ਸਰੀ, (ਦਿਵਰੂਪ ਕੌਰ): ਫੀਫਾ ਵਿਸ਼ਵ ਕੱਪ 2026 ਦੇ ਫਾਈਨਲ ਮੈਚ ਤੋਂ ਪਹਿਲਾਂ ਹੋਣ ਵਾਲੀ ਕਲੋਜ਼ਿੰਗ ਸੈਰੇਮਨੀ ਵਿੱਚ ਮਸ਼ਹੂਰ ਹਾਲੀਵੁੱਡ ਅਦਾਕਾਰ ਟੌਮ ਕਰੂਜ਼ ਸ਼ਿਰਕਤ ਕਰਨਗੇ। ਇਹ ਸਮਾਗਮ ਐਤਵਾਰ 19 ਜੁਲਾਈ ਨੂੰ ਨਿਊਯਾਰਕ ਨਿਊ ਜਰਸੀ ਸਟੇਡੀਅਮ ਵਿੱਚ ਹੋਵੇਗਾ। ਇਹ ਸੈਰੇਮਨੀ 48 ਟੀਮਾਂ ਦੇ ਸਫ਼ਰ ਅਤੇ 16 ਮੇਜ਼ਬਾਨ ਸ਼ਹਿਰਾਂ ਦੇ ਨਾਲ ਤਿੰਨ ਮੇਜ਼ਬਾਨ ਦੇਸ਼ਾਂ ਦੀ ਸੰਸਕ੍ਰਿਤੀ ਨੂੰ ਪੇਸ਼ ਕਰੇਗੀ। ਫਾਈਨਲ ਮੁਕਾਬਲੇ ਤੋਂ 90 ਮਿੰਟ ਪਹਿਲਾਂ ਦੁਪਹਿਰ 1:30 ਵਜੇ ਸ਼ੁਰੂ ਹੋਣ ਵਾਲੇ ਇਸ ਪ੍ਰੋਗਰਾਮ ਵਿੱਚ ਲੌਰਾ ਪੌਸਿਨੀ, ਨਿਕੋਲ ਸ਼ਰਜ਼ਿੰਗਰ, ਰੌਬੀ ਵਿਲੀਅਮਜ਼ ਅਤੇ ਆਈਸ਼ੋਸਪੀਡ ਵਰਗੇ ਕਲਾਕਾਰ ਆਪਣੀ ਪੇਸ਼ਕਾਰੀ ਦੇਣਗੇ। ਇਸ ਦੇ ਨਾਲ ਹੀ ਈਜੀਓਟੀ ਜੇਤੂ ਜੈਨੀਫਰ ਹਡਸਨ ਸੰਯੁਕਤ ਰਾਜ ਅਮਰੀਕਾ ਦਾ ਰਾਸ਼ਟਰੀ ਗੀਤ ਪੇਸ਼ ਕਰੇਗੀ। ਫੀਫਾ ਦੇ ਚੀਫ ਆਪਰੇਟਿੰਗ ਅਫਸਰ ਹੀਮੋ ਸ਼ਿਰਗੀ ਅਨੁਸਾਰ ਇਹ ਸਮਾਗਮ ਸੰਗੀਤ ਅਤੇ ਫੁੱਟਬਾਲ ਰਾਹੀਂ ਟੂਰਨਾਮੈਂਟ ਨੂੰ ਇੱਕ ਸ਼ਾਨਦਾਰ ਅੰਤ ਵੱਲ ਲੈ ਕੇ ਜਾਵੇਗਾ। ਇਸ ਤੋਂ ਇਲਾਵਾ ਫੀਫਾ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਕਰਵਾਏ ਜਾ ਰਹੇ ਫਾਈਨਲ ਹਾਫਟਾਈਮ ਸ਼ੋਅ ਵਿੱਚ ਜਸਟਿਨ ਬੀਬਰ, ਮੈਡੋਨਾ, ਸ਼ਕੀਰਾ ਅਤੇ ਬੀਟੀਐਸ ਵਰਗੇ ਪ੍ਰਸਿੱਧ ਸਿਤਾਰੇ ਸਟੇਜ ਸਾਂਝਾ ਕਰਨਗੇ। 11 ਮਿੰਟ ਦੇ ਇਸ ਖਾਸ ਪ੍ਰਸਾਰਣ ਵਿੱਚ ਨਾਈਜੀਰੀਅਨ ਗਾਇਕ ਬਰਨਾ ਬੁਆਏ, ਵੈਨੇਜ਼ੁਏਲਨ ਕੰਡਕਟਰ ਗੁਸਤਾਵੋ ਡੂਡਾਮੇਲ ਅਤੇ ਕੋਲਡਪਲੇ ਦੇ ਨਾਲ ਪੀਐਸ 22 ਕੋਰਸ ਦੀ ਵਿਸ਼ੇਸ਼ ਪੇਸ਼ਕਾਰੀ ਵੀ ਦੇਖਣ ਨੂੰ ਮਿਲੇਗੀ।
ਫੀਫਾ ਪ੍ਰਧਾਨ ਗਿਆਨੀ ਇਨਫੈਂਟੀਨੋ ਨੇ ਕਿਹਾ ਕਿ ਇਹ ਹਾਫਟਾਈਮ ਸ਼ੋਅ ਫੀਫਾ ਗਲੋਬਲ ਸਿਟੀਜ਼ਨ ਐਜੂਕੇਸ਼ਨ ਫੰਡ ਦਾ ਸਮਰਥਨ ਕਰੇਗਾ। ਇਸ ਦਾ ਮਕਸਦ ਦੁਨੀਆ ਭਰ ਦੇ ਬੱਚਿਆਂ ਲਈ ਮਿਆਰੀ ਸਿੱਖਿਆ ਅਤੇ ਫੁੱਟਬਾਲ ਦੇ ਮੌਕਿਆਂ ਦਾ ਵਿਸਤਾਰ ਕਰਨਾ ਹੈ। ਇਹ ਫਾਈਨਲ ਮੈਚ ਖੇਡ ਪ੍ਰੇਮੀਆਂ ਲਈ ਇੱਕ ਯਾਦਗਾਰੀ ਅਨੁਭਵ ਹੋਣ ਵਾਲਾ ਹੈ। This report was written by Ekjot Singh as part of the Local Journalism Initiative.