ਸਾਈਟ ਸੀ ਡੈਮ ਦਾ ਨਵਾਂ ਨਾਮ ‘ਦ ਜੌਹਨ ਹੋਰਗਨ ਡੈਮ’ ਰੱਖਣ ਦਾ ਐਲਾਨ

ਸਰੀ, (ਦਿਵਰੂਪ ਕੌਰ): ਬੀਸੀ ਹਾਈਡਰੋ ਵੱਲੋਂ ਸਾਈਟ ਸੀ ਡੈਮ ਦਾ ਅਧਿਕਾਰਤ ਤੌਰ ਉੱਤੇ ਨਾਮ ‘ਦ ਜੌਹਨ ਹੋਰਗਨ ਡੈਮ ਐਂਡ ਜਨਰੇਟਿੰਗ ਸਟੇਸ਼ਨ’ ਰੱਖਣ ਦਾ ਐਲਾਨ ਕੀਤਾ ਗਿਆ ਹੈ। ਇਹ ਨਾਮ ਸਾਬਕਾ ਪ੍ਰੀਮੀਅਰ ਜੌਹਨ ਹੋਰਗਨ ਨੂੰ ਸਨਮਾਨਿਤ ਕਰਨ ਅਤੇ ਸੂਬੇ ਦੇ ਲੋਕਾਂ ਪ੍ਰਤੀ ਉਨ੍ਹਾਂ ਦੀ ਸ਼ਾਨਦਾਰ ਸੇਵਾ ਅਤੇ ਵਚਨਬੱਧਤਾ ਨੂੰ ਮਾਨਤਾ ਦੇਣ ਲਈ ਰੱਖਿਆ ਗਿਆ ਹੈ। ਮੌਜੂਦਾ ਪ੍ਰੀਮੀਅਰ ਡੇਵਿਡ ਈਬੀ ਨੇ ਇਸ ਮੌਕੇ ਕਿਹਾ ਕਿ ਜੌਹਨ ਹੋਰਗਨ ਦੀ ਅਗਵਾਈ ਨੇ ਸੂਬੇ ਦੇ ਸਾਫ਼ ਊਰਜਾ ਭਵਿੱਖ ਨੂੰ ਸੁਰੱਖਿਅਤ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਜ਼ਿਕਰਯੋਗ ਹੈ ਕਿ ਇਸ ਡੈਮ ਦਾ ਨਿਰਮਾਣ ਜੁਲਾਈ 2015 ਵਿੱਚ ਸ਼ੁਰੂ ਹੋਇਆ ਸੀ ਅਤੇ ਇਸ ਦੀਆਂ ਸਾਰੀਆਂ 6 ਜਨਰੇਟਿੰਗ ਯੂਨਿਟਾਂ ਅਗਸਤ 2025 ਤੱਕ ਪੂਰੀ ਤਰ੍ਹਾਂ ਸੇਵਾ ਵਿੱਚ ਆ ਜਾਣਗੀਆਂ। ਊਰਜਾ ਮੰਤਰੀ ਐਡਰੀਅਨ ਡਿਕਸ ਨੇ ਵੀ ਸਾਬਕਾ ਪ੍ਰੀਮੀਅਰ ਦੇ ਯਤਨਾਂ ਦੀ ਭਰਪੂਰ ਸ਼ਲਾਘਾ ਕੀਤੀ। ਇਸ ਪ੍ਰੋਜੈਕਟ ਦੇ ਰਿਜ਼ਰਵਾਇਰ ਨੂੰ ਸਥਾਨਕ ਫਸਟ ਨੇਸ਼ਨਜ਼ ਦੇ ਸਹਿਯੋਗ ਨਾਲ ‘ਡਰੀਮਰ ਲੇਕ’ ਦਾ ਨਾਮ ਦਿੱਤਾ ਗਿਆ ਹੈ। ਇਹ ਨਾਮ ਇਸ ਖੇਤਰ ਅਤੇ ਪੀਸ ਰਿਵਰ ਨਾਲ ਮੂਲ ਨਿਵਾਸੀਆਂ ਦੇ ਇਤਿਹਾਸਕ ਅਤੇ ਸੱਭਿਆਚਾਰਕ ਸਬੰਧਾਂ ਨੂੰ ਦਰਸਾਉਂਦਾ ਹੈ। ਬੀਸੀ ਹਾਈਡਰੋ ਨੇ ਨਾਮਕਰਨ ਦੀ ਪ੍ਰਕਿਰਿਆ ਵਿੱਚ ਟ੍ਰੀਟੀ 8 ਫਸਟ ਨੇਸ਼ਨਜ਼ ਨੂੰ ਸ਼ਾਮਲ ਕੀਤਾ ਸੀ। ਬਲੂਬੇਰੀ ਰਿਵਰ ਫਸਟ ਨੇਸ਼ਨਜ਼ ਦੀ ਚੀਫ ਸ਼ੈਰੀ ਡੋਮਿਨਿਕ ਨੇ ਕਿਹਾ ਕਿ ਇਹ ਨਾਮ ਉਨ੍ਹਾਂ ਦੇ ਸ਼ਾਨਦਾਰ ਇਤਿਹਾਸ ਅਤੇ ਧਰਤੀ ਨਾਲ ਜੁੜੇ ਰਿਸ਼ਤੇ ਨੂੰ ਦਰਸਾਉਂਦਾ ਹੈ। ਬੀਸੀ ਹਾਈਡਰੋ ਦੀ ਸੀਈਓ ਸ਼ਾਰਲੋਟ ਮਿਥਾ ਨੇ ਵੀ ਜੌਹਨ ਹੋਰਗਨ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੀ ਬਦੌਲਤ ਹੀ ਅੱਜ ਸੂਬੇ ਕੋਲ ਭਰੋਸੇਮੰਦ ਊਰਜਾ ਦਾ ਸਰੋਤ ਮੌਜੂਦ ਹੈ। ਇਹ ਨਵੇਂ ਨਾਮ ਭਵਿੱਖ ਦੀਆਂ ਪੀੜ੍ਹੀਆਂ ਲਈ ਸਾਫ਼ ਊਰਜਾ ਅਤੇ ਭਾਈਚਾਰਕ ਸਾਂਝ ਦਾ ਪ੍ਰਤੀਕ ਬਣਨਗੇ। ਇਸ ਡੈਮ ਦੇ ਨਿਰਮਾਣ ਅਤੇ ਨਾਮਕਰਨ ਦੀ ਪ੍ਰਕਿਰਿਆ ਵਿੱਚ ਸਥਾਨਕ ਭਾਈਚਾਰਿਆਂ ਦੀ ਸ਼ਮੂਲੀਅਤ ਨੂੰ ਖਾਸ ਅਹਿਮੀਅਤ ਦਿੱਤੀ ਗਈ ਹੈ। ਡੋਇਗ ਰਿਵਰ ਫਸਟ ਨੇਸ਼ਨ ਅਤੇ ਬਲੂਬੇਰੀ ਰਿਵਰ ਫਸਟ ਨੇਸ਼ਨਜ਼ ਵੱਲੋਂ ਸਾਂਝੇ ਤੌਰ ਉੱਤੇ ਰਿਜ਼ਰਵਾਇਰ ਦਾ ਨਾਮ ‘ਡਰੀਮਰ ਲੇਕ’ ਰੱਖਣ ਦਾ ਸੁਝਾਅ ਦਿੱਤਾ ਗਿਆ ਸੀ, ਜੋ ਕਿ ਬੀਵਰ ਭਾਸ਼ਾ ਵਿੱਚੋਂ ਲਿਆ ਗਿਆ ਹੈ। ਇਹ ਪ੍ਰੋਜੈਕਟ ਨਾ ਸਿਰਫ਼ ਬ੍ਰਿਟਿਸ਼ ਕੋਲੰਬੀਆ ਦੇ ਸਭ ਤੋਂ ਵਿਸ਼ਾਲ ਬੁਨਿਆਦੀ ਢਾਂਚੇ ਦੇ ਪ੍ਰੋਜੈਕਟਾਂ ਵਿੱਚੋਂ 1 ਹੈ, ਸਗੋਂ ਇਹ ਭਵਿੱਖ ਵਿੱਚ ਲਗਾਤਾਰ ਵੱਧ ਰਹੀ ਬਿਜਲੀ ਦੀ ਮੰਗ ਨੂੰ ਪੂਰਾ ਕਰਨ ਲਈ 1 ਮੀਲ ਪੱਥਰ ਸਾਬਤ ਹੋਵੇਗਾ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਇਹ ਡੈਮ ਅਤੇ ਜਨਰੇਟਿੰਗ ਸਟੇਸ਼ਨ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਭਰੋਸੇਯੋਗ ਅਤੇ ਸਾਫ਼ ਊਰਜਾ ਯਕੀਨੀ ਬਣਾਉਣ ਦੇ ਨਾਲ ਨਾਲ ਭਾਈਚਾਰਕ ਸਾਂਝ ਅਤੇ ਮੇਲ ਮਿਲਾਪ ਦੀ 1 ਮਜ਼ਬੂਤ ਨੀਂਹ ਵਜੋਂ ਵੀ ਹਮੇਸ਼ਾ ਖੜ੍ਹਾ ਰਹੇਗਾ। This report was written by Divroop Kaur as part of the Local Journalism Initiative.