ਧਨ ਦੌਲਤ ਦੀ ਸ਼ਕਤੀ ਦਾ ਪ੍ਰਦਰਸ਼ਨ ਭੈਣ ਭਰਾਵਾਂ ਵਿਚ ।
ਮੁੱਕ ਗਿਆ ਹੈ ਰਿਸ਼ਤੇ ਦਾ ਆਕਰਸ਼ਣ ਭੈਣ ਭਰਾਵਾਂ ਵਿਚ ।
ਹਰ ਇਕ ਰਿਸ਼ਤਾ ਟੁਕੜੇ-ਟੁਕੜੇ ਹੋ ਕੇ ਨਜ਼ਰੀਂ ਆਉਂਦਾ ਹੈ ,
ਨਫ਼ਰਤ ਨੇ ਹੀ ਵੰਡ ਦਿੱਤਾ ਹੈ ਦਰਪਣ ਭੈਣ ਭਰਾਵਾਂ ਵਿਚ ।
ਜਦ ਤਕ ਮਾਪਿਆਂ ਦੀ ਦੌਲਤ ਸੀ ਖ਼ੁਸ਼ੀਆਂ ਸ਼ੌਂਕ ਬਹਾਰਾਂ ਸੀ,
ਮੰਦਿਰ ਵਾਂਗੂੰ ਹੋਵੇ ਪੂਜਾ ਅਰਚਨ ਭੈਣ ਭਰਾਵਾਂ ਵਿਚ ।
ਜਦ ਤਕ ਨਿੱਸ ਸਵਾਰਥ ਹੋ ਕੇ ਇਕੱਠੇ ਮਿਲਦੇ ਬਹਿੰਦਾ ਆ,
ਤਦ ਤਕ ਰਹਿੰਦਾ ਘੁਮੰਡ ਰਹਿਤ ਸਮਰਪਣ ਭੈਣ ਭਰਾਵਾਂ ਵਿਚ ।
ਹੁਣ ਨਈੰ ਹੁੰਦੇ ਨਿੱਸ ਸਵਾਰਥ ਖ਼ੁਸ਼ੀਆਂ ਖੇੜੇ, ਰਹਿਮਤ ਦੇ,
ਆਯੋਜਨ, ਪ੍ਰਯੋਜਨ ਤੇ ਸ਼ੁਭਕਰਮਨ ਭੈਣ ਭਰਾਵਾਂ ਵਿਚ ।
ਇਕ ਦੂਜੇ ਦੇ ਦੁਖ-ਸੁਖ ਵਿਚ ਮਹਿਸੂਸ ਅਤੇ ਅਹਿਸਾਨ ਬਣਨ,
ਖੂਨ ‘ਚ ਹੁੰਦੀ ਸੀ ਇਕ ਸਾਂਝੀ ਧੜਕਨ ਭੈਣ ਭਰਾਵਾਂ ਵਿਚ ।
ਮੋਹ ਮਮਤਾ ਦਾ ਸਾਰਾ ਦਰਿਆ ਸੁੱਕ ਗਿਆ ਹੈ, ਮੁੱਕ ਗਿਆ ਹੈ,
ਲੈ ਬੈਠੀ ਏ ਇਕ ਦੂਜੇ ਦੀ ਅਕੜਨ ਭੈਣ ਭਰਾਵਾਂ ਵਿਚ ।
ਝੂਠੀ ਸ਼ਿਸ਼ਟਾਚਾਰ ਨਿਭਾਂਦੇ, ਝੂਠੀ ਹੀ ਉਪਚਾਰਿਕਤਾ,
ਅਰਥੀ ਤੇ ਵੀ ਹੋਣ ਨਾ ਹੰਝੂ ਸਿਰਜਨ ਭੈਣ ਭਰਾਵਾਂ ਵਿਚ ।
ਸ਼ਗਨ- ਲਿਫਾਫੇ ਦੇ ਵਿਚ ਹੋਈ ਸੀਮਤ ਸਾਰੀ ਮਰਿਆਦਾ,
ਭੰਗੜੇ ਦੀ ਮੰਤਰ ਮੁਗਧ ਜਿਹੀ ਥਿਰਕਨ ਭੈਣ ਭਰਾਵਾਂ ਵਿਚ ।
‘ਬਾਲਮ’ ਦੁਸ਼ਮਣ ਬਣ ਜਾਵੇਗਾ ਪੀੜੀ ਦਰ ਪੀੜੀ ਵੇਖੀਂ ,
ਜੇੇਰਰ ਸ਼ੁਧਤਾ ਨਾਲ ਨਾ ਹੋਇਆ ਅਰਪਨ ਭੈਣ ਭਰਾਵਾਂ ਵਿਚ ।
ਲੇਖਕ : ਬਲਵਿੰਦਰ ਬਾਲਮ ਗੁਰਦਾਸਪੁਰ, ਮੋ. 98156-25409