ਸਰੀ, (ਦਿਵਰੂਪ ਕੌਰ): ਸਰੀ ਸ਼ਹਿਰ ਨੇ ਨਿਊਟਨ ਖੇਤਰ ਦੇ ਸਭ ਤੋਂ ਲੋਕਪ੍ਰਿਯ ਕਮਿਊਨਿਟੀ ਪਾਰਕਾਂ ਵਿੱਚੋਂ ਇੱਕ Unwin Park ਦੇ ਭਵਿੱਖ ਲਈ ਲੰਬੇ ਸਮੇਂ ਦੀ ਯੋਜਨਾ ਤਿਆਰ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਸ਼ਹਿਰ ਨਿਵਾਸੀਆਂ ਨੂੰ ਸੱਦਾ ਦੇ ਰਿਹਾ ਹੈ ਕਿ ਉਹ ਆਪਣੇ ਸੁਝਾਅ ਸਾਂਝੇ ਕਰਕੇ ਇਸ ਪਾਰਕ ਨੂੰ ਭਵਿੱਖ ਦੀਆਂ ਲੋੜਾਂ ਅਨੁਸਾਰ ਆਕਾਰ ਦੇਣ ਵਿੱਚ ਯੋਗਦਾਨ ਪਾਉਣ।
ਮੇਅਰ ਬ੍ਰੈਂਡਾ ਲਾਕ ਨੇ ਕਿਹਾ, Unwin Park ਸਾਡੇ ਸਮਾਜ ਦਾ ਮਹੱਤਵਪੂਰਨ ਹਿੱਸਾ ਹੈ। ਇਹ ਕੌਂਸਲ ਨਿਵਾਸੀਆਂ ਦੀਆਂ ਗੱਲਾਂ ਨੂੰ ਧਿਆਨ ਨਾਲ ਸੁਣ ਕੇ ਹੀ ਇਸਦੇ ਭਵਿੱਖ ਦੀ ਯੋਜਨਾ ਤਿਆਰ ਕਰੇਗੀ। ਸਾਡੇ ਪਾਰਕ ਨਿਵਾਸੀਆਂ ਦੀ ਸਰਗਰਮ ਜ਼ਿੰਦਗੀ, ਕਮਿਊਨਿਟੀ ਜੁੜਾਅ ਅਤੇ ਸਮੁੱਚੀ ਭਲਾਈ ਵਿੱਚ ਬਹੁਤ ਮਹੱਤਵ ਰੱਖਦੇ ਹਨ। ਮੈਂ ਹਰ ਕਿਸੇ ਨੂੰ ਬੇਨਤੀ ਕਰਦੀ ਹਾਂ ਕਿ ਆਪਣੇ ਵਿਚਾਰ ਸਾਂਝੇ ਕਰਨ।”
Unwin Park 15 ਹੈਕਟੀਅਰ (36 ਏਕੜ) ਵਿੱਚ ਫੈਲਿਆ ਹੈ ਅਤੇ ਇਸ ਵਿੱਚ ਪਾਣੀ ਵਾਲਾ ਖੇਡ ਖੇਤਰ, ਡੌਗ ਆਫ਼-ਲੀਸ਼ ਇਲਾਕਾ, ਬਾਹਰੀ ਤੈਰਨ ਪੂਲ, ਖੇਡ ਮੈਦਾਨ, ਲੈਕਰਾਸ ਬਾਕਸ, ਗੇਮਜ਼ ਕੋਰਟ ਅਤੇ ਸਰੀ ਦਾ ਸਭ ਤੋਂ ਵੱਡਾ ਇਨਕਲੂਸਿਵ ਪਲੇਅਗ੍ਰਾਊਂਡ ਸ਼ਾਮਲ ਹੈ।
ਨਿਵਾਸੀ ਦੋ ਤਰੀਕਿਆਂ ਨਾਲ ਆਪਣੀ ਰਾਇ ਦੇ ਸਕਦੇ ਹਨ:
ਆਨਲਾਈਨ ਸਰਵੇਖਣ ਭਰਨਾ surrey.ca/unwinpark ਤੇ 7 ਦਸੰਬਰ ਤੱਕ ਖੁੱਲ੍ਹਾ ਰਹੇਗਾ।
ਓਪਨ ਹਾਊਸ ਵਿੱਚ ਹਾਜ਼ਰੀ ਲਗਾਉਣਾ ਨਿਊਟਨ ਰਿਕਰੇਸ਼ਨ ਸੈਂਟਰ ਵਿੱਚ ਹੇਠ ਲਿਖੀਆਂ ਤਰੀਕਾਂ ‘ਤੇ:
ਐਤਵਾਰ, 16 ਨਵੰਬਰ, ਸਵੇਰੇ 10 ਵਜੇ ਤੋਂ ਦੁਪਹਿਰ 1 ਵਜੇ ਤੱਕ
ਵੀਰਵਾਰ, 20 ਨਵੰਬਰ, ਸ਼ਾਮ 3:30 ਵਜੇ ਤੋਂ 6:30 ਵਜੇ ਤੱਕ
ਸਰੀ ਸ਼ਹਿਰ ਵਿੱਚ 800 ਤੋਂ ਵੱਧ ਪਾਰਕ ਹਨ, ਜਿਨ੍ਹਾਂ ਵਿੱਚੋਂ 200 ਤੋਂ ਵੱਧ ਪਾਰਕ ਨਿਵਾਸੀਆਂ ਲਈ ਵੱਖ-ਵੱਖ ਰਿਕਰੇਸ਼ਨਲ ਸਹੂਲਤਾਂ ਮੁਹੱਈਆ ਕਰਦੇ ਹਨ। ਹੋਰ ਪਾਰਕਾਂ ਨੂੰ ਕੁਦਰਤੀ ਖੇਤਰਾਂ ਅਤੇ ਜੈਵ-ਵਿਭਿੰਨਤਾ ਦੀ ਸੁਰੱਖਿਆ ਲਈ ਸਮਰਪਿਤ ਕੀਤਾ ਗਿਆ ਹੈ, ਜੋ ਸਰੀ ਦੇ ਹਰੇ-ਭਰੇ ਢਾਂਚੇ ਦਾ ਮਹੱਤਵਪੂਰਨ ਹਿੱਸਾ ਹੈ।
ਸ਼ਹਿਰ ਦਾ ਕਹਿਣਾ ਹੈ ਕਿ ਨਿਵਾਸੀਆਂ ਦੀ ਭਾਗੀਦਾਰੀ ਨਾਲ Unwin Park ਨੂੰ ਇੱਕ ਐਸੀ ਜਗ੍ਹਾ ਬਣਾਇਆ ਜਾ ਸਕਦਾ ਹੈ ਜੋ ਅੱਜ ਦੀਆਂ ਅਤੇ ਭਵਿੱਖ ਦੀਆਂ ਦੋਨੋਂ ਪੀੜ੍ਹੀਆਂ ਦੀਆਂ ਲੋੜਾਂ ਨੂੰ ਪੂਰਾ ਕਰੇ।