ਵਰਲਡ ਕੱਪ 2026: ਟੋਰਾਂਟੋ ਫੈਨ ਫੈਸਟੀਵਲ ਦੀਆਂ 2,20,000 ਟਿਕਟਾਂ 1 ਘੰਟੇ ‘ਚ ਹੋਈਆਂ ਬੁੱਕ

ਸਰੀ, (ਦਿਵਰੂਪ ਕੌਰ): ਟੋਰਾਂਟੋ ਵਿੱਚ ਫੀਫਾ ਵਰਲਡ ਕੱਪ 2026 ਨੂੰ ਲੈ ਕੇ ਉਤਸ਼ਾਹ ਆਪਣੀ ਚਰਮ ਸੀਮਾ ‘ਤੇ ਦੇਖਣ ਨੂੰ ਮਿਲ ਰਿਹਾ ਹੈ। ਸ਼ਹਿਰ ਪ੍ਰਸ਼ਾਸਨ ਵੱਲੋਂ ਬੁੱਧਵਾਰ ਨੂੰ ਜਾਰੀ ਕੀਤੇ ਗਏ ਅਧਿਕਾਰਤ ਬਿਆਨ ਅਨੁਸਾਰ ‘ਫੀਫਾ ਫੈਨ ਫੈਸਟੀਵਲ ਟੋਰਾਂਟੋ’ ਲਈ ਮੁਫਤ ਟਿਕਟਾਂ ਦੀ ਮੰਗ ਇੰਨੀ ਜ਼ਿਆਦਾ ਰਹੀ ਕਿ ਰਜਿਸਟ੍ਰੇਸ਼ਨ ਪੋਰਟਲ ਖੁੱਲ੍ਹਣ ਦੇ ਮਹਿਜ਼ 4 ਘੰਟਿਆਂ ਦੇ ਅੰਦਰ ਹੀ ਪਹਿਲੇ ਪੜਾਅ ਦੀਆਂ ਸਾਰੀਆਂ ਟਿਕਟਾਂ ਬੁੱਕ ਹੋ ਗਈਆਂ। ਫੀਫਾ ਵਰਲਡ ਕੱਪ 2026 ਟੋਰਾਂਟੋ ਸਕੱਤਰੇਤ ਦੀ ਕਾਰਜਕਾਰੀ ਨਿਰਦੇਸ਼ਕ ਸ਼ੈਰਨ ਬੋਲਨਬਾਚ ਨੇ ਦੱਸਿਆ ਕਿ ਆਨਲਾਈਨ ਪੋਰਟਲ ਲਾਂਚ ਹੋਣ ਦੇ ਕੁਝ ਹੀ ਸਮੇਂ ਬਾਅਦ 2,20,000 ਜਨਰਲ ਐਡਮਿਸ਼ਨ ਟਿਕਟਾਂ ਪ੍ਰਸ਼ੰਸਕਾਂ ਦੁਆਰਾ ਹਾਸਲ ਕਰ ਲਈਆਂ ਗਈਆਂ ਹਨ।
ਸ਼ੈਰਨ ਬੋਲਨਬਾਚ ਨੇ ਇਸ ਭਰਵੇਂ ਹੁੰਗਾਰੇ ‘ਤੇ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਇਹ ਉਤਸ਼ਾਹ ਉਸ ਜਜ਼ਬੇ ਨੂੰ ਦਰਸਾਉਂਦਾ ਹੈ ਜਿਸ ਨਾਲ ਟੋਰਾਂਟੋ ਦੁਨੀਆ ਦਾ ਸਵਾਗਤ ਕਰਨ ਅਤੇ ਆਪਣੇ ‘ਵਰਲਡ ਇਨ ਏ ਸਿਟੀ’ ਦੇ ਸੰਕਲਪ ਨੂੰ ਮਨਾਉਣ ਲਈ ਤਿਆਰ ਹੋ ਰਿਹਾ ਹੈ। ਸ਼ਹਿਰ ਦੇ ਅਧਿਕਾਰੀਆਂ ਅਨੁਸਾਰ ਟਿਕਟਾਂ ਦੀ ਮੰਗ ਉਮੀਦ ਨਾਲੋਂ ਕਿਤੇ ਵੱਧ ਰਹੀ ਹੈ। ਹਾਲਾਂਕਿ ਜਨਰਲ ਐਡਮਿਸ਼ਨ ਦੀਆਂ ਮੁਫਤ ਟਿਕਟਾਂ ਦਾ ਪਹਿਲਾ ਸਟਾਕ ਖਤਮ ਹੋ ਚੁੱਕਾ ਹੈ ਪਰ ਪ੍ਰੀਮੀਅਮ ਟਿਕਟਾਂ ਦੇ ਵਿਕਲਪ ਅਜੇ ਵੀ ਆਨਲਾਈਨ ਖਰੀਦ ਲਈ ਉਪਲਬਧ ਹਨ। ਜਿਨ੍ਹਾਂ ਲੋਕਾਂ ਨੇ ਸਫਲਤਾਪੂਰਵਕ ਆਪਣੀਆਂ ਟਿਕਟਾਂ ਸੁਰੱਖਿਅਤ ਕਰ ਲਈਆਂ ਹਨ ਉਨ੍ਹਾਂ ਨੂੰ 15 ਮਈ ਨੂੰ ਇੱਕ ਬਾਰਕੋਡ ਵਾਲੀ ਪੁਸ਼ਟੀ ਭੇਜੀ ਜਾਵੇਗੀ।
ਜਿਹੜੇ ਪ੍ਰਸ਼ੰਸਕ ਪਹਿਲੇ ਗੇੜ ਵਿੱਚ ਟਿਕਟਾਂ ਹਾਸਲ ਕਰਨ ਤੋਂ ਵਾਂਝੇ ਰਹਿ ਗਏ ਹਨ ਉਨ੍ਹਾਂ ਲਈ ਅਜੇ ਵੀ ਮੌਕਾ ਬਾਕੀ ਹੈ। ਸ਼ਹਿਰ ਪ੍ਰਸ਼ਾਸਨ ਨੇ ਐਲਾਨ ਕੀਤਾ ਹੈ ਕਿ ਪੂਰੇ ਟੂਰਨਾਮੈਂਟ ਦੌਰਾਨ ਵੱਖ-ਵੱਖ ਪੜਾਵਾਂ ਵਿੱਚ ਹੋਰ ਮੁਫਤ ਟਿਕਟਾਂ ਜਾਰੀ ਕੀਤੀਆਂ ਜਾਣਗੀਆਂ। ਟਿਕਟਾਂ ਦੀ ਅਗਲੀ ਕਿਸ਼ਤ 15 ਮਈ ਨੂੰ ਸਵੇਰੇ 10 ਵਜੇ (ਈਐਸਟੀ) ਜਾਰੀ ਕੀਤੀ ਜਾਵੇਗੀ। ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਸਮੇਂ ਸਿਰ ਅਧਿਕਾਰਤ ਵੈੱਬਸਾਈਟ ‘ਤੇ ਜਾ ਕੇ ਆਪਣੀ ਜਗ੍ਹਾ ਪੱਕੀ ਕਰਨ। ਇਹ ਇਵੈਂਟ ਹਰ ਉਮਰ ਦੇ ਲੋਕਾਂ ਲਈ ਖੁੱਲ੍ਹਾ ਹੈ ਅਤੇ ਭਾਵੇਂ ਦਾਖਲਾ ਮੁਫਤ ਹੈ ਪਰ ਸੁਰੱਖਿਆ ਪ੍ਰਬੰਧਾਂ ਕਾਰਨ ਪਹਿਲਾਂ ਤੋਂ ਬੁਕਿੰਗ ਕਰਵਾਉਣੀ ਲਾਜ਼ਮੀ ਹੈ।
ਫੀਫਾ ਫੈਨ ਫੈਸਟੀਵਲ ਟੋਰਾਂਟੋ 11 ਜੂਨ ਤੋਂ 19 ਜੁਲਾਈ ਤੱਕ ਚੱਲੇਗਾ। ਇਸ ਸ਼ਾਨਦਾਰ ਆਯੋਜਨ ਵਿੱਚ ਮੈਚਾਂ ਦਾ ਲਾਈਵ ਪ੍ਰਸਾਰਣ, ਮਨੋਰੰਜਨ ਦੇ ਪ੍ਰੋਗਰਾਮ ਅਤੇ ਕਈ ਤਰ੍ਹਾਂ ਦੇ ਇੰਟਰਐਕਟਿਵ ਅਨੁਭਵ ਸ਼ਾਮਲ ਹੋਣਗੇ। ਖਾਣ-ਪੀਣ ਦੇ ਸ਼ੌਕੀਨਾਂ ਲਈ 30 ਤੋਂ ਵੱਧ ਫੂਡ ਵੈਂਡਰ ਅੰਤਰਰਾਸ਼ਟਰੀ ਪਕਵਾਨ ਪਰੋਸਣਗੇ ਜੋ ਸ਼ਹਿਰ ਦੀ ਸੱਭਿਆਚਾਰਕ ਵਿਭਿੰਨਤਾ ਨੂੰ ਦਰਸਾਉਣਗੇ। ਵਰਲਡ ਕੱਪ ਖੇਡਾਂ ਦੇ ਨੇੜੇ ਆਉਣ ‘ਤੇ ਹੋਰ ਵਿਸ਼ੇਸ਼ ਪ੍ਰੋਗਰਾਮਾਂ ਅਤੇ ਕਲਾਕਾਰਾਂ ਦੇ ਨਾਵਾਂ ਦਾ ਐਲਾਨ ਕੀਤਾ ਜਾਵੇਗਾ। ਸਿਟੀ ਅਧਿਕਾਰੀ ਪੂਰੀ ਕੋਸ਼ਿਸ਼ ਕਰ ਰਹੇ ਹਨ ਕਿ ਵੱਧ ਤੋਂ ਵੱਧ ਲੋਕਾਂ ਨੂੰ ਇਸ ਜਸ਼ਨ ਦਾ ਹਿੱਸਾ ਬਣਾਇਆ ਜਾ ਸਕੇ। This report was written by Divroop Kaur as part of the Local Journalism Initiative.