ਸਰੀ, (ਪਰਮਜੀਤ ਸਿੰਘ): ਵਾਸ਼ਿੰਗਟਨ ਸਟੇਟ ਦੇ ਵੇਨਚੀ ਸ਼ਹਿਰ ਵਿੱਚ ਤਿੰਨ ਨਾਬਾਲਗ ਭੈਣਾਂ, ਜਿਨ੍ਹਾਂ ਨੂੰ ਲਾਪਤਾ ਐਲਾਨਿਆ ਗਿਆ ਸੀ, ਦੀਆਂ ਲਾਸ਼ਾਂ ਮਿਲਣ ਦੀ ਦੁਖਦ ਖ਼ਬਰ ਸਾਹਮਣੇ ਆਈ ਹੈ। ਪੁਲਿਸ ਨੇ ਇਨ੍ਹਾਂ ਦੀਆਂ ਮੌਤਾਂ ਲਈ ਉਨ੍ਹਾਂ ਦੇ ਪਿਤਾ, 32 ਸਾਲਾ ਟ੍ਰੈਵਿਸ ਡੈਕਰ, ‘ਤੇ ਕਤਲ ਦਾ ਸ਼ੱਕ ਜਤਾਇਆ ਹੈ, ਜੋ ਅਜੇ ਵੀ ਫਰਾਰ ਹੈ।
9 ਸਾਲਾ ਪੈਟੀਨ ਡੈਕਰ, 8 ਸਾਲਾ ਇਵਲਿਨ ਡੈਕਰ ਅਤੇ 5 ਸਾਲਾ ਓਲੀਵੀਆ ਡੈਕਰ ਦੀਆਂ ਮੌਤਾਂ ਦੀ ਸੂਚਨਾ 3 ਜੂਨ, 2025 ਨੂੰ ਮੰਗਲਵਾਰ ਸਵੇਰੇ ਮਿਲੀ। ਇਸ ਤੋਂ ਇੱਕ ਦਿਨ ਪਹਿਲਾਂ, ਵਾਸ਼ਿੰਗਟਨ ਸਟੇਟ ਪੈਟਰੋਲ ਨੇ ਇਨ੍ਹਾਂ ਭੈਣਾਂ ਲਈ ਜਾਰੀ ਕੀਤਾ ਗਿਆ ਐਂਡੇਂਜਰਡ ਮਿਸਿੰਗ ਪਰਸਨ ਅਲਰਟ ਵਾਪਸ ਲੈ ਲਿਆ ਸੀ। ਇਹ ਭੈਣਾਂ ਆਖਰੀ ਵਾਰ 30 ਮਈ, 2025 ਨੂੰ ਸ਼ਾਮ 5 ਵਜੇ ਆਪਣੇ ਪਿਤਾ, ਟ੍ਰੈਵਿਸ ਡੈਕਰ, ਨਾਲ ”ਯੋਜਨਾਬੱਧ ਮੁਲਾਕਾਤ” ਲਈ ਵੇਨਚੀ ਸਥਿਤ ਘਰ ਤੋਂ ਨਿਕਲੀਆਂ ਸਨ। ਪੁਲਿਸ ਅਨੁਸਾਰ, ਟ੍ਰੈਵਿਸ ਬੇਘਰ ਹੈ ਅਤੇ ਆਪਣੀ 2017 ਮਾਡਲ ਦੀ ਵ੍ਹਾਈਟ ਜੀ.ਐਮ.ਸੀ. ਸੀਅਰਾ ਪਿਕਅੱਪ ਟਰੱਕ ਵਿੱਚ ਰਹਿੰਦਾ ਹੈ ਜਾਂ ਸਥਾਨਕ ਮੋਟਲਾਂ ਅਤੇ ਕੈਂਪਗਰਾਊਂਡਾਂ ਵਿੱਚ ਠਹਿਰਦਾ ਹੈ।
ਸਥਾਨਕ ਨਿਊਜ਼ ਸਟੇਸ਼ਨ ਂਛਾਂਲ਼ੀਢਓ ਅਨੁਸਾਰ, ਟ੍ਰੈਵਿਸ ਨੇ ਸ਼ੁੱਕਰਵਾਰ ਸ਼ਾਮ 5 ਵਜੇ ਬੱਚੀਆਂ ਨੂੰ ਲਿਆ ਸੀ, ਪਰ ਉਸ ਨੇ ਇਹ ਨਹੀਂ ਦੱਸਿਆ ਸੀ ਕਿ ਉਹ ਉਨ੍ਹਾਂ ਨੂੰ ਕਿੱਥੇ ਲੈ ਕੇ ਜਾ ਰਿਹਾ ਹੈ। ਅਗਲੇ ਦਿਨ, 31 ਮਈ ਨੂੰ, ਵਾਸ਼ਿੰਗਟਨ ਸਟੇਟ ਪੈਟਰੋਲ ਨੇ ਬੱਚੀਆਂ ਅਤੇ ਉਨ੍ਹਾਂ ਦੇ ਪਿਤਾ ਨੂੰ ”ਜੋਖਮ ਵਿੱਚ/ਲਾਪਤਾ” ਐਲਾਨਦਿਆਂ ਇੱਕ ਐਂਡੇਂਜਰਡ ਮਿਸਿੰਗ ਪਰਸਨ ਅਲਰਟ ਜਾਰੀ ਕੀਤਾ ਅਤੇ ਟ੍ਰੈਵਿਸ ਦੇ ਟਰੱਕ ਦੀ ਤਸਵੀਰ ਸਾਂਝੀ ਕੀਤੀ।
ਪੁਲਿਸ ਨੇ ਦੱਸਿਆ ਕਿ ਇਹ ਮੁਲਾਕਾਤ ਇੱਕ ਪੇਰੈਂਟਿੰਗ ਪਲਾਨ ਦਾ ਹਿੱਸਾ ਸੀ, ਪਰ ਟ੍ਰੈਵਿਸ ਨੇ ਇਸ ਦੀਆਂ ਸੀਮਾਵਾਂ ਤੋਂ ਬਾਹਰ ਜਾ ਕੇ ਕੰਮ ਕੀਤਾ, ਜੋ ਆਮ ਨਹੀਂ ਸੀ ਅਤੇ ਚਿੰਤਾ ਦਾ ਕਾਰਨ ਬਣਿਆ। ਉਸ ਨੇ ਬੱਚੀਆਂ ਨੂੰ ਸਮੇਂ ਸਿਰ ਵਾਪਸ ਨਹੀਂ ਕੀਤਾ ਅਤੇ ਉਸ ਨਾਲ ਸੰਪਰਕ ਵੀ ਨਹੀਂ ਹੋ ਸਕਿਆ। ਸਥਾਨਕ ਮੋਟਲਾਂ ਦੀ ਤਲਾਸ਼ੀ ਲੈਣ ਤੋਂ ਬਾਅਦ, ਪੁਲਿਸ ਦਾ ਧਿਆਨ ਲੀਵਨਵਰਥ ਨੇੜੇ ਇੱਕ ਕੈਂਪਗਰਾਊਂਡ ਵੱਲ ਗਿਆ। 2 ਜੂਨ ਨੂੰ ਸ਼ਾਮ 3:45 ਵਜੇ, ਚੇਲਨ ਕਾਊਂਟੀ ਦੇ ਸ਼ੈਰਿਫ ਦੇ ਇੱਕ ਡਿਪਟੀ ਨੇ ਰੌਕ ਆਈਲੈਂਡ ਕੈਂਪਗਰਾਊਂਡ ਨੇੜੇ ਆਈਸਿਕਲ ਰੋਡ ‘ਤੇ ਟ੍ਰੈਵਿਸ ਦਾ ਟਰੱਕ ਖੜ੍ਹਾ ਪਾਇਆ, ਜੋ ਖਾਲੀ ਸੀ। ਖੋਜ ਦੌਰਾਨ, ਉਸੇ ਖੇਤਰ ਵਿੱਚ ਤਿੰਨੋਂ ਭੈਣਾਂ ਦੀਆਂ ਲਾਸ਼ਾਂ ਮਿਲੀਆਂ।
ਕੋਰਟ ਦਸਤਾਵੇਜ਼ਾਂ ਅਨੁਸਾਰ, ਬੱਚੀਆਂ ਦੀ ਮੌਤ ਦਾ ਸੰਭਾਵਿਤ ਕਾਰਨ ਦਮ ਘੁੱਟਣਾ ਸੀ। ਉਨ੍ਹਾਂ ਦੇ ਸਿਰ ‘ਤੇ ਪਲਾਸਟਿਕ ਦੀਆਂ ਥੈਲੀਆਂ ਅਤੇ ਹੱਥਾਂ ‘ਤੇ ਜ਼ਿਪ ਟਾਈਜ਼ ਸਨ। ਟ੍ਰੈਵਿਸ ਦੇ ਟਰੱਕ ‘ਤੇ ਖੂਨ ਦੇ ਦੋ ਹੱਥਾਂ ਦੇ ਨਿਸ਼ਾਨ ਵੀ ਮਿਲੇ। ਟ੍ਰੈਵਿਸ, ਜੋ ਵਾਸ਼ਿੰਗਟਨ ਨੈਸ਼ਨਲ ਗਾਰਡ ਦਾ ਸਾਬਕਾ ਮੈਂਬਰ ਹੈ ਅਤੇ ਜਿਸ ਨੂੰ 2013 ਤੋਂ 2023/2024 ਤੱਕ ਆਰਮੀ ਵਿੱਚ ਸਿਖਲਾਈ ਮਿਲੀ, ਅਜੇ ਫਰਾਰ ਹੈ। ਪੁਲਿਸ ਨੇ ਉਸ ‘ਤੇ ਤਿੰਨ ਮਕਤਲ ਅਤੇ ਅਗਵਾ ਦੇ ਦੋਸ਼ ਲਗਾਏ ਹਨ। ਉਸ ਦੀ ਗ੍ਰਿਫਤਾਰੀ ਲਈ ਵਾਰੰਟ ਜਾਰੀ ਕੀਤਾ ਗਿਆ ਹੈ।
ਵਾਸ਼ਿੰਗਟਨ ਸਟੇਟ ਵਿੱਚ ਤਿੰਨ ਭੈਣਾਂ ਦੀਆਂ ਲਾਸ਼ਾਂ ਮਿਲੀਆਂ, ਪਿਤਾ ‘ਤੇ ਕਤਲ ਦਾ ਸ਼ੱਕ
