ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਘਟਨ ਨਾਲ ਕੈਂਪਸਾਂ ਦੇ ਖਰਚੇ ਵਿੱਚ $752 ਮਿਲੀਅਨ ਦੀ ਆਈ ਗਿਰਾਵਟ
ਸਰੀ (ਦਿਵਰੂਪ ਕੌਰ): ਓਨਟਾਰੀਓ ਦੇ ਕਾਲਜ ਅਤੇ ਯੂਨੀਵਰਸਿਟੀਆਂ ਵਿੱਚ ਵੱਡੇ ਬਦਲਾਅ ਹੋ ਰਹੇ ਹਨ ਕਿਉਂਕਿ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ‘ਤੇ ਔਟਵਾ ਦੀ ਪਾਬੰਦੀ ਅਤੇ ਸੂਬੇ ਦੀ ਵਿੱਤੀ ਸਹਾਇਤਾ ਘਟਣ ਨਾਲ ਸਿੱਖਿਆ ਸੰਸਥਾਵਾਂ ਨੂੰ ਆਪਣੇ ਖਰਚੇ ਸੰਭਾਲਣ ਲਈ ਕਈ ਤਬਦੀਲੀਆਂ ਅਤੇ ਬਦਲਾਅ ਕਰਨ ਪਏ ਹਨ।
ਟਰਾਂਟੋ ਵਿੱਚ ਸਥਿਤ ਸੈਂਟੇਨਿਅਲ ਕਾਲਜ ਨੇ ਘੋਸ਼ਣਾ ਕੀਤੀ ਹੈ ਕਿ ਉਹ 2025 ਦੇ ਗਰਮੀ ਅਤੇ ਪਤਝੜ ਦੇ ਸੈਮੇਸਟਰਾਂ ਅਤੇ 2026 ਦੇ ਸੈਮੇਸਟਰ ਲਈ 49 ਫੁੱਲ-ਟਾਈਮ ਪ੍ਰੋਗਰਾਮਾਂ ਵਿੱਚ ਨਵੇਂ ਦਾਖਲਿਆਂ ਨੂੰ ਰੋਕ ਰਿਹਾ ਹੈ। ਇਸ ਵਿੱਚ ਜਰਨਲਿਜ਼ਮ, ਫਾਈਨੈਂਸ਼ਲ ਪਲੈਨਿੰਗ, ਟੈਕਨਾਲੋਜੀ ਫਾਉਂਡੇਸ਼ਨਜ਼ ਅਤੇ ਕਮਿਊਨਟੀ ਡਿਵੈਲਪਮੈਂਟ ਵਰਗੇ ਪ੍ਰੋਗਰਾਮ ਸ਼ਾਮਲ ਹਨ।
ਸੈਂਟੇਨਿਅਲ ਕਾਲਜ ਦੇ ਪ੍ਰਧਾਨ ਅਤੇ ਸੀਈਓ ਕ੍ਰੇਗ ਸਟੀਫਨਸਨ ਨੇ ਕਿਹਾ ਕਿ ਇਸ ਫੈਸਲੇ ਨਾਲ ਸਬੰਧਤ ਪ੍ਰੋਗਰਾਮਾਂ ਵਿੱਚ ਪਹਿਲਾਂ ਹੀ ਦਾਖਲਾ ਲੈ ਚੁੱਕੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੇ ਗ੍ਰੈਜੂਏਸ਼ਨ ਤੱਕ ਪੂਰੀ ਸਹਾਇਤਾ ਮਿਲੇਗੀ। ਉਨ੍ਹਾਂ ਨੇ ਕਿਹਾ, ”ਅਸੀਂ ਇਹ ਸਾਰੇ ਕਦਮ ਲੰਬੇ ਸਮੇਂ ਲਈ ਕਾਲਜ ਦੀ ਮਜ਼ਬੂਤੀ ਅਤੇ ਸਥਿਰਤਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਲੈ ਰਹੇ ਹਾਂ। ਪਰ ਇਹਨਾਂ ਬਦਲਾਵਾਂ ਨਾਲ ਸਾਡੀ ਕਮਿਊਨਟੀ, ਫੈਕਲਟੀ ਅਤੇ ਸਟਾਫ਼ ‘ਤੇ ਗਹਿਰਾ ਅਸਰ ਪਵੇਗਾ।”
ਸਟੀਫਨਸਨ ਨੇ ਇਸ ਗੱਲ ਨੂੰ ਸਪੱਸ਼ਟ ਕੀਤਾ ਕਿ 128 ਫੁੱਲ-ਟਾਈਮ ਪ੍ਰੋਗਰਾਮ ਅਜੇ ਵੀ ਨਵੇਂ ਵਿਦਿਆਰਥੀਆਂ ਲਈ ਖੁੱਲ੍ਹੇ ਰਹਿਣਗੇ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਰੋਕੇ ਗਏ ਪ੍ਰੋਗਰਾਮਾਂ ਨੂੰ ਭਵਿੱਖ ਵਿੱਚ ਦੁਬਾਰਾ ਸ਼ੁਰੂ ਕਰਨ ਦੀ ਸੰਭਾਵਨਾ ਬਣੀ ਰਹੇਗੀ।
ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ, ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਸੀਮਤ ਕੀਤੀ ਗਈ ਸੀ ਜਿਸ ਕਾਰਨ ਓਨਟਾਰੀਓ ਦੇ ਕਾਲਜਾਂ ਦੇ ਦਾਖਲਿਆਂ ਵਿੱਚ 50 ਪ੍ਰਤੀਸ਼ਤ ਦੀ ਗਿਰਾਵਟ ਹੋਈ ਹੈ। ਇਸ ਨਾਲ ਸੂਬੇ ਦੇ ਕੈਂਪਸਾਂ ਦੇ ਖਰਚੇ ਵਿੱਚ $752 ਮਿਲੀਅਨ ਦੀ ਗਿਰਾਵਟ ਆਈ ਹੈ।
ਅਲਗੋਂਕੁਇਨ ਕਾਲਜ ਨੇ ਇਸ ਮਹੀਨੇ ਦੱਸਿਆ ਕਿ ਉਹ 2026 ਦੇ ਅਗਸਤ ਤੱਕ ਪਰਥ ਸ਼ਹਿਰ ਵਿੱਚ ਆਪਣੇ ਕੈਂਪਸ ਨੂੰ ਬੰਦ ਕਰ ਦੇਵੇਗਾ। ਪਰਥ ਦੇ ਮੇਅਰ ਜੂਡੀ ਬ੍ਰਾਉਨ ਨੇ ਕਿਹਾ ਕਿ ”ਰੂਰਲ ਇਲਾਕਿਆਂ ਵਿੱਚ ਸਿੱਖਿਆ ਦੇ ਮੌਕੇ ਬਹੁਤ ਜ਼ਰੂਰੀ ਹਨ, ਅਤੇ ਕੈਂਪਸ ਬੰਦ ਹੋਣ ਨਾਲ ਸਥਾਨਕ ਲੋਕਾਂ ਨੂੰ ਭਾਰੀ ਨੁਕਸਾਨ ਹੋਵੇਗਾ।” ਇਸ ਤੋਂ ਬਾਅਦ ਨਵੰਬਰ 2024 ਵਿੱਚ, ਸ਼ੇਰਿਡਨ ਕਾਲਜ ਨੇ 40 ਪ੍ਰੋਗਰਾਮਾਂ ਨੂੰ ਰੋਕ ਦਿੱਤਾ ਸੀ। ਇਸਦੇ ਨਾਲ ਹੀ, ਸੇਨੇਕਾ ਕਾਲਜ ਨੇ ਆਪਣੇ ਮਾਰਖਮ, ਓਨਟਾਰੀਓ, ਕੈਂਪਸ ਨੂੰ ਅਸਥਾਈ ਤੌਰ ‘ਤੇ ਬੰਦ ਕਰਨ ਦਾ ਐਲਾਨ ਕੀਤਾ ਹੈ। ਮੋਹਾਕ ਕਾਲਜ ਨੇ 2025 ਲਈ 20 ਪ੍ਰਤੀਸ਼ਤ ਪ੍ਰਸ਼ਾਸਕੀ ਸਟਾਫ਼ ਨੂੰ ਛੱਡਣ ਅਤੇ 16 ਪ੍ਰੋਗਰਾਮਾਂ ਨੂੰ ਰੱਦ ਕਰਨ ਦਾ ਫੈਸਲਾ ਕੀਤਾ। ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਸੀਮਤ ਕਰਨ ਦੇ ਫੈਸਲੇ ਤੋਂ ਬਾਅਦ ਇਸ ਦਾ ਪ੍ਰਭਾਵ ਹੁਣ ਕੈਨੇਡਾ ਦੇ ਵੱਖ-ਵੱਖ ਕਾਲਜਾਂ ‘ਤੇ ਨਜ਼ਰ ਆਉਣ ਲੱਗਾ ਹੈ।