ਟਰੰਪ ਨੀਤੀਆਂ ਕਾਰਨ 2026 ਵਿੱਚ ਅਮਰੀਕਾ ਨਹੀਂ ਜਾਣਗੇ ਦੋ-ਤਿਹਾਈ ਕੈਨੇਡੀਅਨ

62 ਫੀਸਦੀ ਕੈਨੇਡੀਅਨ ਯਾਤਰਾ ਲਈ ਯੂਰਪ ਤੇ ਕੈਨੇਡਾ ਨੂੰ ਦੇ ਰਹੇ ਤਰਜੀਹ
ਸਰੀ, (ਦਿਵਰੂਪ ਕੌਰ): ਕੈਨੇਡੀਅਨਾਂ ਵਿੱਚ ਅਮਰੀਕਾ ਯਾਤਰਾ ਪ੍ਰਤੀ ਰੁਝਾਨ ਭਾਰੀ ਗਿਰਾਵਟ ਵਿੱਚ ਹੈ। ਫਲਾਈਟ ਸੈਂਟਰ ਕੈਨੇਡਾ ਵੱਲੋਂ ਨਵੰਬਰ 2025 ਵਿੱਚ ਕਰਵਾਏ ਸਰਵੇਖਣ ਮੁਤਾਬਕ 2026 ਵਿੱਚ ਯਾਤਰਾ ਕਰਨ ਵਾਲੇ ਕੈਨੇਡੀਅਨਾਂ ਵਿੱਚੋਂ 62 ਫੀਸਦੀ ਨੇ ਕਿਹਾ ਕਿ ਉਹ ਪਿਛਲੇ ਸਾਲ ਨਾਲੋਂ ਅਮਰੀਕਾ ਯਾਤਰਾ ਕਰਨ ਦੀ ਸੰਭਾਵਨਾ ਘੱਟ ਹੈ। ਸਰਵੇਖਣ ਵਿੱਚ 1000 ਤੋਂ ਵੱਧ ਕੈਨੇਡੀਅਨ ਨੌਜਵਾਨਾਂ ਨੇ ਹਿੱਸਾ ਲਿਆ। ਮੀਡੀਆ ਨਾਲ ਸਾਂਝੇ ਕੀਤੇ ਨਤੀਜਿਆਂ ਮੁਤਾਬਕ 70 ਫੀਸਦੀ ਲੋਕ ਅਜੇ ਵੀ 2026 ਵਿੱਚ ਇੱਕ ਜਾਂ ਦੋ ਯਾਤਰਾਵਾਂ ਕਰਨ ਦੀ ਯੋਜਨਾ ਬਣਾ ਰਹੇ ਹਨ ਤੇ 30 ਫੀਸਦੀ ਤਿੰਨ ਜਾਂ ਵੱਧ। ਪਰ ਯਾਤਰਾ ਕਰਨ ਵਾਲਿਆਂ ਵਿੱਚੋਂ ਸਿਰਫ਼ 8 ਫੀਸਦੀ ਨੇ ਅਮਰੀਕਾ ਨੂੰ ਤਰਜੀਹ ਦਿੱਤੀ। 37 ਫੀਸਦੀ ਨੇ ਕੈਨੇਡਾ ਅੰਦਰ, 25 ਫੀਸਦੀ ਨੇ ਯੂਰਪ, 9 ਫੀਸਦੀ ਨੇ ਮੈਕਸੀਕੋ ਤੇ 9 ਫੀਸਦੀ ਨੇ ਏਸ਼ੀਆ ਨੂੰ ਚੁਣਿਆ।
ਅਮਰੀਕਾ ਤੋਂ ਪਰਹੇਜ਼ ਦੇ ਕਾਰਨਾਂ ਵਿੱਚ 57 ਫੀਸਦੀ ਨੇ ਰਾਜਨੀਤਿਕ ਤੇ ਸੱਭਿਆਚਾਰਕ ਮਾਹੌਲ, 53 ਫੀਸਦੀ ਨੇ ਬਾਰਡਰ ਤੇ ਪ੍ਰੋਸੈੱਸਿੰਗ, 46 ਫੀਸਦੀ ਨੇ ਸੁਰੱਖਿਆ ਚਿੰਤਾਵਾਂ ਤੇ 44 ਫੀਸਦੀ ਨੇ ਖਰਚੇ ਤੇ ਵਟਾਂਦਰਾ ਦਰ ਦੱਸੇ। ਬੁੱਢੇ ਕੈਨੇਡੀਅਨਾਂ ਵਿੱਚ ਅਮਰੀਕਾ ਤੋਂ ਪਰਹੇਜ਼ ਸਭ ਤੋਂ ਵੱਧ ਹੈ ।
ਫਲਾਈਟ ਸੈਂਟਰ ਕੈਨੇਡਾ ਨੇ ਦੱਸਿਆ ਕਿ 2025 ਵਿੱਚ ਅਮਰੀਕਾ ਲਈ ਲੈਜ਼ਰ ਬੁਕਿੰਗਾਂ ਪਿਛਲੇ ਸਾਲ ਨਾਲੋਂ 30-40 ਫੀਸਦੀ ਘੱਟ ਹਨ। ਫਰਵਰੀ ਤੋਂ ਅਮਰੀਕਾ ਵਾਲੀਆਂ ਬੁਕਿੰਗਾਂ ਕੁੱਲ ਵਿੱਚੋਂ ਘੱਟ ਹਿੱਸਾ ਬਣੀਆਂ ਹਨ। ਇਸੇ ਵੇਲੇ ਕੁੱਲ ਯਾਤਰਾ ਸਥਿਰ ਰਹੀ ਹੈ ਤੇ ਲੋਕ ਯੂਰਪ, ਕੈਰੀਬੀਅਨ, ਦੱਖਣੀ ਅਮਰੀਕਾ ਤੇ ਏਸ਼ੀਆ ਵਰਗੇ “ਪ੍ਰੈਡਿਕਟੇਬਲ ਤੇ ਵੈਲਿਊ ਵਾਲੇ” ਥਾਵਾਂ ਨੂੰ ਚੁਣ ਰਹੇ ਹਨ।
ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ ਅਕਤੂਬਰ ਵਿੱਚ ਅਮਰੀਕਾ ਜਾਣ ਵਾਲੇ ਕੈਨੇਡੀਅਨ ਹਵਾਈ ਯਾਤਰੀਆਂ ਵਿੱਚ ਲਗਾਤਾਰ ਨੌਵੀਂ ਮਹੀਨੇ ਗਿਰਾਵਟ ਆਈ। ਪਿਛਲੇ ਸਾਲਾਂ ਵਿੱਚ ਪੋਲਾਂ ਵਿੱਚ ਵੀ 75 ਫੀਸਦੀ ਲੋਕਾਂ ਨੇ ਅਮਰੀਕਾ ਯਾਤਰਾ ਤੇ ਬਾਈਕਾਟ ਦੀ ਗੱਲ ਕਹੀ ਸੀ ਤੇ 72 ਫੀਸਦੀ ਨੇ ਅਮਰੀਕੀ ਚੀਜ਼ਾਂ ਖਰੀਦਣ ਤੋਂ ਪਰਹੇਜ਼ ਕੀਤਾ ਸੀ।
ਇਹ ਰੁਝਾਨ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਕੈਨੇਡਾ ਸਮੇਤ ਜ਼ਿਆਦਾਤਰ ਦੇਸ਼ਾਂ ਤੇ ਟੈਰਿਫ਼ ਲਗਾਉਣ ਤੇ ਕੈਨੇਡਾ ਨੂੰ “51ਵਾਂ ਸਟੇਟ” ਬਣਾਉਣ ਵਾਲੇ ਬਿਆਨਾਂ ਨਾਲ ਜੁੜਿਆ ਮੰਨਿਆ ਜਾ ਰਿਹਾ ਹੈ। ਆਈਪਸੌਸ ਦੇ ਸੀਨੀਅਰ ਵਾਈਸ ਪ੍ਰੈਜ਼ੀਡੈਂਟ ਕਾਈਲ ਬ੍ਰੇਡ ਨੇ ਪਿਛਲੇ ਪੋਲਾਂ ਵਿੱਚ ਕਿਹਾ ਸੀ ਕਿ ਟਰੰਪ ਤੇ ਅਮਰੀਕੀ ਪ੍ਰਸ਼ਾਸਨ ਪ੍ਰਤੀ ਕੈਨੇਡੀਅਨਾਂ ਦਾ ਗੁੱਸਾ ਘਟਣ ਦੇ ਨਿਸ਼ਾਨ ਨਹੀਂ ਦਿਖ ਰਿਹਾ।
ਇਹ ਸਰਵੇਖਣ ਕੈਨੇਡੀਅਨਾਂ ਵਿੱਚ ਅਮਰੀਕਾ ਪ੍ਰਤੀ ਬਦਲਦੇ ਨਜ਼ਰੀਏ ਨੂੰ ਉਜਾਗਰ ਕਰਦਾ ਹੈ ਤੇ ਟਰੰਪ ਨੀਤੀਆਂ ਦੇ ਲੰਮੇ ਅਸਰ ਨੂੰ ਵਿਖਾਉਂਦਾ ਹੈ। This report was written by Divroop Kaur as part of the Local Journalism Initiative.