ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕੀਤੀ ਕਲੋਵਰਡੇਲ ਵਿੱਚ ਚੋਣ ਰੈਲੀ

ਸਰੀ (ਪਰਮਜੀਤ ਸਿੰਘ): ਫੈਡਰਲ ਚੋਣਾਂ 2025 ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ 23 ਅਪ੍ਰੈਲ ਨੂੰ ਕਲੋਵਰਡੇਲ-ਲੈਂਗਲੀ ਸਿਟੀ ਵਿੱਚ ਇੱਕ ਵੱਡੀ ਚੋਣ ਰੈਲੀ ਕੀਤੀ ਅਤੇ ਇਥੇ ਵੱਡੀ ਗਿਣਤੀ ‘ਚ ਪਹੁੰਚੇ ਸਮੱਰਥਕਾਂ ਨੂੰ ਸੰਬੋਧਨ ਕੀਤਾ। ਉਨ੍ਹਾਂ ਨੇ ਲਿਬਰਲ ਉਮੀਦਵਾਰ ਕਾਇਲ ਲੈਚਫੋਰਡ ਦੀ ਮੁਹਿੰਮ ਨੂੰ ਮਜ਼ਬੂਤ ਕਰਨ ਅਤੇ ਸਮਰਥਕਾਂ ਨੂੰ ਜੋੜਨ ਲਈ ਕਲੋਵਰਡੇਲ ਐਗਰੀਪਲੈਕਸ ਵਿੱਚ ਲਗਭਗ 1,500 ਲੋਕਾਂ ਨੂੰ ਸੰਬੋਧਨ ਕੀਤਾ।
ਕਾਇਲ ਲੈਚਫੋਰਡ ਦੇ ਸ਼ੁਰੂਆਤੀ ਭਾਸ਼ਣ ਅਤੇ ਕਾਰਨੀ ਦੀ ਪਤਨੀ ਡਾਇਨਾ ਦੇ ਜਾਣ-ਪਛਾਣ ਤੋਂ ਬਾਅਦ, ਕਾਰਨੀ ਨੇ ਮੰਚ ਸੰਭਾਲਿਆ। ਉਨ੍ਹਾਂ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀਆਂ ਟੈਰਿਫ ਨੀਤੀਆਂ ‘ਤੇ ਸਿੱਧਾ ਨਿਸ਼ਾਨਾ ਸਾਧਿਆ। ਕਾਰਨੀ ਨੇ ਕਿਹਾ, ”ਟਰੰਪ ਦੀ ਵਪਾਰਕ ਜੰਗ ਨੇ ਵਿਸ਼ਵ ਅਰਥਚਾਰੇ ਨੂੰ ਤਬਾਹ ਕਰ ਦਿੱਤਾ ਹੈ। ਉਨ੍ਹਾਂ ਨੇ ਕੈਨੇਡਾ, ਅਮਰੀਕਾ ਦੇ ਸਭ ਤੋਂ ਨਜ਼ਦੀਕੀ ਮਿੱਤਰ, ਨਾਲ ਵਿਸ਼ਵਾਸਘਾਤ ਕੀਤਾ।” ਉਨ੍ਹਾਂ ਨੇ ਇਸ ਨੂੰ ”ਤ੍ਰਾਸਦੀ” ਦੱਸਿਆ ਜਿਸ ਨਾਲ ਨਜਿੱਠਣ ਲਈ ਉਹ ਕੈਨੇਡਾ ਦੇ ਅਰਥਚਾਰੇ ਨੂੰ ਮਜ਼ਬੂਤ ਕਰਨ ਲਈ ਨਵੇਂ ਕਦਮ ਚੁੱਕਣਗੇ।
ਕਾਰਨੀ ਨੇ ਸਮਰਥਕਾਂ ਨੂੰ ਇਕਜੁੱਟ ਹੋਣ ਅਤੇ ਟਰੰਪ ਦੀਆਂ ਟੈਰਿਫਾਂ ਦਾ ਜਵਾਬ ਅਮਰੀਕਾ ਨੂੰ ਨੁਕਸਾਨ ਪਹੁੰਚਾਉਣ ਵਾਲੀਆਂ ਕਾਊਂਟਰ-ਟੈਰਿਫਾਂ ਨਾਲ ਦੇਣ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਇਨ੍ਹਾਂ ਟੈਰਿਫਾਂ ਦੇ ਹਰ ਡਾਲਰ ਨੂੰ ਕੈਨੇਡੀਅਨ ਕਾਮਿਆਂ ਅਤੇ ਕਾਰੋਬਾਰਾਂ ਦੀ ਸੁਰੱਖਿਆ ਲਈ ਵਰਤਿਆ ਜਾਵੇਗਾ। ਉਨ੍ਹਾਂ ਨੇ ਕੰਜ਼ਰਵੇਟਿਵ ਨੇਤਾ ਪੀਅਰ ਪੌਲੀਐਵ ‘ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ, ”ਉਨ੍ਹਾਂ ਨੇ ਸਾਰਾ ਪੈਸਾ ਜੇਬ ਵਿੱਚ ਪਾਇਆ, ਅਸੀਂ ਇਸ ਨੂੰ ਕਾਮਿਆਂ ਨੂੰ ਦੇਵਾਂਗੇ।”
ਕਾਰਨੀ ਨੇ ਰਿਹਾਇਸ਼ੀ ਸਮੱਸਿਆਵਾਂ ‘ਤੇ ਵੀ ਬੋਲਦੇ ਹੋਏ ਵਾਅਦਾ ਕੀਤਾ ਕਿ ਲਿਬਰਲ ਸਰਕਾਰ ਹਰ ਸਾਲ 5 ਲੱਖ ਘਰ ਬਣਾਏਗੀ, ਜਿਸ ਵਿੱਚ ਬੀ.ਸੀ. ਦੀ ਤਕਨੀਕ, ਕੁਸ਼ਲ ਕਾਮਿਆਂ ਅਤੇ ਲੱਕੜ ਦੀ ਵਰਤੋਂ ਹੋਵੇਗੀ। ਉਨ੍ਹਾਂ ਨੇ ਕਾਰਬਨ ਟੈਕਸ ਨੂੰ ”ਵੰਡਣ ਵਾਲਾ” ਕਰਾਰ ਦਿੰਦਿਆਂ ਇਸ ਨੂੰ ਹਟਾਉਣ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਵੱਡੇ ਪ੍ਰਦੂਸ਼ਕਾਂ ‘ਤੇ ਫੋਕਸ ਕਰਕੇ ਜਲਵਾਯੂ ਤਬਦੀਲੀ ਵਿਰੁੱਧ ਲੜਾਈ ਜਾਰੀ ਰਹੇਗੀ।
ਰੈਲੀ ਦੌਰਾਨ ਇੱਕ ਹੋਰ ਘਟਨਾ ਵੇਖਣ ਨੂੰ ਮਿਲੀ ਜਦੋਂ ਰੈਲੀ ‘ਚ ਕੁਝ ਕਾਰਨੀ ਦੇ ਵਿਰੋਧੀਆਂ ਨੇ ਤਿੰਨ ਵਾਰ ”ਨਸਲਕੁਸ਼ੀ” ਸਬੰਧੀ ਨਾਅਰੇਬਾਜ਼ੀ ਕੀਤੀ, ਪਰ ਹਰ ਵਾਰ ਸਮਰਥਕਾਂ ਨੇ ”ਕਾਰਨੀ, ਕਾਰਨੀ” ਦੇ ਨਾਅਰਿਆਂ ਨਾਲ ਉਨ੍ਹਾਂ ਦੀ ਆਵਾਜ਼ ਨੂੰ ਦਬਾ ਦਿੱਤਾ। ਜਿਸ ਤੋਂ ਬਾਅਦ ਸੁਰੱਖਿਆ ਅਧਿਕਾਰੀਆਂ ਨੇ ਵਿਰੋਧੀਆਂ ਨੂੰ ਬਾਹਰ ਕੱਢ ਦਿੱਤਾ।
ਕਲੋਵਰਡੇਲ-ਲੈਂਗਲੀ ਸਿਟੀ, ਜਿਸ ਦੀ ਆਬਾਦੀ 1,30,000 ਤੋਂ ਵੱਧ ਹੈ, ਵਿੱਚ ਲਿਬਰਲ ਅਤੇ ਕੰਜ਼ਰਵੇਟਿਵ ਵਿਚਕਾਰ ਸਖ਼ਤ ਮੁਕਾਬਲਾ ਵੇਖਣ ਨੂੰ ਮਿਲ ਰਿਹਾ ਹੈ। ਸਰੀ ਦੀਆਂ ਸੱਤ ਸੀਟਾਂ, ਜਿਸ ਵਿੱਚ ਇਹ ਸੀਟ ਵੀ ਸ਼ਾਮਲ ਹੈ, ਚੋਣਾਂ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੀਆਂ। ਕਾਰਨੀ ਦੀ ਰੈਲੀ ਨੇ ਸਮਰਥਕਾਂ ਵਿੱਚ ਜੋਸ਼ ਭਰਿਆ। ਉਨ੍ਹਾਂ ਦੇ ਫਰੈਂਚ ਅਤੇ ਅੰਗਰੇਜ਼ੀ ਵਿੱਚ ਸੰਬੋਧਨ, ਸਮੱਸਿਆਵਾਂ ਦੇ ਹੱਲ ‘ਤੇ ਜ਼ੋਰ ਅਤੇ ਸਰੀ ਦੀਆਂ ਸੱਤ ਸੀਟਾਂ ‘ਤੇ ਫੋਕਸ ਨੇ ਲਿਬਰਲ ਮੁਹਿੰਮ ਨੂੰ ਹੁਲਾਰਾ ਦਿੱਤਾ। 28 ਅਪ੍ਰੈਲ ਦੀ ਚੋਣ ਵਿੱਚ ਇਹ ਸੀਟ ਸਿਆਸੀ ਮੁਕਾਬਲੇ ਦਾ ਕੇਂਦਰ ਬਣੇਗੀ।