ਕਮੋਲਿਕ ਫਾਊਂਡੇਸ਼ਨ ਵੱਲੋਂ ਸਰੀ ਦੇ 6 ਹੋਣਹਾਰ ਵਿਦਿਆਰਥੀਆਂ ਨੂੰ $60,000 ਦੀ ਸਕਾਲਰਸ਼ਿਪ

ਸਰੀ, (ਦਿਵਰੂਪ ਕੌਰ): ਕਮੋਲਿਕ ਫਾਊਂਡੇਸ਼ਨ ਨੇ ਸਰੀ ਦੇ 6 ਵੱਖ ਵੱਖ ਸਕੂਲਾਂ ਦੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੀਆਂ ਸ਼ਾਨਦਾਰ ਅਕਾਦਮਿਕ ਪ੍ਰਾਪਤੀਆਂ ਅਤੇ ਔਕੜਾਂ ਦਾ ਸਾਹਮਣਾ ਕਰਨ ਦੇ ਜਜ਼ਬੇ ਨੂੰ ਦੇਖਦਿਆਂ $60,000 ਦੀ ਸਕਾਲਰਸ਼ਿਪ ਦਿੱਤੀ ਹੈ। ਫਾਊਂਡੇਸ਼ਨ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਇਸ ਵਜ਼ੀਫੇ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਉੱਚ ਸਿੱਖਿਆ ਪ੍ਰਾਪਤ ਕਰਨ ਵਿੱਚ ਮਦਦ ਕਰਨਾ ਹੈ। ਸਾਲ 2008 ਵਿੱਚ ਸਥਾਪਿਤ ਇਹ ਸੰਸਥਾ ਬ੍ਰਿਟਿਸ਼ ਕੋਲੰਬੀਆ ਦੇ ਨੌਜਵਾਨਾਂ ਦੀ ਸਹਾਇਤਾ ਕਰਦੀ ਹੈ। ਇਹ ਫਾਊਂਡੇਸ਼ਨ ਪੜ੍ਹਾਈ ਲਈ ਫੰਡ ਦੇਣ ਤੋਂ ਇਲਾਵਾ ਵਿਦਿਆਰਥੀਆਂ ਨੂੰ ਮੈਂਟਰਸ਼ਿਪ ਅਤੇ ਹੋਰ ਪੇਸ਼ੇਵਰ ਮੌਕੇ ਵੀ ਪ੍ਰਦਾਨ ਕਰਦੀ ਹੈ ਤਾਂ ਜੋ ਉਹ ਲੰਮੇ ਸਮੇਂ ਦੀ ਸਫਲਤਾ ਪ੍ਰਾਪਤ ਕਰ ਸਕਣ। ਇਹ 6 ਹੋਣਹਾਰ ਵਿਦਿਆਰਥੀ ਸਰੀ ਦੇ ਵੱਖ ਵੱਖ ਸੈਕੰਡਰੀ ਸਕੂਲਾਂ ਨਾਲ ਸਬੰਧਤ ਹਨ ਜੋ ਆਪਣੀ ਅਗਲੇਰੀ ਪੜ੍ਹਾਈ ਸ਼ੁਰੂ ਕਰਨ ਜਾ ਰਹੇ ਹਨ। ਜੌਹਨਸਟਨ ਹਾਈਟਸ ਸੈਕੰਡਰੀ ਦੀ ਵਿਦਿਆਰਥਣ ਵੈਸ਼ਨਵੀ ਵਰਮਾ ਟੋਰਾਂਟੋ ਯੂਨੀਵਰਸਿਟੀ ਤੋਂ ਲਾਈਫ ਸਾਇੰਸਜ਼ ਦੀ ਪੜ੍ਹਾਈ ਕਰੇਗੀ ਅਤੇ ਉਸ ਦਾ ਟੀਚਾ ਮਾਨਸਿਕ ਸਿਹਤ ਦੇ ਖੇਤਰ ਵਿੱਚ ਕੰਮ ਕਰਨਾ ਹੈ। ਐਨਵਰ ਕਰੀਕ ਸੈਕੰਡਰੀ ਦੀ ਰੀਆ ਕਾਹਲੋਂ ਨੂੰ ਵੀ $60,000 ਦੀ ਸਕਾਲਰਸ਼ਿਪ ਮਿਲੀ ਹੈ ਜੋ ਬ੍ਰਿਟਿਸ਼ ਕੋਲੰਬੀਆ ਯੂਨੀਵਰਸਿਟੀ ਤੋਂ ਫਾਈਨਾਂਸ ਵਿੱਚ ਕਾਮਰਸ ਦੀ ਡਿਗਰੀ ਕਰੇਗੀ। ਰੀਆ ਦਾ ਟੀਚਾ ਇਨਵੈਸਟਮੈਂਟ ਬੈਂਕਿੰਗ ਵਿੱਚ ਕੰਮ ਕਰਦਿਆਂ ਔਟਿਜ਼ਮ ਵਾਲੇ ਬੱਚਿਆਂ ਲਈ ਰਿਹਾਇਸ਼ ਦਾ ਪ੍ਰਬੰਧ ਕਰਨਾ ਹੈ। ਐਲ.ਏ. ਮੈਥੇਸਨ ਸੈਕੰਡਰੀ ਦੀ ਮੈਡੀਸਨ ਹੋਲਬੋਰਨ ਡਗਲਸ ਕਾਲਜ ਤੋਂ ਨਰਸਿੰਗ ਦੀ ਡਿਗਰੀ ਕਰਕੇ ਬੱਚਿਆਂ ਦੇ ਹਸਪਤਾਲ ਵਿੱਚ ਨਰਸ ਵਜੋਂ ਸੇਵਾਵਾਂ ਨਿਭਾਉਣਾ ਚਾਹੁੰਦੀ ਹੈ।
ਫਲੀਟਵੁੱਡ ਪਾਰਕ ਸੈਕੰਡਰੀ ਦੀ ਕੈਰਨ ਝੂ ਫਾਰਮੇਸੀ ਦੀ ਡਿਗਰੀ ਕਰੇਗੀ ਅਤੇ ਭਵਿੱਖ ਵਿੱਚ ਫਾਰਮਾਸਿਸਟ ਵਜੋਂ ਮਰੀਜ਼ਾਂ ਦੀ ਮਦਦ ਕਰਨਾ ਚਾਹੁੰਦੀ ਹੈ। ਈਕੋਲ ਕਵਾਂਟਲਿਨ ਪਾਰਕ ਸੈਕੰਡਰੀ ਦੀ ਵਿਦਿਆਰਥਣ ਜੀਆ ਸਿੰਘ ਦਾ ਟੀਚਾ ਸਿਹਤ ਵਿਗਿਆਨ ਦੀ ਡਿਗਰੀ ਪ੍ਰਾਪਤ ਕਰਕੇ ਬੱਚਿਆਂ ਦੀ ਡਾਕਟਰ ਬਣਨਾ ਹੈ ਤਾਂ ਜੋ ਉਹ ਲੋੜਵੰਦ ਬੱਚਿਆਂ ਦਾ ਇਲਾਜ ਕਰ ਸਕੇ। ਇਸੇ ਤਰ੍ਹਾਂ ਫਰੇਜ਼ਰ ਹਾਈਟਸ ਸੈਕੰਡਰੀ ਦੇ ਵਿਦਿਆਰਥੀ ਯਸਾਯਾਹ ਮੁਏਰ ਨੂੰ ਵੀ ਇਸ ਸਕਾਲਰਸ਼ਿਪ ਲਈ ਚੁਣਿਆ ਗਿਆ ਹੈ। ਉਹ ਬਾਇਓਮੈਡੀਕਲ ਫਿਜ਼ੀਓਲੋਜੀ ਵਿੱਚ ਸਾਇੰਸ ਦੀ ਡਿਗਰੀ ਕਰਕੇ ਇੱਕ ਫੈਮਿਲੀ ਫਿਜ਼ੀਸ਼ੀਅਨ ਬਣਨ ਦੀ ਇੱਛਾ ਰੱਖਦਾ ਹੈ। ਇਨ੍ਹਾਂ ਸਾਰੇ ਵਿਦਿਆਰਥੀਆਂ ਦੇ ਅਧਿਆਪਕਾਂ ਨੇ ਉਨ੍ਹਾਂ ਦੀ ਸਖਤ ਮਿਹਨਤ ਅਤੇ ਸਮਾਜ ਪ੍ਰਤੀ ਉਨ੍ਹਾਂ ਦੀ ਸੋਚ ਦੀ ਭਰਪੂਰ ਸ਼ਲਾਘਾ ਕੀਤੀ ਹੈ। This report was written by Divroop Kaur as part of the Local Journalism Initiative.