ਚਿਲੀਵੈਕ ਵਿੱਚ ਡਰੱਗ ਲੈਬ ਦਾ ਪਰਦਾਫਾਸ਼, 9 ਲੱਖ ਤੋਂ ਵੱਧ ਨਸ਼ੀਲੀਆਂ ਖੁਰਾਕਾਂ ਜ਼ਬਤ

ਸਰੀ, (ਦਿਵਰੂਪ ਕੌਰ): ਆਰਸੀਐਮਪੀ (RCMP) ਨੇ ਚਿਲੀਵੈਕ ਵਿੱਚ ਇੱਕ ਵੱਡੀ ਅਤੇ ਗੁਪਤ ਡਰੱਗ ਲੈਬ ਉੱਤੇ ਕੀਤੀ ਗਈ ਕਾਰਵਾਈ ਦੇ ਵੇਰਵੇ ਅਤੇ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਪਿਛਲੇ ਸਾਲ 2 ਅਕਤੂਬਰ ਨੂੰ ਪੁਲਿਸ ਨੇ ਸਾਊਥ ਸੁਮਾਸ ਰੋਡ ਸਥਿਤ ਇੱਕ ਲੈਬ, ਕਈ ਘਰਾਂ ਅਤੇ ਸਟੋਰੇਜ ਲੌਕਰਾਂ ਦੀ ਤਲਾਸ਼ੀ ਲਈ ਸੀ। ਇਸ ਛਾਪੇਮਾਰੀ ਦੌਰਾਨ ਵੱਡੀ ਮਾਤਰਾ ਵਿੱਚ ਘਾਤਕ ਨਸ਼ੀਲੇ ਪਦਾਰਥ ਅਤੇ ਕੈਮੀਕਲ ਬਰਾਮਦ ਕੀਤੇ ਗਏ ਸਨ। ਪੁਲਿਸ ਅਨੁਸਾਰ ਇਹ ਲੈਬ ਸੰਗਠਿਤ ਅਪਰਾਧ ਦਾ ਹਿੱਸਾ ਸੀ ਅਤੇ ਇੱਥੋਂ ਤਿਆਰ ਹੋਣ ਵਾਲਾ ਨਸ਼ਾ ਸਮਾਜ ਲਈ ਬਹੁਤ ਵੱਡਾ ਖਤਰਾ ਪੈਦਾ ਕਰ ਰਿਹਾ ਸੀ। ਇਸ ਮੁਹਿੰਮ ਵਿੱਚ ਆਰਸੀਐਮਪੀ ਦੇ ਵਿਸ਼ੇਸ਼ ਯੂਨਿਟਾਂ ਅਤੇ ਸਹਿਯੋਗੀ ਏਜੰਸੀਆਂ ਨੇ ਅਹਿਮ ਭੂਮਿਕਾ ਨਿਭਾਈ ਹੈ।
ਬਰਾਮਦ ਕੀਤੇ ਗਏ ਨਸ਼ੀਲੇ ਪਦਾਰਥਾਂ ਵਿੱਚ 39.31 ਕਿਲੋਗ੍ਰਾਮ ਫੈਂਟਾਨਿਲ ਅਤੇ ਇਸ ਦੇ ਵੱਖ-ਵੱਖ ਮਿਸ਼ਰਣ ਸ਼ਾਮਲ ਹਨ, ਜੋ ਕਿ ਲਗਭਗ 391,100 ਖੁਰਾਕਾਂ ਦੇ ਬਰਾਬਰ ਮੰਨੇ ਜਾਂਦੇ ਹਨ। ਇਸ ਤੋਂ ਇਲਾਵਾ 43.09 ਕਿਲੋਗ੍ਰਾਮ ਮਿਥਾਈਲ-ਮੈਥਕੈਥੀਨੋਨ, 2.9 ਕਿਲੋਗ੍ਰਾਮ ਮੈਥਾਮਫੇਟਾਮਾਈਨ ਅਤੇ 3.96 ਕਿਲੋਗ੍ਰਾਮ ਐਮਡੀਐਮਏ (MDMA) ਦੇ ਨਾਲ 3,766 ਨਸ਼ੀਲੀਆਂ ਗੋਲੀਆਂ ਵੀ ਮਿਲੀਆਂ ਹਨ। ਜਾਂਚ ਦੌਰਾਨ 5,000 ਕਿਲੋਗ੍ਰਾਮ ਤੋਂ ਵੱਧ ਅਜਿਹੇ ਕੈਮੀਕਲ ਵੀ ਜ਼ਬਤ ਕੀਤੇ ਗਏ ਹਨ ਜੋ ਨਸ਼ਾ ਤਿਆਰ ਕਰਨ ਲਈ ਵਰਤੇ ਜਾਂਦੇ ਸਨ। ਲੈਬ ਵਿੱਚੋਂ ਮਸ਼ੀਨਾਂ, ਕੱਚ ਦੇ ਭਾਂਡੇ, ਮਿਕਸਰ ਅਤੇ ਗੋਲੀਆਂ ਬਣਾਉਣ ਵਾਲੀ ਪ੍ਰੈਸ ਵਰਗਾ ਆਧੁਨਿਕ ਸਾਮਾਨ ਬਰਾਮਦ ਹੋਇਆ ਹੈ। ਨਵੰਬਰ ਵਿੱਚ ਪੁਲਿਸ ਨੇ 50.47 ਕਿਲੋਗ੍ਰਾਮ ਹੋਰ ਫੈਂਟਾਨਿਲ ਵੀ ਜ਼ਬਤ ਕੀਤੀ ਸੀ।
ਇਸ ਮਾਮਲੇ ਵਿੱਚ ਪੁਲਿਸ ਨੇ ਦੋ ਵਿਅਕਤੀਆਂ, 35 ਸਾਲਾ ਜਸਟਿਨ ਫੌਥ ਅਤੇ 37 ਸਾਲਾ ਕਾਰਲੋਸ ਮਾਰਟੀਨੇਜ਼ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। 3 ਅਕਤੂਬਰ ਨੂੰ ਕੈਨੇਡਾ ਦੀ ਪਬਲਿਕ ਪ੍ਰੌਸੀਕਿਊਸ਼ਨ ਸਰਵਿਸ ਨੇ ਦੋਵਾਂ ਵਿਰੁੱਧ ਨਸ਼ੀਲੇ ਪਦਾਰਥਾਂ ਦੇ ਉਤਪਾਦਨ ਅਤੇ ਤਸਕਰੀ ਦੇ ਦੋਸ਼ਾਂ ਤਹਿਤ ਕਾਨੂੰਨੀ ਕਾਰਵਾਈ ਨੂੰ ਹਰੀ ਝੰਡੀ ਦੇ ਦਿੱਤੀ ਸੀ। ਆਰਸੀਐਮਪੀ ਅਨੁਸਾਰ ਦੋਵੇਂ ਮੁਲਜ਼ਮ ਇਸ ਸਮੇਂ ਹਿਰਾਸਤ ਵਿੱਚ ਹਨ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅਜਿਹੀਆਂ ਕਾਰਵਾਈਆਂ ਰਾਹੀਂ ਨਸ਼ਾ ਤਸਕਰਾਂ ਦੇ ਨੈੱਟਵਰਕ ਨੂੰ ਤੋੜਨਾ ਉਹਨਾਂ ਦੀ ਮੁੱਖ ਤਰਜੀਹ ਹੈ ਤਾਂ ਜੋ ਕਮਿਊਨਿਟੀ ਨੂੰ ਨਸ਼ਿਆਂ ਦੀ ਮਾਰ ਤੋਂ ਬਚਾਇਆ ਜਾ ਸਕੇ।
ਇੰਨੀ ਵੱਡੀ ਪੱਧਰ ‘ਤੇ ਚੱਲ ਰਹੀ ਡਰੱਗ ਲੈਬ ਨੂੰ ਸਾਫ਼ ਕਰਨਾ ਬਹੁਤ ਹੀ ਜੋਖਮ ਭਰਿਆ ਕੰਮ ਸੀ। ਇਸ ਲਈ ਹੈਲਥ ਕੈਨੇਡਾ ਦੇ ਕੈਮਿਸਟਾਂ ਅਤੇ ਆਰਸੀਐਮਪੀ ਦੀ ਕਲੀਅਰ (CLEAR) ਟੀਮ ਦੀ ਮਦਦ ਲਈ ਗਈ ਤਾਂ ਜੋ ਜਾਂਚਕਰਤਾਵਾਂ ਅਤੇ ਆਮ ਜਨਤਾ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾ ਸਕੇ। ਮੌਕੇ ਉੱਤੇ ਇੱਕ ਬਹੁਤ ਹੀ ਖਤਰਨਾਕ ਕੈਮੀਕਲ ਹੋਣ ਕਾਰਨ ਬ੍ਰਿਟਿਸ਼ ਕੋਲੰਬੀਆ ਤੋਂ ਬਾਹਰੋਂ ਮਾਹਿਰਾਂ ਨੂੰ ਸੱਦਣਾ ਪਿਆ। ਇਸ ਪੂਰੀ ਕਾਰਵਾਈ ਅਤੇ ਲੈਬ ਨੂੰ ਨਸ਼ਟ ਕਰਨ ‘ਤੇ ਲੱਖਾਂ ਡਾਲਰਾਂ ਦਾ ਖਰਚਾ ਆਇਆ ਹੈ। ਸੀਐਫਐਸਈਯੂ-ਬੀਸੀ (CFSEU-BC) ਦੇ ਸੁਪਰਡੈਂਟ ਗੈਰੀ ਹਿਆਰ ਨੇ ਕਿਹਾ ਕਿ ਅਜਿਹੇ ਅਪਰਾਧੀ ਸਮਾਜ ਲਈ ਗੰਭੀਰ ਖਤਰਾ ਹਨ ਅਤੇ ਉਹਨਾਂ ਵਿਰੁੱਧ ਸਖ਼ਤ ਕਾਰਵਾਈ ਜਾਰੀ ਰਹੇਗੀ। This report was written by Divroop Kaur as part of the Local Journalism Initiative.