ਮਹਿੰਗਾਈ ਕਾਰਨ ਸਰੀ ਡੈਲਟਾ ਫੂਡ ਬੈਂਕ ਉੱਤੇ ਅਰਥਿਕ ਸੰਕਟ, ਮੰਗ ਵਧੀ ਦਾਨ ਘਟੇ

ਦਾਨ ਘਟਣ ਨਾਲ ਗੁਰੂ ਨਾਨਕ ਫੂਡ ਬੈਂਕ ਭਾਰੀ ਦਬਾਅ ਹੇਠ
ਸਰੀ, (ਦਿਵਰੂਪ ਕੌਰ): ਸਰੀ ਅਤੇ ਡੈਲਟਾ ਖੇਤਰ ਦੇ ਹਜ਼ਾਰਾਂ ਲੋੜਵੰਦ ਲੋਕਾਂ ਲਈ ਆਸ ਦੀ ਕਿਰਨ ਬਣਿਆ Guru Nanak Food Bank ਇਸ ਸਮੇਂ ਆਪਣੇ ਇਤਿਹਾਸ ਦੇ ਸਭ ਤੋਂ ਮੁਸ਼ਕਲ ਦੌਰ ਵਿਚੋਂ ਲੰਘ ਰਿਹਾ ਹੈ। ਫੂਡ ਬੈਂਕ ਪ੍ਰਬੰਧਨ ਮੁਤਾਬਕ ਇਸ ਸਾਲ ਦਾਨ ਵਿਚ ਭਾਰੀ ਘਾਟ ਆਈ ਹੈ, ਜਦਕਿ ਖੁਰਾਕ ਦੀ ਲੋੜ ਰੱਖਣ ਵਾਲਿਆਂ ਦੀ ਗਿਣਤੀ ਰਿਕਾਰਡ ਤੌਰ ਤੇ ਵਧ ਗਈ ਹੈ। ਹਾਲਾਤ ਇੰਨੇ ਗੰਭੀਰ ਹਨ ਕਿ ਫੂਡ ਬੈਂਕ ਦੇ ਰੈਕ ਭਰਨ ਤੋਂ ਤੇਜ਼ੀ ਨਾਲ ਖਾਲੀ ਹੋ ਰਹੇ ਹਨ।
ਗੁਰੂ ਨਾਨਕ ਫੂਡ ਬੈਂਕ ਸਰੀ ਅਤੇ ਧੲਲਟੳ ਖੇਤਰ ਵਿਚ ਇਕਵੀ ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਨਿਯਮਤ ਤੌਰ ਉੱਤੇ ਰਾਸ਼ਨ ਮੁਹੱਈਆ ਕਰਵਾਉਂਦਾ ਹੈ। ਪਰ ਇਸ ਸਾਲ ਤਿਉਹਾਰਾਂ ਦੇ ਮੌਸਮ ਦੇ ਬਾਵਜੂਦ, ਜਦੋਂ ਆਮ ਤੌਰ ਉੱਤੇ ਦਾਨ ਵਧਦਾ ਹੈ, ਉੱਲਟ ਇਸ ਵਾਰ ਦਾਨ ਵਿਚ ਭਾਰੀ ਗਿਰਾਵਟ ਆਈ ਹੈ। ਫੂਡ ਬੈਂਕ ਦੇ ਕੰਮਕਾਜ ਦੇ ਮੁਖੀ ਨੀਰਜ ਸਿੰਘ ਵਾਲੀਆ ਨੇ ਦੱਸਿਆ ਕਿ ਇਸ ਵਾਰ ਦਾਨ ਵਿਚ ਸਭ ਤੋਂ ਵੱਡੀ ਘਾਟ ਦਰਜ ਕੀਤੀ ਗਈ ਹੈ।
ਨੀਰਜ ਸਿੰਘ ਵਾਲੀਆ ਨੇ ਕਿਹਾ ਕਿ ਇਹ ਸਮਾਂ ਕੈਨੇਡਾ ਦੇ ਪਰਿਵਾਰਾਂ ਲਈ ਹਾਲੀਆ ਇਤਿਹਾਸ ਦੇ ਸਭ ਤੋਂ ਔਖੇ ਸਮਿਆਂ ਵਿਚੋਂ ਇਕ ਹੈ। ਵਧਦਾ ਕਿਰਾਇਆ, ਖਾਣ ਪੀਣ ਦੀ ਮਹਿੰਗਾਈ, ਨੌਕਰੀਆਂ ਦੀ ਅਣਸ਼ਚਿੱਤਤਾ ਅਤੇ ਸਰਦੀਆਂ ਦੇ ਵਧੇ ਖ਼ਰਚੇ ਹਜ਼ਾਰਾਂ ਮਿਹਨਤੀ ਪਰਿਵਾਰਾਂ ਨੂੰ ਆਰਥਿਕ ਤੌਰ ਤੇ ਤਬਾਹੀ ਦੇ ਕਿਨਾਰੇ ਲੈ ਆਏ ਹਨ। ਉਨ੍ਹਾਂ ਦੱਸਿਆ ਕਿ ਹੁਣ ਫੂਡ ਬੈਂਕ ਦੇ ਦਰਵਾਜਅਿਾਂ ਉੱਤੇ ਮਦਦ ਲਈ ਆਉਣ ਵਾਲਿਆਂ ਦੀ ਗਿਣਤੀ ਲਗਾਤਾਰ ਵਧ ਰਹੀ ਹੈ।
ਵਾਲੀਆ ਨੇ ਦਰਦਨਾਕ ਸਥਿਤੀ ਬਿਆਨ ਕਰਦਿਆਂ ਕਿਹਾ ਕਿ ਮਾਪੇ ਮਦਦ ਮੰਗਣ ਆਉਂਦੇ ਹਨ ਪਰ ਉਨ੍ਹਾਂ ਦੀਆਂ ਅੱਖਾਂ ਵਿਚ ਸ਼ਰਮ ਅਤੇ ਲਾਚਾਰੀ ਸਾਫ਼ ਦਿੱਸਦੀ ਹੈ। ਕਈ ਬਜ਼ੁਰਗ ਆਪਣਾ ਪੇਟ ਭਰਨ ਦੀ ਬਜਾਏ ਖਾਣਾ ਛੱਡ ਰਹੇ ਹਨ ਅਤੇ ਬੱਚੇ ਭੁੱਖੇ ਫੂਡ ਬੈਂਕ ਤੱਕ ਪਹੁੰਚ ਰਹੇ ਹਨ। ਇਹ ਦ੍ਰਿਸ਼ ਕਿਸੇ ਵੀ ਸੰਵੇਦਨਸ਼ੀਲ ਮਨੁੱਖ ਲਈ ਦਿਲ ਹਿਲਾ ਦੇਣ ਵਾਲਾ ਹੈ।
ਫੂਡ ਬੈਂਕ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਿਛਲੇ ਕੁਝ ਸਾਲਾਂ ਵਿਚ ਸਰੀ ਵਿਚ ਆਬਾਦੀ ਦੇ ਤੇਜ਼ੀ ਨਾਲ ਵਧਣ, ਘੱਟ ਆਮਦਨ ਵਾਲੇ ਘਰਾਣਿਆਂ ਦੀ ਗਿਣਤੀ ਵਧਣ ਅਤੇ ਘਰਾਂ ਦੇ ਕਿਰਾਏ ਆਸਮਾਨ ਛੂਹਣ ਕਾਰਨ ਭੁੱਖਮਰੀ ਅਤੇ ਗਰੀਬੀ ਦੀ ਸਮੱਸਿਆ ਹੋਰ ਵੀ ਗੰਭੀਰ ਬਣ ਗਈ ਹੈ। ਪਹਿਲਾਂ ਜਿੱਥੇ ਪਰਿਵਾਰ ਮਹੀਨੇ ਵਿਚ ਇਕ ਵਾਰ ਫੂਡ ਬੈਂਕ ਦੀ ਸਹਾਇਤਾ ਲੈਂਦੇ ਸਨ, ਹੁਣ ਉਹੀ ਪਰਿਵਾਰ ਦੋ-ਦੋ ਵਾਰ ਮਦਦ ਲੈਣ ਲਈ ਮਜ਼ਬੂਰ ਹੋ ਰਹੇ ਹਨ।
ਨੀਰਜ ਸਿੰਘ ਵਾਲੀਆ ਨੇ ਸਮੂਹ ਭਾਈਚਾਰੇ ਨੂੰ ਅੱਗੇ ਆ ਕੇ ਮਦਦ ਕਰਨ ਦੀ ਭਾਵਕ ਅਪੀਲ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਛੋਟਾ ਜਿਹਾ ਦਾਨ ਵੀ ਕਿਸੇ ਪਰਿਵਾਰ ਲਈ ਮੁਸਕਾਨ, ਸਹਾਰਾ ਅਤੇ ਇੱਜ਼ਤ ਵਾਪਸ ਲਿਆ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਕਈ ਵਾਰ ਸਿਰਫ਼ ਕੁਝ ਰੁਪਏ ਦਾ ਰਾਸ਼ਨ ਵੀ ਕਿਸੇ ਬੱਚੇ ਨੂੰ ਭੁੱਖੋਂ ਬਚਾ ਲੈਂਦਾ ਹੈ।
ਫੂਡ ਬੈਂਕ ਨਾਲ ਜੁੜੇ ਸੇਵਾਦਾਰਾਂ ਦਾ ਕਹਿਣਾ ਹੈ ਕਿ ਉਹ ਆਪਣੀ ਪੂਰੀ ਮਿਹਨਤ ਨਾਲ ਕੰਮ ਕਰ ਰਹੇ ਹਨ, ਪਰ ਜਦੋਂ ਰੈਕਾਂ ਵਿਚ ਸਮਾਨ ਹੀ ਪੂਰਾ ਨਹੀਂ ਹੁੰਦਾ, ਤਾਂ ਲੋੜਵੰਦਾਂ ਨੂੰ ਭਰੇ ਮਨ ਨਾਲ ਵਾਪਸ ਭੇਜਣਾ ਪੈਂਦਾ ਹੈ। ਇਹ ਸਥਿਤੀ ਸੇਵਾਦਾਰਾਂ ਲਈ ਵੀ ਮਾਨਸਿਕ ਤੌਰ ਤੇ ਬਹੁਤ ਔਖੀ ਹੈ।
ਸਮਾਜਿਕ ਸੰਗਠਨਾਂ ਅਤੇ ਧਾਰਮਿਕ ਸੰਸਥਾਵਾਂ ਨੂੰ ਵੀ ਅੱਗੇ ਆਉਣ ਦੀ ਅਪੀਲ ਕੀਤੀ ਗਈ ਹੈ ਤਾਂ ਜੋ ਫੂਡ ਬੈਂਕ ਲਈ ਖੁਰਾਕੀ ਸਮਾਨ ਇਕੱਠਾ ਕੀਤਾ ਜਾ ਸਕੇ। ਖ਼ਾਸ ਕਰਕੇ ਦਾਲਾਂ, ਚੌਲ, ਤੇਲ, ਆਟਾ, ਦੁੱਧ, ਡਬਾਬੰਦ ਸਬਜ਼ੀਆਂ ਅਤੇ ਬੱਚਿਆਂ ਲਈ ਪੌਸ਼ਟਿਕ ਆਹਾਰ ਦੀ ਸਭ ਤੋਂ ਵੱਧ ਲੋੜ ਦੱਸੀ ਜਾ ਰਹੀ ਹੈ।
ਸਰੀ ਸ਼ਹਿਰ ਵਿਚ ਭੁੱਖ ਅਤੇ ਗ਼ਰੀਬੀ ਹੁਣ ਸਿਰਫ਼ ਕਿਸੇ ਇਕ ਵਰਗ ਦੀ ਸਮੱਸਿਆ ਨਹੀਂ ਰਹੀ, ਬਲਕਿ ਮੱਧ ਵਰਗ ਤੱਕ ਵੀ ਇਸ ਦਾ ਪ੍ਰਭਾਵ ਪਹੁੰਚ ਰਿਹਾ ਹੈ। ਕਈ ਐਸੇ ਪਰਿਵਾਰ ਵੀ ਹੁਣ ਮਦਦ ਲੈ ਰਹੇ ਹਨ ਜੋ ਪਹਿਲਾਂ ਖੁਦ ਦਾਨ ਕਰਦੇ ਸਨ। ਨੀਰਜ ਸਿੰਘ ਵਾਲੀਆ ਨੇ ਆਖ਼ਰ ਵਿਚ ਦੋਹਰਾਇਆ ਕਿ ਜੇ ਸਮਾਜ ਦਾ ਹਰ ਵਿਅਕਤੀ ਆਪਣੀ ਸਮਰਥਾ ਅਨੁਸਾਰ ਥੋੜ੍ਹੀ ਜਿਹੀ ਮਦਦ ਵੀ ਕਰ ਦੇਵੇ, ਤਾਂ ਕੋਈ ਵੀ ਬੱਚਾ, ਬਜ਼ੁਰਗ ਜਾਂ ਮਜ਼ਦੂਰ ਭੁੱਖ ਨਾਲ ਨਹੀਂ ਸੋਂਵੇਗਾ। ਗੁਰੂ ਨਾਨਕ ਫੂਡ ਬੈਂਕ ਅਜੇ ਵੀ ਉਮੀਦ ਨਾਲ ਭਰਿਆ ਹੋਇਆ ਹੈ ਕਿ ਸਰੀ ਅਤੇ ਡੈਲਟਾ ਦਾ ਭਾਈਚਾਰਾ ਇਸ ਮੁਸ਼ਕਲ ਘੜੀ ਵਿਚ ਅੱਗੇ ਆ ਕੇ ਲੋੜਵੰਦਾਂ ਦੀ ਲਾਜ਼ ਰੱਖੇਗਾ। This report was written by Divroop Kaur as part of the Local Journalism Initiative.