ਸਰੀ, (ਦਿਵਰੂਪ ਕੌਰ): ਕੈਨੇਡਾ ਦੇ ਪ੍ਰਸਿੱਧ ਜੈਸਪਰ ਨੈਸ਼ਨਲ ਪਾਰਕ ਵਿੱਚ ਸਥਿਤ ਕੋਲੰਬੀਆ ਆਈਸਫੀਲਡ ‘ਤੇ ਇੱਕ ਬਹੁਤ ਹੀ ਦਰਦਨਾਕ ਹਾਦਸਾ ਵਾਪਰਿਆ ਹੈ, ਜਿੱਥੇ ਇੱਕ 38 ਸਾਲਾ ਵਿਅਕਤੀ ਦੀ ਗਲੇਸ਼ੀਅਰ ਵਿੱਚ ਬਣੀ ਬਰਫ਼ ਦੀ ਡੂੰਘੀ ਖੱਡ (ਕ੍ਰੇਵਾਸ) ਵਿੱਚ ਡਿੱਗਣ ਕਾਰਨ ਮੌਤ ਹੋ ਗਈ। ਆਰਸੀਐਮਪੀ (RCMP) ਵੱਲੋਂ ਦੇਰੀ ਨਾਲ ਸਾਂਝੀ ਕੀਤੀ ਗਈ ਜਾਣਕਾਰੀ ਮੁਤਾਬਕ ਇਹ ਘਟਨਾ 12 ਮਈ ਨੂੰ ਉਸ ਵੇਲੇ ਵਾਪਰੀ ਜਦੋਂ ਤਿੰਨ ਦੋਸਤ ਅਥਾਬਾਸਕਾ ਗਲੇਸ਼ੀਅਰ ‘ਤੇ ਮਨੋਰੰਜਨ ਲਈ ਸਕੀਇੰਗ ਅਤੇ ਸਨੋਬੋਰਡਿੰਗ ਕਰ ਰਹੇ ਸਨ। ਇਸੇ ਦੌਰਾਨ ਉਨ੍ਹਾਂ ਵਿੱਚੋਂ ਇੱਕ ਦੋਸਤ ਸੰਤੁਲਨ ਵਿਗੜਨ ਕਾਰਨ ਲਗਭਗ 25 ਮੀਟਰ ਡੂੰਘੀ ਬਰਫ਼ ਦੀ ਖੱਡ ਵਿੱਚ ਜਾ ਡਿੱਗਿਆ।
ਆਰਸੀਐਮਪੀ ਦੇ ਜਨਤਕ ਸੂਚਨਾ ਅਧਿਕਾਰੀ ਮੈਥਿਊ ਹਾਵੇਲ ਨੇ ਦੱਸਿਆ ਕਿ ਸ਼ਾਮ 5:30 ਵਜੇ ਦੇ ਕਰੀਬ ਪਾਰਕਸ ਕੈਨੇਡਾ ਵੱਲੋਂ ਪੁਲਿਸ ਨੂੰ ਇਸ ਹਾਦਸੇ ਦੀ ਸੂਚਨਾ ਦਿੱਤੀ ਗਈ ਸੀ। ਇਸ ਤੋਂ ਬਾਅਦ ਪੁਲਿਸ ਅਤੇ ਬਚਾਅ ਟੀਮਾਂ ਤੁਰੰਤ ਹਰਕਤ ਵਿੱਚ ਆਈਆਂ ਅਤੇ ਲਗਭਗ 90 ਮਿੰਟਾਂ ਬਾਅਦ ਮੌਕੇ ‘ਤੇ ਪਹੁੰਚ ਕੇ ਸੁਰੱਖਿਆ ਪ੍ਰਬੰਧਾਂ ਦਾ ਜਾਇਜ਼ਾ ਲਿਆ। ਜੈਸਪਰ ਨੈਸ਼ਨਲ ਪਾਰਕ ਦੀ ਵਿਜ਼ਿਟਰ ਸੇਫਟੀ ਟੀਮ ਨੇ ਖੱਡ ਦੇ ਅੰਦਰ ਜਾਂਚ ਕਰਨ ਤੋਂ ਬਾਅਦ ਪੁਲਿਸ ਨੂੰ ਪੁਸ਼ਟੀ ਕੀਤੀ ਕਿ ਉਨ੍ਹਾਂ ਨੇ ਮਰੀਜ਼ ਨੂੰ ਦੇਖ ਲਿਆ ਹੈ ਅਤੇ ਉਸ ਦੀ ਮੌਤ ਹੋ ਚੁੱਕੀ ਹੈ।
ਖ਼ਰਾਬ ਮੌਸਮ ਅਤੇ ਹਾਦਸੇ ਵਾਲੀ ਜਗ੍ਹਾ ਦੇ ਬਹੁਤ ਦੂਰ ਅਤੇ ਦੁਰਗਮ ਖੇਤਰ ਵਿੱਚ ਹੋਣ ਕਾਰਨ ਮ੍ਰਿਤਕ ਦੀ ਦੇਹ ਨੂੰ ਤੁਰੰਤ ਬਾਹਰ ਕੱਢਣਾ ਸੰਭਵ ਨਹੀਂ ਸੀ। ਪੁਲਿਸ ਰਿਕਾਰਡ ਅਨੁਸਾਰ ਦੋ ਦਿਨਾਂ ਦੀ ਸਖ਼ਤ ਮੁਸ਼ਕਿਲ ਮੁਹਿੰਮ ਤੋਂ ਬਾਅਦ 14 ਮਈ ਨੂੰ ਲਾਸ਼ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਜਾ ਸਕਿਆ। ਮ੍ਰਿਤਕ ਦੀ ਪਛਾਣ ਚੈੱਕ ਗਣਰਾਜ ਦੇ ਇੱਕ ਨਾਗਰਿਕ ਵਜੋਂ ਹੋਈ ਹੈ, ਜੋ ਅੱਜਕੱਲ੍ਹ ਬ੍ਰਿਟਿਸ਼ ਕੋਲੰਬੀਆ ਦੇ ਰੇਵਲਸਟੋਕ ਸ਼ਹਿਰ ਵਿੱਚ ਰਹਿ ਰਿਹਾ ਸੀ। ਉਸ ਦੇ ਬਾਕੀ ਦੋਵੇਂ ਦੋਸਤ ਵੀ ਉਸੇ ਸ਼ਹਿਰ ਦੇ ਨਿਵਾਸੀ ਹਨ, ਜਿਨ੍ਹਾਂ ਕੋਲੋਂ ਪੁਲਿਸ ਨੇ ਪੁੱਛਗਿੱਛ ਕੀਤੀ ਹੈ। ਪੁਲਿਸ ਇਸ ਨੂੰ ਇੱਕ ਅਚਾਨਕ ਹੋਈ ਦੁਰਘਟਨਾ ਵਜੋਂ ਦੇਖ ਰਹੀ ਹੈ ਅਤੇ ਕਿਸੇ ਵੀ ਸਾਜ਼ਿਸ਼ ਤੋਂ ਇਨਕਾਰ ਕੀਤਾ ਹੈ।
ਕੋਲੰਬੀਆ ਆਈਸਫੀਲਡ ਸੈਲਾਨੀਆਂ ਲਈ ਜਿੰਨਾ ਖਿੱਚ ਦਾ ਕੇਂਦਰ ਹੈ, ਉੱਥੇ ਹੀ ਇਹ ਬਹੁਤ ਖ਼ਤਰਨਾਕ ਖੇਤਰ ਵੀ ਮੰਨਿਆ ਜਾਂਦਾ ਹੈ। ਪਾਰਕਸ ਕੈਨੇਡਾ ਦੀ ਵੈੱਬਸਾਈਟ ਮੁਤਾਬਕ ਇਸ ਖੇਤਰ ਨੂੰ ਐਵਲੈਂਚ ਟੈਰੇਨ ਐਕਸਪੋਜ਼ਰ ਸਕੇਲ ‘ਤੇ ਕਲਾਸ 3 ਦੀ ਸ਼੍ਰੇਣੀ ਵਿੱਚ ਰੱਖਿਆ ਗਿਆ ਹੈ। ਇਸ ਸ਼੍ਰੇਣੀ ਦਾ ਮਤਲਬ ਹੈ ਕਿ ਇੱਥੇ ਬਰਫ਼ ਦੇ ਤੋਦੇ ਡਿੱਗਣ, ਤਿੱਖੀਆਂ ਚਟਾਨਾਂ ਅਤੇ ਬਰਫ਼ ਦੀਆਂ ਲੁਕੀਆਂ ਹੋਈਆਂ ਡੂੰਘੀਆਂ ਖੱਡਾਂ ਦਾ ਬਹੁਤ ਜ਼ਿਆਦਾ ਖ਼ਤਰਾ ਰਹਿੰਦਾ ਹੈ। ਪ੍ਰਸ਼ਾਸਨ ਨੇ ਚੇਤਾਵਨੀ ਦਿੱਤੀ ਹੈ ਕਿ ਅਜਿਹੇ ਸਥਾਨਾਂ ‘ਤੇ ਜਾਣ ਲਈ ਉੱਚ ਪੱਧਰੀ ਹੁਨਰ, ਵਿਸ਼ੇਸ਼ ਉਪਕਰਨ ਅਤੇ ਬਚਾਅ ਤਕਨੀਕਾਂ ਦੀ ਜਾਣਕਾਰੀ ਹੋਣਾ ਬਹੁਤ ਜ਼ਰੂਰੀ ਹੈ। This report was written by Divroop Kaur as part of the Local Journalism Initiative.
Saturday, May 23, 2026
