ਕਿਲੋਨਾ ਜਨਰਲ ਹਸਪਤਾਲ ਵਿੱਚ ‘ਹਾਲਵੇਅ ਹੈਲਥ ਕੇਅਰ’ ਦਾ ਸੰਕਟ ਬਰਕਰਾਰ

ਸਰੀ, (ਦਿਵਰੂਪ ਕੌਰ): ਕਿਲੋਨਾ ਜਨਰਲ ਹਸਪਤਾਲ (KGH) ਵਿੱਚ ਮਰੀਜ਼ਾਂ ਦੇ ਇਲਾਜ ਲਈ ਥਾਂ ਦੀ ਘਾਟ ਇੱਕ ਗੰਭੀਰ ਸਮੱਸਿਆ ਬਣਦੀ ਜਾ ਰਹੀ ਹੈ। ਕਿਲੋਨਾ ਦੀ ਵਸਨੀਕ ਨੈਨਸੀ ਮੈਕਡੋਨਲਡ, ਜੋ ਗੁਰਦੇ ਦੀ ਇੱਕ ਗੰਭੀਰ ਬਿਮਾਰੀ ਤੋਂ ਪੀੜਤ ਸੀ, ਨੇ ਹਾਲ ਹੀ ਵਿੱਚ ਹਸਪਤਾਲ ਦੇ ਸਟਾਫ ਵੱਲੋਂ ਦਿੱਤੀ ਗਈ ਦੇਖਭਾਲ ਦੀ ਸ਼ਲਾਘਾ ਕੀਤੀ ਹੈ ਪਰ ਹਸਪਤਾਲ ਦੇ ਪ੍ਰਬੰਧਾਂ ਉੱਤੇ ਸਵਾਲ ਖੜ੍ਹੇ ਕੀਤੇ ਹਨ। ਮੈਕਡੋਨਲਡ ਪਿਛਲੇ 2 ਸਾਲਾਂ ਤੋਂ ਇਸ ਹਸਪਤਾਲ ਵਿੱਚ ਇਲਾਜ ਅਧੀਨ ਰਹੀ ਹੈ ਅਤੇ ਉਸਦਾ ਕਹਿਣਾ ਹੈ ਕਿ ਉਹ ਸਟਾਫ ਦੀ ਮਿਹਨਤ ਕਾਰਨ ਹੀ ਅੱਜ ਜਿਉਂਦੀ ਹੈ। ਹਾਲਾਂਕਿ ਮੈਕਡੋਨਲਡ ਡਾਕਟਰਾਂ ਅਤੇ ਨਰਸਾਂ ਦੀ ਸੇਵਾ ਤੋਂ ਪੂਰੀ ਤਰ੍ਹਾਂ ਸੰਤੁਸ਼ਟ ਹੈ, ਪਰ ਹਸਪਤਾਲ ਦੇ ਹਾਲਵੇਅ ਯਾਨੀ ਗਲਿਆਰੇ ਵਿੱਚ ਇਲਾਜ ਕਰਵਾਉਣਾ ਉਸ ਲਈ ਇੱਕ ਡਰਾਉਣਾ ਅਤੇ ਅਣਸੁਖਾਵਾਂ ਅਨੁਭਵ ਰਿਹਾ ਹੈ। ਉਸ ਅਨੁਸਾਰ ਗਲਿਆਰੇ ਵਿੱਚ ਰਹਿਣ ਕਾਰਨ ਕਿਸੇ ਵੀ ਤਰ੍ਹਾਂ ਦੀ ਡਾਕਟਰੀ ਨਿਜਤਾ ਨਹੀਂ ਸੀ ਅਤੇ ਹਰ ਕੋਈ ਡਾਕਟਰ ਨਾਲ ਹੋ ਰਹੀ ਨਿੱਜੀ ਗੱਲਬਾਤ ਨੂੰ ਆਸਾਨੀ ਨਾਲ ਸੁਣ ਸਕਦਾ ਸੀ। ਇਸ ਤੋਂ ਇਲਾਵਾ ਦਿਨ ਵਿੱਚ ਕਈ ਵਾਰ ਹਸਪਤਾਲ ਦੇ ਐਮਰਜੈਂਸੀ ਅਲਰਟ ਉਸ ਦੇ ਬੈੱਡ ਦੇ ਬਿਲਕੁਲ ਕੋਲੋਂ ਗੁਜ਼ਰਦੇ ਸਨ ਜਿਸ ਨਾਲ ਮਾਨਸਿਕ ਤਣਾਅ ਹੋਰ ਵੀ ਵੱਧ ਜਾਂਦਾ ਸੀ।
ਹਸਪਤਾਲ ਦੇ ਗਲਿਆਰਿਆਂ ਵਿੱਚ ਮਰੀਜ਼ਾਂ ਨੂੰ ਰੱਖਣ ਦਾ ਮੁੱਦਾ ਮੰਗਲਵਾਰ ਨੂੰ ਵਿਧਾਨ ਸਭਾ ਵਿੱਚ ਪ੍ਰਸ਼ਨ ਕਾਲ ਦੌਰਾਨ ਜ਼ੋਰ-ਸ਼ੋਰ ਨਾਲ ਉੱਠਿਆ। ਕਿਲੋਨਾ-ਮਿਸ਼ਨ ਤੋਂ ਕੰਜ਼ਰਵੇਟਿਵ ਐਮਐਲਏ ਗੈਵਿਨ ਡਿਊ ਨੇ ਸਰਕਾਰ ਤੋਂ ਸਵਾਲ ਕੀਤਾ ਕਿ ਜਦੋਂ ਹਸਪਤਾਲ ਦੀਆਂ ਦੋ ਮੰਜ਼ਿਲਾਂ ਪੂਰੀ ਤਰ੍ਹਾਂ ਖਾਲੀ ਪਈਆਂ ਹਨ, ਤਾਂ ਮਰੀਜ਼ਾਂ ਨੂੰ ਗਲਿਆਰਿਆਂ ਵਿੱਚ ਕਿਉਂ ਲੇਟਣਾ ਪੈ ਰਿਹਾ ਹੈ। ਡਿਊ ਨੇ ਦੱਸਿਆ ਕਿ ਕਿਲੋਨਾ ਜਨਰਲ ਹਸਪਤਾਲ ਦੇ ਸੈਂਟੇਨੀਅਲ ਟਾਵਰ ਨੂੰ ਖੁੱਲ੍ਹੇ ਹੋਏ 13 ਸਾਲ ਹੋ ਚੁੱਕੇ ਹਨ, ਪਰ ਇਸਦੀ ਪੰਜਵੀਂ ਅਤੇ ਛੇਵੀਂ ਮੰਜ਼ਿਲ ਅਜੇ ਵੀ ਅਧੂਰੀ ਅਤੇ ਤਾਲੇ ਦੇ ਪਿੱਛੇ ਬੰਦ ਹੈ। ਇਹਨਾਂ ਦੋਵਾਂ ਮੰਜ਼ਿਲਾਂ ਉੱਤੇ 50 ਤੋਂ ਵੱਧ ਬੈੱਡਾਂ ਦੀ ਸਮਰੱਥਾ ਹੈ ਜੋ ਹਸਪਤਾਲ ਦੇ ਵਧਦੇ ਬੋਝ ਨੂੰ ਘੱਟ ਕਰਨ ਵਿੱਚ ਮਦਦਗਾਰ ਸਾਬਤ ਹੋ ਸਕਦੀ ਹੈ। ਉਹਨਾਂ ਚਿੰਤਾ ਜ਼ਾਹਰ ਕੀਤੀ ਕਿ ਇੰਨੇ ਲੰਬੇ ਸਮੇਂ ਬਾਅਦ ਵੀ ਇਸ ਜਗ੍ਹਾ ਦੀ ਵਰਤੋਂ ਨਾ ਕਰਨਾ ਲੋਕਾਂ ਨਾਲ ਬੇਇਨਸਾਫ਼ੀ ਹੈ।
ਇਨਫਰਾਸਟਰਕਚਰ ਮੰਤਰੀ ਬੋਵਿਨ ਮਾ ਨੇ ਸਦਨ ਵਿੱਚ ਮੰਨਿਆ ਕਿ ਸਿਹਤ ਸੇਵਾਵਾਂ ਦੇ ਖੇਤਰ ਵਿੱਚ ਅਜੇ ਬਹੁਤ ਕੁਝ ਕਰਨਾ ਬਾਕੀ ਹੈ। ਉਹਨਾਂ ਨੇ ਕਿਲੋਨਾ ਜਨਰਲ ਹਸਪਤਾਲ ਦੇ ਖਾਸ ਮੁੱਦੇ ਉੱਤੇ ਸਿੱਧਾ ਜਵਾਬ ਤਾਂ ਨਹੀਂ ਦਿੱਤਾ, ਪਰ ਇਹ ਜ਼ਰੂਰ ਕਿਹਾ ਕਿ ਬਜਟ 2026 ਵਿੱਚ ਹਸਪਤਾਲ ਦੇ ਵੱਡੇ ਪ੍ਰੋਜੈਕਟਾਂ ਵਿੱਚ ਨਿਵੇਸ਼ ਜਾਰੀ ਰੱਖਿਆ ਜਾਵੇਗਾ। ਮੰਤਰੀ ਨੇ ਬਾਅਦ ਵਿੱਚ ਇੱਕ ਈਮੇਲ ਰਾਹੀਂ ਦੱਸਿਆ ਕਿ ਉਹ ਹਸਪਤਾਲ ਵਿੱਚ ਮਰੀਜ਼ਾਂ ਲਈ ਥਾਂ ਦੀ ਘਾਟ ਦੀ ਸਮੱਸਿਆ ਤੋਂ ਜਾਣੂ ਹਨ। ਉਹਨਾਂ ਅਨੁਸਾਰ ਇੰਟੀਰੀਅਰ ਹੈਲਥ ਲਗਾਤਾਰ ਖੇਤਰੀ ਸਿਹਤ ਲੋੜਾਂ ਦਾ ਮੁਲਾਂਕਣ ਕਰ ਰਹੀ ਹੈ ਅਤੇ ਸਰਕਾਰ ਉਹਨਾਂ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਕਿਸੇ ਵੀ ਵਿਸਤਾਰ ਲਈ ਲੋੜੀਂਦਾ ਸਟਾਫ ਅਤੇ ਉਪਕਰਨ ਮੌਜੂਦ ਹੋਣ। ਹਾਲਾਂਕਿ ਸਰਕਾਰ ਵੱਲੋਂ ਇਹਨਾਂ ਦੋਵਾਂ ਮੰਜ਼ਿਲਾਂ ਨੂੰ ਖੋਲ੍ਹਣ ਸਬੰਧੀ ਕੋਈ ਵੀ ਸਪੱਸ਼ਟ ਸਮਾਂ-ਸੀਮਾ ਨਹੀਂ ਦੱਸੀ ਗਈ ਹੈ।
ਐਮਐਲਏ ਗੈਵਿਨ ਡਿਊ ਅਨੁਸਾਰ ਕਿਲੋਨਾ ਜਨਰਲ ਹਸਪਤਾਲ ਵਿੱਚ ਕਿਸੇ ਵੀ ਸਮੇਂ 50 ਦੇ ਕਰੀਬ ਮਰੀਜ਼ ਗਲਿਆਰਿਆਂ ਵਿੱਚ ਇਲਾਜ ਕਰਵਾ ਰਹੇ ਹੁੰਦੇ ਹਨ। ਉਹਨਾਂ ਨੇ ਇਸ ਗੱਲ ‘ਤੇ ਹੈਰਾਨੀ ਜਤਾਈ ਕਿ ਹੁਣ ਹਾਲਵੇਅ ਬੈੱਡਾਂ ਨੂੰ ਗੈਰ-ਅਧਿਕਾਰਤ ਤੋਂ ਅਧਿਕਾਰਤ ਬੈੱਡਾਂ ਵਿੱਚ ਬਦਲ ਦਿੱਤਾ ਗਿਆ ਹੈ, ਜੋ ਕਿ ਇੱਕ ਸਥਾਈ ਵਿਵਸਥਾ ਬਣਦੀ ਜਾ ਰਹੀ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਇਹ ਬੈੱਡ ਸੁਰੱਖਿਅਤ ਨਹੀਂ ਹਨ ਕਿਉਂਕਿ ਇੱਥੇ ਮਰੀਜ਼ਾਂ ਦੀ ਸਹੀ ਨਿਗਰਾਨੀ ਲਈ ਲੋੜੀਂਦੇ ਉਪਕਰਨ ਨਹੀਂ ਹੁੰਦੇ ਅਤੇ ਨਾ ਹੀ ਮਰੀਜ਼ ਦੀ ਇੱਜ਼ਤ ਅਤੇ ਨਿਜਤਾ ਦਾ ਕੋਈ ਪ੍ਰਬੰਧ ਹੁੰਦਾ ਹੈ। ਡਿਊ ਨੇ ਇਹ ਵੀ ਕਿਹਾ ਕਿ ਪਿਛਲੇ 13 ਸਾਲਾਂ ਵਿੱਚ ਕਿਲੋਨਾ ਦੀ ਆਬਾਦੀ ਵਿੱਚ ਭਾਰੀ ਵਾਧਾ ਹੋਇਆ ਹੈ ਅਤੇ ਸੈਂਟੇਨੀਅਲ ਟਾਵਰ ਦੀਆਂ ਖਾਲੀ ਮੰਜ਼ਿਲਾਂ ਨੂੰ ਇਸ ਵਧਦੀ ਲੋੜ ਲਈ ਹੀ ਬਣਾਇਆ ਗਿਆ ਸੀ।
ਸਥਾਨਕ ਲੋਕਾਂ ਅਤੇ ਸਿਆਸੀ ਆਗੂਆਂ ਦਾ ਮੰਨਣਾ ਹੈ ਕਿ ਹਸਪਤਾਲ ਦੇ ਵਿਸਤਾਰ ਲਈ ਹੁਣ ਹੋਰ ਉਡੀਕ ਨਹੀਂ ਕੀਤੀ ਜਾ ਸਕਦੀ। ਮਰੀਜ਼ਾਂ ਦਾ ਕਹਿਣਾ ਹੈ ਕਿ ਜਦੋਂ ਸਰੋਤ ਮੌਜੂਦ ਹਨ, ਤਾਂ ਉਹਨਾਂ ਨੂੰ ਗਲਿਆਰਿਆਂ ਵਿੱਚ ਰੁਲਣ ਲਈ ਨਹੀਂ ਛੱਡਿਆ ਜਾਣਾ ਚਾਹੀਦਾ। ਇੰਟੀਰੀਅਰ ਹੈਲਥ ਅਤੇ ਸੂਬਾ ਸਰਕਾਰ ਦੀ ਇਸ ਚੁੱਪ ਨੇ ਲੋਕਾਂ ਵਿੱਚ ਰੋਸ ਪੈਦਾ ਕਰ ਦਿੱਤਾ ਹੈ ਕਿਉਂਕਿ ਉਹ ਜਲਦ ਤੋਂ ਜਲਦ ਉਹਨਾਂ ਦੋਵਾਂ ਮੰਜ਼ਿਲਾਂ ਦੇ ਚਾਲੂ ਹੋਣ ਦੀ ਉਮੀਦ ਕਰ ਰਹੇ ਹਨ। ਅਜਿਹੇ ਵਿੱਚ ਸਿਹਤ ਪ੍ਰਣਾਲੀ ਦੀ ਕਾਰਗੁਜ਼ਾਰੀ ਅਤੇ ਬੁਨਿਆਦੀ ਢਾਂਚੇ ਦੇ ਸਹੀ ਇਸਤੇਮਾਲ ਉੱਤੇ ਸਵਾਲ ਉੱਠਣੇ ਸੁਭਾਵਿਕ ਹਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਕੀ ਸਰਕਾਰ ਬਜਟ 2026 ਦੇ ਵਾਅਦਿਆਂ ਨੂੰ ਜਲਦ ਪੂਰਾ ਕਰਦੀ ਹੈ ਜਾਂ ਮਰੀਜ਼ਾਂ ਨੂੰ ਅਜੇ ਹੋਰ ਲੰਬੇ ਸਮੇਂ ਤੱਕ ਗਲਿਆਰਿਆਂ ਵਿੱਚ ਹੀ ਦਿਨ ਕੱਟਣੇ ਪੈਣਗੇ। This report was written by Divroop Kaur as part of the Local Journalism Initiative.