ਲੁੱਟ ਸਿਰਫ਼ ਧਨ ਦੀ ਨਹੀਂ ਹੁੰਦੀ
ਲੁੱਟ ਮਨ ਦੀ ਵੀ ਹੁੰਦੀ ਹੈ
ਲੁੱਟ ਤਨ ਦੀ ਵੀ ਹੁੰਦੀ ਹੈ
ਲੁੱਟਣ ਵਾਲੇ ਕੋਲ ਐਸਾ ਔਜ਼ਾਰ ਹੁੰਦੈ
ਜੋ ਸੱਤਾ ਦੀ ਭੱਠੀ ’ਚ ਘੜ ਹੁੰਦੈ
ਲੋਭ ਦੀ ਚੱਕੀ ਵਿੱਚ ਪਿਸਦੇ ਨੇ
ਸਿੰਜੇ, ਸਵਾਰੇ ਮਿਹਨਤ ਦੇ ਦਾਣੇ
ਪੂੰਜੀ ਦੀ ਹਵਸ ਡੀਕ ਲੈਂਦੀ
ਲਿਆਕਤ ਦਾ ਸਾਗਰ
ਚੌਧਰ ਦੀ ਭੁੱਖ
ਜਦ ਜਿਲਦ ਬਣਦੀ ਮੁਨਾਫ਼ੇ ਦੀ
ਤਾਂ ਬਿਜਲੀ ਧਰਤ ’ਤੇ ਗਿਰਦੀ
ਅੱਖਰ ਬਾਗ਼ੀ ਹੋ ਜਾਂਦੇ
ਪਸੀਨੇ ’ਚੋਂ ਸੂਰਜ ਮੱਘਦੇ
ਬੰਜਰ ਰਾਹਾਂ ’ਚ ਮੌਲਦੀ
ਹੱਕ ਦੀ ਆਵਾਜ਼
ਅਨੇਕਤਾ ਵਿੱਚ ਏਕਤਾ
ਏਕਤਾ ਵਿੱਚ ਸ਼ਕਤੀ
ਸੂਹੇ ਰੰਗ ਦੀ ਮੁਹੱਬਤ
ਫਲਸਫ਼ੇ ਨਾਲ ਕਰਾਰ ਕਰ
ਆਪਣੀ ਹੋਂਦ ਦਾ ਹਿਸਾਬ ਮੰਗਦੀ
ਕਿਸੇ ਕਿਤਾਬ ਦੇ ਵਰਕੇ ਬਣ
ਇੱਕ ਇਤਿਹਾਸ ਲਿਖ ਜਾਂਦੀ
ਰੰਗ ਬਦਲਣ ਲੱਗਿਆਂ ਦੇਰ ਨਹੀਂ ਲਗਦੀ
ਦਨਿ ਦਾ ਨਾਮਕਰਣ ਹੋ ਜਾਂਦੈ
ਹਿੰਦਸੇ ਵਿੱਚ ਛੁਪਿਆ ਅਰਥ
ਇੱਕ ਮਈ ਆਖਰ ਮਜ਼ਦੂਰ ਦਿਵਸ ਹੁੰਦੈ
ਲੇਖਕ : ਅਰਵਿੰਦਰ ਕਾਕੜਾ