ਰਾਸ਼ਟਰਮੰਡਲ ਖੇਡਾਂ ਵਿੱਚ ਕੈਨੇਡੀਅਨ ਅਥਲੀਟਾਂ ਦਾ ਸ਼ਾਨਦਾਰ ਪ੍ਰਦਰਸ਼ਨ

ਸਰੀ, (ਦਿਵਰੂਪ ਕੌਰ): ਖੇਡਾਂ ਦੇ 7ਵੇਂ ਦਿਨ ਕੈਨੇਡਾ ਦੇ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਕਈ ਤਗਮੇ ਆਪਣੇ ਨਾਮ ਕੀਤੇ ਹਨ। ਔਰਤਾਂ ਦੇ 100 ਮੀਟਰ ਟੀ47 ਫਾਈਨਲ ਵਿੱਚ ਕੈਨੇਡਾ ਦਾ ਪੂਰਾ ਦਬਦਬਾ ਰਿਹਾ। ਟੋਰਾਂਟੋ ਦੀ ਸ਼ੇਰੀਆਉਨਾ ਹਾਸੇ ਨੇ 12.23 ਸੈਕਿੰਡ ਦੇ ਸਮੇਂ ਨਾਲ ਸੋਨ ਤਗਮਾ ਜਿੱਤਿਆ। ਇਸ ਦੇ ਨਾਲ ਹੀ ਉਸ ਨੇ ਆਪਣਾ ਹੀ ਰਾਸ਼ਟਰੀ ਰਿਕਾਰਡ ਵੀ ਤੋੜਿਆ। ਉਸ ਦੀ ਸਾਥਣ ਨਿਊਪੋਰਟ ਦੀ 17 ਸਾਲਾ ਕਲੋਏ ਡਨਬਰ ਨੇ 12.33 ਸੈਕਿੰਡ ਦਾ ਆਪਣਾ ਨਿੱਜੀ ਸਰਵੋਤਮ ਪ੍ਰਦਰਸ਼ਨ ਕਰਦਿਆਂ ਚਾਂਦੀ ਦਾ ਤਗਮਾ ਜਿੱਤਿਆ। ਪੈਰਾ ਅਥਲੈਟਿਕਸ ਵਿੱਚ ਕੈਨੇਡਾ ਨੇ ਇੱਕ ਹੋਰ ਤਗਮਾ ਹਾਸਲ ਕੀਤਾ। ਨੇਤਰਹੀਣ ਦੌੜਾਕ ਜਾਰਜ ਕੁਆਰਕੂ ਅਤੇ ਉਨ੍ਹਾਂ ਦੇ ਗਾਈਡ ਓਲੁਵਾਸੇਗੁਨ ਮਾਕਿੰਡੇ ਨੇ ਪੁਰਸ਼ਾਂ ਦੇ 100 ਮੀਟਰ ਟੀ12 ਫਾਈਨਲ ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ। ਉਨ੍ਹਾਂ ਨੇ ਇਹ ਦੌੜ 11.06 ਸੈਕਿੰਡ ਵਿੱਚ ਪੂਰੀ ਕੀਤੀ। ਔਰਤਾਂ ਦੇ ਡਿਸਕਸ ਥਰੋਅ ਮੁਕਾਬਲੇ ਵਿੱਚ ਜੂਲੀਆ ਟੰਕਸ ਨੇ ਚਾਂਦੀ ਦਾ ਤਗਮਾ ਜਿੱਤਿਆ। ਲੰਡਨ ਉਨਟਾਰੀਓ ਦੀ ਰਹਿਣ ਵਾਲੀ ਇਸ ਖਿਡਾਰਨ ਨੇ ਆਪਣੀ 6 ਵਾਰੀ ਵਿੱਚੋਂ ਦੂਜੀ ਵਾਰ ਵਿੱਚ 60.67 ਮੀਟਰ ਦੀ ਦੂਰੀ ਤੈਅ ਕਰਕੇ ਇਹ ਮੁਕਾਮ ਹਾਸਲ ਕੀਤਾ। ਵੇਟਲਿਫਟਿੰਗ ਵਿੱਚ ਵੀ ਕੈਨੇਡੀਅਨ ਖਿਡਾਰੀਆਂ ਨੇ ਆਪਣੀ ਤਾਕਤ ਦਿਖਾਈ। ਜ਼ੇਵੀਅਰ ਲੁਸਿਗਨਾਨ ਅਤੇ ਐਟਾ ਲਵ ਦੋਵਾਂ ਨੇ ਗਲਾਸਗੋ ਵਿੱਚ ਆਪਣੇ ਕਰੀਅਰ ਦੇ ਪਹਿਲੇ ਰਾਸ਼ਟਰਮੰਡਲ ਖੇਡ ਤਗਮੇ ਜਿੱਤੇ। ਜ਼ੇਵੀਅਰ ਲੁਸਿਗਨਾਨ ਨੇ ਪੁਰਸ਼ਾਂ ਦੇ 110 ਕਿਲੋਗ੍ਰਾਮ ਫਾਈਨਲ ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ। ਉਸ ਨੇ ਸਨੈਚ ਵਿੱਚ 159 ਕਿਲੋਗ੍ਰਾਮ ਅਤੇ ਕਲੀਨ ਐਂਡ ਜਰਕ ਵਿੱਚ 197 ਕਿਲੋਗ੍ਰਾਮ ਭਾਰ ਚੁੱਕ ਕੇ ਕੁੱਲ 356 ਕਿਲੋਗ੍ਰਾਮ ਦਾ ਸਕੋਰ ਬਣਾਇਆ। ਇਸ ਦੇ ਨਾਲ ਹੀ 18 ਸਾਲਾ ਐਟਾ ਲਵ ਨੇ ਔਰਤਾਂ ਦੇ ਪਲੱਸ 86 ਕਿਲੋਗ੍ਰਾਮ ਮੁਕਾਬਲੇ ਵਿੱਚ ਕਾਂਸੀ ਦਾ ਤਗਮਾ ਹਾਸਲ ਕੀਤਾ। ਉਸ ਨੇ ਸਨੈਚ ਵਿੱਚ 106 ਕਿਲੋਗ੍ਰਾਮ ਅਤੇ ਕਲੀਨ ਐਂਡ ਜਰਕ ਵਿੱਚ 144 ਕਿਲੋਗ੍ਰਾਮ ਭਾਰ ਚੁੱਕ ਕੇ ਕੁੱਲ 250 ਕਿਲੋਗ੍ਰਾਮ ਦਾ ਸਕੋਰ ਬਣਾਇਆ। ਕੈਨੇਡਾ ਦੀ ਟੀਮ ਨੇ ਵੇਟਲਿਫਟਿੰਗ ਵਿੱਚ ਹੁਣ ਤੱਕ ਕੁੱਲ 8 ਤਗਮੇ ਜਿੱਤ ਲਏ ਹਨ। This report was written by Divroop Kaur as part of the Local Journalism Initiative.