ਤਕਰਾਰ ਵਿੱਚ

ਲੁੱਟ ਲੈ ਹੱਸ ਕੇ ਨਜ਼ਾਰੇ,
ਰੰਗਲੇ ਸੰਸਾਰ ਵਿੱਚ।
ਰੁੱਸਿਆਂ ਮਿਲਦਾ ਨਹੀਂ ਕੁਝ,
ਨਾ ਹੀ ਮਿਲੇ ਤਕਰਾਰ ਵਿੱਚ।
ਈਰਖਾ ਫਲ਼ਦੀ ਸੁਣੀ ਨਾ,
ਉਗਲਣੀ ਛੱਡ ਜ਼ਹਿਰ ਹੁਣ।
ਫੁੱਲਿਆ ਮੁੱਖ ਸ਼ੋਭਦਾ ਨਾ,
ਘਰ ਅਤੇ ਪਰਿਵਾਰ ਵਿੱਚ।
ਠੋਕਰਾਂ ਵਿੱਚ ਰੋਲ਼ ਦੇਵੇਂ,
ਰਿਸ਼ਤਿਆਂ ਦੇ ਨਿੱਘ ਨੂੰ।
ਜਾਪਦਾ ਫਿਰ ਡੁੱਬਿਆ ਤੂੰ,
ਸੱਜਣਾ ਹੰਕਾਰ ਵਿੱਚ।
ਬਦਲਣੀ ਤਾਸੀਰ ਸੀ ਤੇ,
ਬਦਲ ਜਾਣੀ ਸੀ ਫਿਜ਼ਾ।
ਰੱਖਦਾ ਜੇਕਰ ਭਰੋਸਾ,
ਯਾਰ ਜੇ ਦਿਲਦਾਰ ਵਿੱਚ।
ਸਿੱਖ ਲਈ ਬੋਲੀ ਜਦੋਂ ਤੂੰ,
ਜੋੜਨਾ ਦੱਸਦੀ ਹੈ ਜੋ।
ਦੇਖ ਲਈਂ ਸਿਰ ਝੁਕਣਗੇ ਫਿਰ,
ਅਦਬ ਤੇ ਸਤਿਕਾਰ ਵਿੱਚ।
ਲੁੱਟ ਲੈ ਹੱਸ ਕੇ ਨਜ਼ਾਰੇ,
ਰੰਗਲੇ ਸੰਸਾਰ ਵਿੱਚ।
ਰੁੱਸਿਆਂ ਮਿਲਦਾ ਨਹੀਂ ਕੁਝ,
ਨਾ ਹੀ ਮਿਲੇ ਤਕਰਾਰ ਵਿੱਚ।
ਲੇਖਕ : ਵਿਸ਼ਵਿੰਦਰ ਰਾਮਪੁਰ
ਸੰਪਰਕ: 88722-01201