ਡੈਲਟਾ ਦਾ ਵੈਸਥਮ ਆਈਲੈਂਡ ਪੁਲ ਤਿੰਨ ਹਫ਼ਤੇ ਰਹੇਗਾ ਬੰਦ, 15 ਮਾਰਚ ਤੱਕ ਚੱਲੇਗਾ ਮੁਰੰਮਤ ਦਾ ਕੰਮ

ਸਰੀ, (ਦਿਵਰੂਪ ਕੌਰ): ਡੈਲਟਾ ਦੇ ਵੈਸਥਮ ਆਈਲੈਂਡ (Westham Island) ਨੂੰ ਜੋੜਨ ਵਾਲੇ ਇਤਿਹਾਸਕ ਪੁਲ ਨੂੰ ਜ਼ਰੂਰੀ ਮੁਰੰਮਤ ਦੇ ਕੰਮਾਂ ਕਾਰਨ ਅਗਲੇ ਕੁਝ ਹਫ਼ਤਿਆਂ ਲਈ ਆਵਾਜਾਈ ਵਾਸਤੇ ਬੰਦ ਕਰਨ ਦਾ ਐਲਾਨ ਕੀਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਟ੍ਰਾਂਸਲਿੰਕ ਨੇ ਦੱਸਿਆ ਹੈ ਕਿ ਇਹ ਪੁਲ 26 ਫਰਵਰੀ ਤੋਂ ਲੈ ਕੇ 15 ਮਾਰਚ ਤੱਕ ਗੱਡੀਆਂ ਦੀ ਆਵਾਜਾਈ ਲਈ ਪੂਰੀ ਤਰ੍ਹਾਂ ਬੰਦ ਰਹੇਗਾ। ਇਸ ਬੰਦੀ ਦਾ ਮੁੱਖ ਕਾਰਨ ਪੁਲ ਦੇ ਲੱਕੜ ਦੇ ਬਣੇ ਹੋਏ ਡੈੱਕ (deck) ਦੇ ਕੁਝ ਹਿੱਸਿਆਂ ਨੂੰ ਬਦਲਣਾ ਅਤੇ ਹੋਰ ਜ਼ਰੂਰੀ ਸਾਂਭ-ਸੰਭਾਲ ਕਰਨਾ ਹੈ ਤਾਂ ਜੋ ਇਸ ਦੀ ਮਜ਼ਬੂਤੀ ਬਣੀ ਰਹੇ ਅਤੇ ਇਹ ਆਉਣ ਵਾਲੇ ਸਮੇਂ ਵਿੱਚ ਸੁਰੱਖਿਅਤ ਢੰਗ ਨਾਲ ਚੱਲਦਾ ਰਹੇ। ਅਧਿਕਾਰੀਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਭਾਵੇਂ ਗੱਡੀਆਂ ਲਈ ਰਸਤਾ ਬੰਦ ਹੋਵੇਗਾ ਪਰ ਪੈਦਲ ਚੱਲਣ ਵਾਲਿਆਂ ਅਤੇ ਸਾਈਕਲ ਸਵਾਰਾਂ ਨੂੰ ਲੰਘਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ।
ਪੁਲ ਦੇ ਬੰਦ ਹੋਣ ਕਾਰਨ ਟਾਪੂ ‘ਤੇ ਰਹਿਣ ਵਾਲੇ ਲਗਭਗ 150 ਲੋਕਾਂ ਅਤੇ ਉੱਥੇ ਖੇਤੀਬਾੜੀ ਦਾ ਕੰਮ ਕਰਨ ਵਾਲੇ ਕਿਸਾਨਾਂ ਨੂੰ ਆਉਣ-ਜਾਣ ਵਿੱਚ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਪ੍ਰਸ਼ਾਸਨ ਨੇ ਭਰੋਸਾ ਦਿੱਤਾ ਹੈ ਕਿ ਐਮਰਜੈਂਸੀ ਸੇਵਾਵਾਂ ਜਿਵੇਂ ਕਿ ਐਂਬੂਲੈਂਸ, ਪੁਲਿਸ ਅਤੇ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ ਤਾਂ ਜੋ ਲੋੜ ਪੈਣ ‘ਤੇ ਉਹ ਬਿਨਾਂ ਕਿਸੇ ਰੁਕਾਵਟ ਦੇ ਟਾਪੂ ਤੱਕ ਪਹੁੰਚ ਸਕਣ। ਇਹ ਪੁਲ ਕੈਨੋ ਪਾਸ (Canoe Pass) ਦੇ ਉੱਪਰ ਬਣਿਆ ਹੋਇਆ ਹੈ ਅਤੇ ਇਹ ਵੈਸਥਮ ਆਈਲੈਂਡ ਨੂੰ ਲਾਡਨਰ (Ladner) ਨਾਲ ਜੋੜਨ ਵਾਲਾ ਇਕਲੌਤਾ ਜ਼ਮੀਨੀ ਰਸਤਾ ਹੈ, ਇਸ ਲਈ ਇਸ ਦੀ ਬੰਦੀ ਦਾ ਅਸਰ ਸਥਾਨਕ ਭਾਈਚਾਰੇ ‘ਤੇ ਜ਼ਿਆਦਾ ਪਵੇਗਾ।
ਜ਼ਿਕਰਯੋਗ ਹੈ ਕਿ ਵੈਸਥਮ ਆਈਲੈਂਡ ਬ੍ਰਿਜ 100 ਸਾਲ ਤੋਂ ਵੀ ਪੁਰਾਣਾ ਇੱਕ ‘ਸਵਿੰਗ ਬ੍ਰਿਜ’ ਹੈ ਜਿਸ ਦੇ ਲੱਕੜ ਦੇ ਢਾਂਚੇ ਨੂੰ ਸਮੇਂ-ਸਮੇਂ ‘ਤੇ ਮੁਰੰਮਤ ਦੀ ਲੋੜ ਪੈਂਦੀ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਕੰਮ ਸਵੇਰੇ ਜਲਦੀ ਸ਼ੁਰੂ ਹੋਵੇਗਾ ਅਤੇ ਦੇਰ ਸ਼ਾਮ ਤੱਕ ਚੱਲੇਗਾ। ਜੇਕਰ ਮੌਸਮ ਖਰਾਬ ਹੁੰਦਾ ਹੈ ਤਾਂ ਮੁਰੰਮਤ ਦੇ ਕੰਮ ਵਿੱਚ ਦੇਰੀ ਹੋ ਸਕਦੀ ਹੈ ਅਤੇ ਬੰਦੀ ਦਾ ਸਮਾਂ ਵਧ ਸਕਦਾ ਹੈ। ਸਥਾਨਕ ਲੋਕਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਆਪਣੀਆਂ ਗੱਡੀਆਂ ਪੁਲ ਦੇ ਦੂਜੇ ਪਾਸੇ ਪਾਰਕ ਕਰਕੇ ਪੈਦਲ ਪੁਲ ਪਾਰ ਕਰ ਸਕਦੇ ਹਨ ਜਿੱਥੇ ਦੂਜੇ ਪਾਸੇ ਜਾਣ ਲਈ ਵਾਹਨਾਂ ਦਾ ਪ੍ਰਬੰਧ ਕੀਤਾ ਜਾ ਸਕਦਾ ਹੈ। This report was written by Divroop Kaur as part of the Local Journalism Initiative.