ਸਰੀ ਵਿੱਚ ਕੈਨੇਡਾ ਡੇਅ 2026 ਦੇ ਜਸ਼ਨਾਂ ਵਿੱਚ 80,000 ਤੋਂ ਵੱਧ ਲੋਕਾਂ ਨੇ ਕੀਤੀ ਸ਼ਿਰਕਤ

ਸਰੀ, (ਦਿਵਰੂਪ ਕੌਰ): ਸਰੀ ਸ਼ਹਿਰ ਦੇ ਕਲੋਵਰਡੇਲ ਖੇਤਰ ਵਿੱਚ ਸਥਿਤ ਬਿੱਲ ਰੀਡ ਮਿਲੇਨੀਅਮ ਐਂਫੀਥੀਏਟਰ ਵਿਖੇ ਬੀਤੇ ਦਿਨ ਕੈਨੇਡਾ ਡੇਅ 2026 ਦੇ ਜਸ਼ਨ ਬਹੁਤ ਹੀ ਉਤਸ਼ਾਹ ਨਾਲ ਮਨਾਏ ਗਏ। ਇਸ ਪ੍ਰਭਾਵਸ਼ਾਲੀ ਸਮਾਗਮ ਵਿੱਚ 80,000 ਤੋਂ ਵੱਧ ਲੋਕਾਂ ਨੇ ਸ਼ਿਰਕਤ ਕਰਕੇ ਇੱਕ ਨਵਾਂ ਮੀਲ ਪੱਥਰ ਸਥਾਪਿਤ ਕੀਤਾ ਹੈ। ਇੰਨੀ ਭਾਰੀ ਗਿਣਤੀ ਵਿੱਚ ਲੋਕਾਂ ਦੀ ਆਮਦ ਨੇ ਇਸ ਪ੍ਰੋਗਰਾਮ ਨੂੰ ਪੱਛਮੀ ਕੈਨੇਡਾ ਦੇ ਸਭ ਤੋਂ ਵਿਸ਼ਾਲ ਮੁਫ਼ਤ ਕੈਨੇਡਾ ਡੇਅ ਸਮਾਰੋਹ ਵਜੋਂ ਸਥਾਪਿਤ ਕਰ ਦਿੱਤਾ ਹੈ। ਪ੍ਰੋਸਪੇਰਾ ਦੁਆਰਾ ਪੇਸ਼ ਕੀਤਾ ਗਿਆ ਇਹ ਸਮਾਗਮ ਸਵੇਰ ਤੋਂ ਲੈ ਕੇ ਦੇਰ ਰਾਤ ਤੱਕ ਚੱਲਿਆ ਜਿਸ ਵਿੱਚ ਲੋਕਾਂ ਨੇ ਵੱਖ ਵੱਖ ਮੁਫ਼ਤ ਗਤੀਵਿਧੀਆਂ ਦਾ ਭਰਪੂਰ ਆਨੰਦ ਮਾਣਿਆ।
ਇਸ ਰੰਗਾਰੰਗ ਪ੍ਰੋਗਰਾਮ ਦੌਰਾਨ ਸੰਗੀਤ ਅਤੇ ਕਲਾ ਦਾ ਸ਼ਾਨਦਾਰ ਸੁਮੇਲ ਦੇਖਣ ਨੂੰ ਮਿਲਿਆ। ਕੈਨੇਡੀਅਨ ਕੰਟਰੀ ਸਟਾਰ ਜੋਸ਼ ਰੌਸ ਨੇ ਆਪਣੀ ਪੇਸ਼ਕਾਰੀ ਨਾਲ ਦਰਸ਼ਕਾਂ ਦਾ ਮਨ ਮੋਹ ਲਿਆ ਅਤੇ ਉਹ ਇਸ ਸਮਾਗਮ ਦੇ ਮੁੱਖ ਆਕਰਸ਼ਨ ਰਹੇ। ਉਨ੍ਹਾਂ ਦੇ ਨਾਲ ਹੀ ਨਾਮਵਰ ਕਲਾਕਾਰਾਂ ਲੀ ਐਰੋਨ ਅਤੇ ਟਾਈਲਰ ਸ਼ਾਅ ਨੇ ਵੀ ਆਪਣੀ ਕਲਾ ਦਾ ਜਾਦੂ ਬਿਖੇਰਿਆ। ਪ੍ਰਬੰਧਕਾਂ ਵੱਲੋਂ ਮਨੋਰੰਜਨ ਲਈ ਚਾਰ ਵੱਖ ਵੱਖ ਸਟੇਜਾਂ ਤਿਆਰ ਕੀਤੀਆਂ ਗਈਆਂ ਸਨ ਜਿੱਥੇ ਲਾਈਵ ਪੇਸ਼ਕਾਰੀਆਂ ਚੱਲਦੀਆਂ ਰਹੀਆਂ। ਇਸ ਤੋਂ ਇਲਾਵਾ ਇੱਕ ਆਦਿਵਾਸੀ ਪਿੰਡ ਅਤੇ ਮਾਰਕੀਟਪਲੇਸ ਨੇ ਲੋਕਾਂ ਨੂੰ ਆਪਣੇ ਵੱਲ ਖਿੱਚਿਆ। ਬੱਚਿਆਂ ਅਤੇ ਨੌਜਵਾਨਾਂ ਲਈ ਮਨੋਰੰਜਕ ਝੂਲੇ, ਸੁਆਦੀ ਪਕਵਾਨਾਂ ਵਾਲੇ ਫੂਡ ਟਰੱਕ ਅਤੇ ਬੀਅਰ ਗਾਰਡਨ ਦਾ ਵਿਸ਼ੇਸ਼ ਪ੍ਰਬੰਧ ਕੀਤਾ ਗਿਆ ਸੀ। ਰਾਤ ਸਮੇਂ ਅਸਮਾਨ ਵਿੱਚ ਕੀਤੀ ਗਈ ਸ਼ਾਨਦਾਰ ਆਤਿਸ਼ਬਾਜ਼ੀ ਨੇ ਇਸ ਜਸ਼ਨ ਨੂੰ ਇੱਕ ਯਾਦਗਾਰੀ ਅੰਤ ਦਿੱਤਾ।
ਸਮਾਗਮ ਵਿੱਚ ਪਹੁੰਚੇ ਪਰਿਵਾਰਾਂ ਨੇ ਵੱਖ ਵੱਖ ਥਾਵਾਂ ਉੱਤੇ ਲਗਾਏ ਗਏ ਆਕਰਸ਼ਣਾਂ ਦਾ ਲਾਹਾ ਲਿਆ। ਕਮਿਊਨਿਟੀ ਹੱਬ ਵਿੱਚ ਡੀਜੇ ਅਤੇ ਡਾਂਸ ਮੁਕਾਬਲੇ ਕਰਵਾਏ ਗਏ। ਇਸ ਸਾਲ ਪਹਿਲੀ ਵਾਰ ਚੈਪਮੈਨਜ਼ ਚਿਲ ਜ਼ੋਨ ਬਣਾਇਆ ਗਿਆ ਸੀ ਜਿੱਥੇ ਆਈਸ ਕਰੀਮ ਦੇ ਮੁਫ਼ਤ ਨਮੂਨੇ ਵੰਡੇ ਗਏ। ਆਦਿਵਾਸੀ ਪਿੰਡ ਅਤੇ ਮਾਰਕਿਟਪਲੇਸ ਰਾਹੀਂ ਲੋਕਾਂ ਨੂੰ ਸੱਭਿਆਚਾਰਕ ਸਾਂਝ ਪਾਉਣ ਅਤੇ ਆਪਸੀ ਸੰਪਰਕ ਵਧਾਉਣ ਦੇ ਬਿਹਤਰੀਨ ਮੌਕੇ ਮਿਲੇ। ਫੈਮਲੀ ਜ਼ੋਨ ਵਿੱਚ ਬੱਚਿਆਂ ਨੇ ਮੁਫ਼ਤ ਗਤੀਵਿਧੀਆਂ ਦਾ ਆਨੰਦ ਲਿਆ। ਪ੍ਰੋਸਪੇਰਾ ਦੀ ਕਮਿਊਨਿਟੀ ਐਂਗੇਜਮੈਂਟ ਮੈਨੇਜਰ ਰਾਕੇਲ ਸੈਂਟੋਸ ਨੇ ਕਿਹਾ ਕਿ ਭਾਈਚਾਰੇ ਨੂੰ ਇਕੱਠੇ ਹੋ ਕੇ ਖੁਸ਼ੀਆਂ ਮਨਾਉਂਦੇ ਦੇਖਣਾ ਬਹੁਤ ਹੀ ਸਕੂਨ ਦਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੇ ਸਮਾਗਮਾਂ ਰਾਹੀਂ ਨਵੇਂ ਸੰਪਰਕ ਬਣਾਉਣ ਅਤੇ ਰਿਸ਼ਤਿਆਂ ਨੂੰ ਮਜ਼ਬੂਤ ਕਰਨ ਦਾ ਮੌਕਾ ਮਿਲਦਾ ਹੈ।
ਅੰਤ ਵਿੱਚ ਪ੍ਰਬੰਧਕਾਂ ਵੱਲੋਂ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਆਨਲਾਈਨ ਸਰਵੇ ਰਾਹੀਂ ਆਪਣੇ ਸੁਝਾਅ ਜ਼ਰੂਰ ਸਾਂਝੇ ਕਰਨ। ਇਸ ਸਰਵੇ ਵਿੱਚ ਹਿੱਸਾ ਲੈਣ ਵਾਲੇ ਗਿਲਡਫੋਰਡ ਟਾਊਨ ਸੈਂਟਰ ਲਈ 200 ਡਾਲਰ ਦਾ ਗਿਫ਼ਟ ਕਾਰਡ ਜਿੱਤ ਸਕਦੇ ਹਨ। ਵਧੇਰੇ ਜਾਣਕਾਰੀ ਲਈ surreycanadaday.ca ਵੈੱਬਸਾਈਟ ਉੱਤੇ ਜਾਇਆ ਜਾ ਸਕਦਾ ਹੈ।