ਸਟੇਡੀਅਮ-ਚਾਈਨਾਟਾਊਨ ਸਟੇਸ਼ਨ ’ਤੇ ਨਵੀਂ ਐਲੀਵੇਟਰ ਸ਼ੁਰੂ, ਟ੍ਰਾਂਸਲਿੰਕ ਵੱਲੋਂ ਸਹੂਲਤਾਂ ਦਾ ਆਧੁਨਿਕੀਕਰਨ

ਸਰੀ, (ਦਿਵਰੂਪ ਕੌਰ): ਸਟੇਡੀਅਮ-ਚਾਈਨਾਟਾਊਨ ਸਟੇਸ਼ਨ ‘ਤੇ ਇੱਕ ਨਵੀਂ ਐਲੀਵੇਟਰ ਹੁਣ ਆਮ ਲੋਕਾਂ ਲਈ ਖੋਲ੍ਹ ਦਿੱਤੀ ਗਈ ਹੈ। ਟ੍ਰਾਂਸਲਿੰਕ ਵੱਲੋਂ ਐਕਸਪੋ ਲਾਈਨ ਦੇ ਅਸਲ ਬੁਨਿਆਦੀ ਢਾਂਚੇ ਦੇ ਆਧੁਨਿਕੀਕਰਨ ਅਤੇ ਪਹੁੰਚਯੋਗਤਾ ਨੂੰ ਤਰਜੀਹ ਦੇਣ ਦੇ ਉਦੇਸ਼ ਨਾਲ ਇਹ ਅਹਿਮ ਕਦਮ ਚੁੱਕਿਆ ਗਿਆ ਹੈ। ਇਹ ਨਵੀਂ ਅਤੇ ਉੱਚ ਸਮਰੱਥਾ ਵਾਲੀ ਐਲੀਵੇਟਰ ਸਕਾਈਟ੍ਰੇਨ ਦੇ ਮੁਸਾਫਰਾਂ ਲਈ ਪਹਿਲਾਂ ਦੇ ਮੁਕਾਬਲੇ 20 ਪ੍ਰਤੀਸ਼ਤ ਜ਼ਿਆਦਾ ਜਗ੍ਹਾ ਪ੍ਰਦਾਨ ਕਰਦੀ ਹੈ। ਇਹ ਸੁਧਾਰ ਟ੍ਰਾਂਸਲਿੰਕ ਦੀ ਉਸ ਮੁਹਿੰਮ ਦਾ ਹਿੱਸਾ ਹੈ ਜਿਸ ਤਹਿਤ ਪੂਰੇ ਨੈੱਟਵਰਕ ਵਿੱਚ ਮੁਸਾਫਰਾਂ ਦੇ ਸਫਰ ਨੂੰ ਵਧੇਰੇ ਸੁਖਾਲਾ ਅਤੇ ਸੁਰੱਖਿਅਤ ਬਣਾਉਣ ਲਈ ਪੁਰਾਣੀਆਂ ਸਹੂਲਤਾਂ ਨੂੰ ਅਪਗ੍ਰੇਡ ਕੀਤਾ ਜਾ ਰਹੀਆਂ ਹਨ। ਐਕਸਪੋ ਲਾਈਨ ਐਲੀਵੇਟਰ ਰਿਪਲੇਸਮੈਂਟ ਪ੍ਰੋਗਰਾਮ ਦੇ ਤਹਿਤ 15 ਸਟੇਸ਼ਨਾਂ ‘ਤੇ 21 ਪੁਰਾਣੀਆਂ ਐਲੀਵੇਟਰਾਂ ਨੂੰ ਬਦਲਿਆ ਜਾ ਰਿਹਾ ਹੈ। ਇਸ ਵਿਆਪਕ ਪ੍ਰੋਜੈਕਟ ਦੇ ਮੁਕੰਮਲ ਹੋਣ ਤੋਂ ਬਾਅਦ ਐਕਸਪੋ ਲਾਈਨ ਦੀਆਂ ਸਾਰੀਆਂ ਪੁਰਾਣੀਆਂ ਲਿਫਟਾਂ ਨੂੰ ਵਧੇਰੇ ਆਧੁਨਿਕ ਅਤੇ ਵਿਸ਼ਾਲ ਲਿਫਟਾਂ ਨਾਲ ਬਦਲ ਦਿੱਤਾ ਜਾਵੇਗਾ। ਇਨ੍ਹਾਂ ਨਵੀਆਂ ਐਲੀਵੇਟਰਾਂ ਨੂੰ ਖਾਸ ਤੌਰ ‘ਤੇ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ ਤਾਂ ਜੋ ਹਰ ਵਰਗ ਦੇ ਮੁਸਾਫਰਾਂ ਲਈ ਸਿਸਟਮ ਦੀ ਵਰਤੋਂ ਕਰਨਾ ਆਸਾਨ ਹੋ ਸਕੇ। ਇਨ੍ਹਾਂ ਵਿੱਚ ਮੋਬਿਲਿਟੀ ਡਿਵਾਈਸਾਂ, ਸਟ੍ਰੋਲਰਾਂ, ਸਾਈਕਲਾਂ ਅਤੇ ਭਾਰੀ ਸਮਾਨ ਦੇ ਨਾਲ ਚੱਲਣ ਵਾਲੇ ਲੋਕਾਂ ਲਈ ਕਾਫੀ ਜਗ੍ਹਾ ਮੁਹੱਈਆ ਕਰਵਾਈ ਗਈ ਹੈ ਤਾਂ ਜੋ ਉਹ ਸਟੇਸ਼ਨਾਂ ਦੇ ਅੰਦਰ ਆਸਾਨੀ ਨਾਲ ਆ-ਜਾ ਸਕਣ। ਨਵੀਂਆਂ ਐਲੀਵੇਟਰਾਂ ਦੀਆਂ ਵਿਸ਼ੇਸ਼ਤਾਵਾਂ ਬਾਰੇ ਜਾਣਕਾਰੀ ਦਿੰਦਿਆਂ ਟ੍ਰਾਂਸਲਿੰਕ ਨੇ ਦੱਸਿਆ ਕਿ ਇਹ ਨਾ ਸਿਰਫ਼ ਵੱਡੀਆਂ ਹਨ ਸਗੋਂ ਪਹਿਲਾਂ ਨਾਲੋਂ ਵਧੇਰੇ ਭਰੋਸੇਮੰਦ ਵੀ ਹਨ। ਇਨ੍ਹਾਂ ਦੇ ਰੱਖ-ਰਖਾਅ ਲਈ ਲੱਗਣ ਵਾਲਾ ਸਮਾਂ ਹੁਣ ਕਾਫੀ ਘੱਟ ਹੋਵੇਗਾ ਜਿਸ ਨਾਲ ਮੁਸਾਫਰਾਂ ਦੀ ਆਵਾਜਾਈ ‘ਤੇ ਘੱਟ ਅਸਰ ਪਵੇਗਾ। ਅਕਸਰ ਦੇਖਿਆ ਜਾਂਦਾ ਸੀ ਕਿ ਗਰਮ ਮੌਸਮ ਦੌਰਾਨ ਤਕਨੀਕੀ ਖਰਾਬੀ ਕਾਰਨ ਲਿਫਟਾਂ ਬੰਦ ਹੋ ਜਾਂਦੀਆਂ ਸਨ ਪਰ ਇਹ ਨਵੀਂਆਂ ਲਿਫਟਾਂ ਗਰਮੀ ਪ੍ਰਤੀ ਵਧੇਰੇ ਸਹਿਣਸ਼ੀਲ ਹਨ ਜਿਸ ਕਾਰਨ ਅਚਾਨਕ ਖਰਾਬ ਹੋਣ ਦੀਆਂ ਘਟਨਾਵਾਂ ਵਿੱਚ ਵੱਡੀ ਕਮੀ ਆਵੇਗੀ। ਪ੍ਰੋਜੈਕਟ ਦੀ ਮੌਜੂਦਾ ਸਥਿਤੀ ਬਾਰੇ ਗੱਲ ਕਰਦਿਆਂ ਦੱਸਿਆ ਗਿਆ ਕਿ ਵਾਟਰਫਰੰਟ ਸਟੇਸ਼ਨ ‘ਤੇ ਐਲੀਵੇਟਰ ਬਦਲਣ ਦਾ ਕੰਮ 24 ਅਪ੍ਰੈਲ ਨੂੰ ਸਫਲਤਾਪੂਰਵਕ ਮੁਕੰਮਲ ਹੋ ਗਿਆ ਸੀ। ਇਸ ਤੋਂ ਇਲਾਵਾ 22nd ਸਟਰੀਟ ਅਤੇ ਨਾਨਾਈਮੋ ਸਟੇਸ਼ਨਾਂ ‘ਤੇ ਵੀ ਨਵੀਨੀਕਰਨ ਦਾ ਕੰਮ ਪੂਰਾ ਹੋ ਚੁੱਕਾ ਹੈ। ਪ੍ਰੋਜੈਕਟ ਦੇ ਸ਼ੁਰੂ ਹੋਣ ਤੋਂ ਬਾਅਦ ਹੁਣ ਤੱਕ ਪੂਰੇ ਸਿਸਟਮ ਵਿੱਚ ਕੁੱਲ 6 ਨਵੀਆਂ ਐਲੀਵੇਟਰਾਂ ਸਥਾਪਤ ਕੀਤੀਆਂ ਜਾ ਚੁੱਕੀਆਂ ਹਨ। ਮੌਜੂਦਾ ਸਮੇਂ ਵਿੱਚ ਐਡਮੰਡਸ ਅਤੇ ਸਕਾਟ ਰੋਡ ਸਟੇਸ਼ਨਾਂ ‘ਤੇ ਬਦਲਣ ਦਾ ਕੰਮ ਤੇਜ਼ੀ ਨਾਲ ਜਾਰੀ ਹੈ ਅਤੇ ਉਮੀਦ ਜਤਾਈ ਜਾ ਰਹੀ ਹੈ ਕਿ ਜੂਨ ਦੇ ਸ਼ੁਰੂ ਵਿੱਚ ਇਨ੍ਹਾਂ ਸਟੇਸ਼ਨਾਂ ‘ਤੇ ਵੀ ਨਵੀਂਆਂ ਲਿਫਟਾਂ ਲੋਕਾਂ ਲਈ ਖੋਲ੍ਹ ਦਿੱਤੀਆਂ ਜਾਣਗੀਆਂ। ਇਹ ਸੁਧਾਰ ਆਉਣ ਵਾਲੇ ਸਮੇਂ ਵਿੱਚ ਜਨਤਕ ਟ੍ਰਾਂਸਪੋਰਟ ਸਿਸਟਮ ਨੂੰ ਵਧੇਰੇ ਪਹੁੰਚਯੋਗ ਅਤੇ ਆਧੁਨਿਕ ਬਣਾਉਣ ਵਿੱਚ ਅਹਿਮ ਸਾਬਤ ਹੋਣਗੇ। This report was written by Divroop Kaur as part of the Local Journalism Initiative.