ ਦੀ ਰੱਖਿਆ ਨਿਵੇਸ਼ ਯੋਜਨਾ ਨੂੰ ਲਾਗਤ ਦੇ ਮੁੱਦੇ ਉੱਤੇ ਫੌਜੀ ਅਧਿਕਾਰੀਆਂ ਅਤੇ ਖਜ਼ਾਨਾ ਵਿਭਾਗ ਦੇ ਅਧਿਕਾਰੀਆਂ ਵਿਚਾਲੇ ਚੱਲ ਰਹੇ ਵਿਵਾਦ ਕਾਰਨ ਕਈ ਵਾਰ ਮੁਲਤਵੀ ਕੀਤਾ ਜਾ ਚੁੱਕਾ ਹੈ। ਆਲੋਚਕਾਂ ਦਾ ਕਹਿਣਾ ਹੈ ਕਿ ਰੱਖਿਆ ਖਰਚਿਆਂ ਵਿੱਚ 15 ਅਰਬ ਪੌਂਡ ਦਾ ਵਾਧਾ ਕਰਨ ਦਾ ਵਾਅਦਾ ਕਾਫੀ ਨਹੀਂ ਹੋਵੇਗਾ। ਇਹ ਰਕਮ ਲਗਭਗ 20 ਅਰਬ ਡਾਲਰ ਦੇ ਬਰਾਬਰ ਬਣਦੀ ਹੈ।
ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ ਇਸ ਯੋਜਨਾ ਬਾਰੇ ਬੋਲਦਿਆਂ ਕਿਹਾ ਕਿ ਇਹ ਯੋਜਨਾ ਬ੍ਰਿਟੇਨ ਨੂੰ ਅਜਿਹੇ ਸਮੇਂ ਵਿੱਚ ਸੁਰੱਖਿਅਤ ਰੱਖੇਗੀ ਜਦੋਂ ਦੁਨੀਆ ਪਿਛਲੇ ਕਈ ਦਹਾਕਿਆਂ ਦੇ ਮੁਕਾਬਲੇ ਕਿਤੇ ਵਧੇਰੇ ਖਤਰਨਾਕ ਅਤੇ ਅਸਥਿਰ ਹੋ ਚੁੱਕੀ ਹੈ। ਉਹਨਾਂ ਨੇ ਸਪੱਸ਼ਟ ਕੀਤਾ ਕਿ ਜਦੋਂ ਦੁਨੀਆ ਹਥਿਆਰਬੰਦ ਹੋ ਰਹੀ ਹੋਵੇ ਅਤੇ ਹਮਲੇ ਵੱਧ ਰਹੇ ਹੋਣ ਤਾਂ ਯੁੱਧ ਤੋਂ ਬਚਣ ਦਾ ਸਭ ਤੋਂ ਵਧੀਆ ਤਰੀਕਾ ਇਸ ਲਈ ਤਿਆਰ ਰਹਿਣਾ ਹੀ ਹੈ।
ਇਸ ਨਵੇਂ ਖਰੜੇ ਵਿੱਚ ਸਾਲ 2030 ਤੱਕ ਰੱਖਿਆ ਉੱਤੇ ਬ੍ਰਿਟੇਨ ਦੀ ਜੀਡੀਪੀ ਦਾ 3 ਫੀਸਦੀ ਖਰਚ ਕਰਨ ਦੀ ਕੋਈ ਵਚਨਬੱਧਤਾ ਨਹੀਂ ਪ੍ਰਗਟਾਈ ਗਈ ਹੈ। ਇਹ ਉਹੀ ਅਹਿਮ ਕਾਰਨ ਹੈ ਜਿਸ ਦੇ ਚਲਦਿਆਂ ਜੌਹਨ ਹੀਲੀ ਨੇ 11 ਜੂਨ ਨੂੰ ਬ੍ਰਿਟੇਨ ਦੇ ਰੱਖਿਆ ਸਕੱਤਰ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ। ਹੀਲੀ ਨੇ ਸਰਕਾਰ ਉੱਤੇ ਦੋਸ਼ ਲਗਾਇਆ ਸੀ ਕਿ ਵੱਧ ਰਹੇ ਖਤਰਿਆਂ ਦੇ ਸਮੇਂ ਫੌਜ ਉੱਤੇ ਘੱਟ ਖਰਚ ਕੀਤਾ ਜਾ ਰਿਹਾ ਹੈ। ਉਹਨਾਂ ਨੇ ਬ੍ਰਿਟਿਸ਼ ਖੁਫੀਆ ਏਜੰਸੀ ਦੇ ਮੁਲਾਂਕਣ ਦਾ ਹਵਾਲਾ ਦਿੱਤਾ ਸੀ ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਰੂਸ ਸਾਲ 2030 ਤੱਕ ਨਾਟੋ ਦੇ ਕਿਸੇ ਮੈਂਬਰ ਦੇਸ਼ ਉੱਤੇ ਹਮਲਾ ਕਰ ਸਕਦਾ ਹੈ।
ਪ੍ਰਧਾਨ ਮੰਤਰੀ ਸਟਾਰਮਰ ਨੇ ਕਿਹਾ ਕਿ ਹੀਲੀ ਦੇ ਉੱਤਰਾਧਿਕਾਰੀ ਅਤੇ ਨਵੇਂ ਰੱਖਿਆ ਸਕੱਤਰ ਡੈਨ ਜਾਰਵਿਸ ਨੇ ਯੋਜਨਾ ਨੂੰ ਮਜ਼ਬੂਤ ਅਤੇ ਤਿੱਖਾ ਕਰਨ ਲਈ ਕੰਮ ਕੀਤਾ ਹੈ। ਇਸ ਯੋਜਨਾ ਤਹਿਤ ਨਵੇਂ ਖਰਚੇ ਵਜੋਂ ਦਿੱਤੇ ਜਾ ਰਹੇ 15 ਅਰਬ ਪੌਂਡ ਉਸ 13.5 ਅਰਬ ਪੌਂਡ ਦੀ ਰਕਮ ਤੋਂ ਵੱਧ ਹਨ ਜਿਸ ਦੀ ਪੇਸ਼ਕਸ਼ ਖਜ਼ਾਨਾ ਵਿਭਾਗ ਵੱਲੋਂ ਹੀਲੀ ਨੂੰ ਕੀਤੀ ਗਈ ਸੀ। ਹਾਲਾਂਕਿ ਇਹ ਰਕਮ ਰੱਖਿਆ ਅਧਿਕਾਰੀਆਂ ਵੱਲੋਂ ਮੰਗੇ ਗਏ 28 ਅਰਬ ਪੌਂਡ ਤੋਂ ਬਹੁਤ ਘੱਟ ਹੈ। This report was written by Divroop Kaur as part of the Local Journalism Initiative.