ਟੈੱਕ ਟ੍ਰੇਲ ਓਪਰੇਸ਼ਨਜ਼ ਵਿੱਚ 400 ਮਿਲੀਅਨ ਡਾਲਰ ਦਾ ਨਿਵੇਸ਼

ਸਰੀ, (ਦਿਵਰੂਪ ਕੌਰ): ਊਰਜਾ ਅਤੇ ਕੁਦਰਤੀ ਸਰੋਤ ਮੰਤਰੀ ਟਿਮ ਹਾਜਸਨ ਨੇ ਟੈੱਕ ਟ੍ਰੇਲ ਓਪਰੇਸ਼ਨਜ਼ ਵਿਖੇ ਨਾਜ਼ੁਕ ਖਣਿਜਾਂ (critical minerals) ਦੀ ਪ੍ਰੋਸੈਸਿੰਗ ਸਮਰੱਥਾ ਨੂੰ ਵਧਾਉਣ ਲਈ 400 ਮਿਲੀਅਨ ਡਾਲਰ ਦੇ ਇੱਕ ਇਤਿਹਾਸਕ ਨਿਵੇਸ਼ ਦਾ ਐਲਾਨ ਕੀਤਾ ਹੈ। 7 ਜੁਲਾਈ ਨੂੰ ਟੈੱਕ ਟ੍ਰੇਲ ਵਿਖੇ ਆਯੋਜਿਤ ਇੱਕ ਵਿਸ਼ੇਸ਼ ਸਮਾਰੋਹ ਦੌਰਾਨ ਉਹਨਾਂ ਨੇ ਕੈਨੇਡਾ ਕ੍ਰਿਟੀਕਲ ਮਿਨਰਲਜ਼ ਐਕਸਲੇਟਰ (CCMA) ਦੀ ਸ਼ੁਰੂਆਤ ਕੀਤੀ। ਇਸ ਦੇ ਨਾਲ ਹੀ ਟੈੱਕ ਰਿਸੋਰਸਿਸ ਲਿਮਟਿਡ, CCMA ਅਤੇ ਕੈਨੇਡਾ ਗ੍ਰੋਥ ਫੰਡ ਵਿਚਕਾਰ ਇੱਕ ਰਣਨੀਤਕ ਨਿਵੇਸ਼ ਸਮਝੌਤੇ ‘ਤੇ ਹਸਤਾਖਰ ਕੀਤੇ ਗਏ।
ਮੰਤਰੀ ਹਾਜਸਨ ਨੇ ਪ੍ਰੋਗਰਾਮ ਦੌਰਾਨ ਕਰਮਚਾਰੀਆਂ ਅਤੇ ਸਥਾਨਕ ਨੁਮਾਇੰਦਿਆਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਕੈਨੇਡਾ ਕੋਲ ਉਹ ਸਭ ਕੁਝ ਮੌਜੂਦ ਹੈ ਜਿਸਦੀ ਵਿਸ਼ਵ ਨੂੰ ਲੋੜ ਹੈ। ਸਰਕਾਰ ਅਜਿਹੇ ਪ੍ਰੋਜੈਕਟਾਂ ਨੂੰ ਤੇਜ਼ੀ ਨਾਲ ਪੂਰਾ ਕਰਨ ਲਈ ਦ੍ਰਿੜਤਾ ਨਾਲ ਕੰਮ ਕਰ ਰਹੀ ਹੈ। ਇਹ ਨਵਾਂ ਐਕਸਲੇਟਰ ਫੰਡ ਕੈਨੇਡਾ ਦੇ ਕੁਦਰਤੀ ਸਰੋਤਾਂ ਦੀ ਭਰਪੂਰਤਾ ਨੂੰ ਅਸਲ ਉਦਯੋਗਿਕ ਪ੍ਰੋਜੈਕਟਾਂ ਵਿੱਚ ਬਦਲਣ ਦਾ ਕੰਮ ਕਰੇਗਾ, ਜਿਸ ਨਾਲ ਆਲਮੀ ਬਾਜ਼ਾਰ ਦੇ ਉਤਾਰ-ਚੜ੍ਹਾਅ ਦੇ ਬਾਵਜੂਦ ਉਦਯੋਗ ਜਗਤ ਨੂੰ ਨਿਵੇਸ਼ ਕਰਨ ਦਾ ਭਰੋਸਾ ਮਿਲੇਗਾ।
ਟੈੱਕ ਦੇ ਪ੍ਰਧਾਨ ਅਤੇ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਜੋਨਾਥਨ ਪ੍ਰਾਈਸ ਨੇ ਦੱਸਿਆ ਕਿ ਨਿਰਮਾਣ ਕਾਰਜਾਂ ਦੌਰਾਨ ਇੱਥੇ ਸੈਂਕੜੇ ਨਵੀਆਂ ਨੌਕਰੀਆਂ ਪੈਦਾ ਹੋਣਗੀਆਂ। ਇਹ ਨਿਵੇਸ਼ ਟ੍ਰੇਲ ਸਮੈਲਟਿੰਗ ਪਲਾਂਟ ਦੀ ਲੰਬੇ ਸਮੇਂ ਦੀ ਸਥਿਰਤਾ ਨੂੰ ਯਕੀਨੀ ਬਣਾਏਗਾ ਅਤੇ ਆਉਣ ਵਾਲੇ ਕਈ ਦਹਾਕਿਆਂ ਤੱਕ ਇਸ ਉਦਯੋਗ ਨੂੰ ਸਫ਼ਲਤਾਪੂਰਵਕ ਚੱਲਣ ਵਿੱਚ ਮਦਦ ਕਰੇਗਾ। ਇਹ ਪ੍ਰੋਜੈਕਟ ਉੱਤਰੀ ਅਮਰੀਕਾ ਵਿੱਚ ਪ੍ਰੋਸੈਸਿੰਗ ਸਮਰੱਥਾ ਨੂੰ ਮਜ਼ਬੂਤ ਕਰੇਗਾ ਅਤੇ ਵਿਦੇਸ਼ੀ ਸਪਲਾਈ ਚੇਨ ‘ਤੇ ਨਿਰਭਰਤਾ ਨੂੰ ਘਟਾਏਗਾ।
ਇਸ ਮੌਕੇ ਕੋਟਨੇ-ਮੋਨਾਸ਼ੀ ਦੇ ਵਿਧਾਇਕ ਸਟੀਵ ਮੋਰੀਸੈੱਟ ਅਤੇ ਟ੍ਰੇਲ ਦੀ ਮੇਅਰ ਕੌਲੀਨ ਜੋਨਸ ਨੇ ਵੀ ਖ਼ੁਸ਼ੀ ਦਾ ਪ੍ਰਗਟਾਵਾ ਕੀਤਾ। ਉਹਨਾਂ ਕਿਹਾ ਕਿ ਜਦੋਂ ਸਥਾਨਕ, ਸੂਬਾਈ ਅਤੇ ਫੈਡਰਲ ਸਰਕਾਰਾਂ ਉਦਯੋਗਾਂ ਨਾਲ ਮਿਲ ਕੇ ਕੰਮ ਕਰਦੀਆਂ ਹਨ, ਤਾਂ ਅਜਿਹੇ ਬਿਹਤਰ ਨਤੀਜੇ ਸਾਹਮਣੇ ਆਉਂਦੇ ਹਨ। ਇਹ ਨਿਵੇਸ਼ ਸਥਾਨਕ ਆਰਥਿਕਤਾ ਅਤੇ ਹੁਨਰਮੰਦ ਕਾਮਿਆਂ ਦੇ ਭਵਿੱਖ ਨੂੰ ਸੁਰੱਖਿਅਤ ਬਣਾਉਣ ਲਈ ਬੇਹੱਦ ਸ਼ਾਨਦਾਰ ਕਦਮ ਹੈ। This report was written by Divroop Kaur as part of the Local Journalism Initiative.