ਗੁਰਮੋਹ ਨੂੰ ਦੀ ਜਾਨ ਬਚਾਉਣ ਲਈ ਸਰੀ ਦੇ ਪਰਿਵਾਰ ਨੇ ਸ਼ੁਰੂ ਕੀਤਾ 120 ਕਿਲੋਮੀਟਰ ਦਾ ਪੈਦਲ ਸਫ਼ਰ

ਸਰੀ, (ਦਿਵਰੂਪ ਕੌਰ): ਸਰੀ ਦਾ ਇੱਕ ਪਰਿਵਾਰ ਆਪਣੇ 3 ਸਾਲ ਦੇ ਬੱਚੇ ਦੀ ਜਾਨ ਬਚਾਉਣ ਲਈ ਵੈਨਕੂਵਰ ਤੋਂ ਵਿਕਟੋਰੀਆ ਵਿੱਚ ਬੀ.ਸੀ. ਵਿਧਾਨ ਸਭਾ ਤੱਕ 120 ਕਿਲੋਮੀਟਰ ਦਾ ਪੈਦਲ ਸਫ਼ਰ ਤੈਅ ਕਰ ਰਿਹਾ ਹੈ। ਉਨ੍ਹਾਂ ਦਾ ਪੁੱਤਰ ਗੁਰਮੋਹ ਇੱਕ ਬਹੁਤ ਹੀ ਦੁਰਲੱਭ ਅਤੇ ਗੰਭੀਰ ਨਿਊਰੋਡੀਜਨਰੇਟਿਵ ਬਿਮਾਰੀ ਨਾਲ ਜੂਝ ਰਿਹਾ ਹੈ। ਗੁਰਮੋਹ ਨੂੰ ਸਪਾਸਟਿਕ ਪੈਰਾਪਲੇਜੀਆ ਨਾਮਕ ਬਿਮਾਰੀ ਹੈ ਜੋ ਕਿ ਡੀ ਨੋਵੋ ਮਿਊਟੇਸ਼ਨ ਕਾਰਨ ਹੁੰਦੀ ਹੈ। ਇਸ ਦਾ ਮਤਲਬ ਹੈ ਕਿ ਇਹ ਜੈਨੇਟਿਕ ਬਦਲਾਅ ਮਾਪਿਆਂ ਤੋਂ ਨਹੀਂ ਆਇਆ। ਇਸ ਬਿਮਾਰੀ ਕਾਰਨ ਮਾਸਪੇਸ਼ੀਆਂ ਵਿੱਚ ਅਕੜਾਅ, ਬੋਲਣ ਵਿੱਚ ਮੁਸ਼ਕਿਲ ਅਤੇ ਲੱਤਾਂ ਵਿੱਚ ਕਮਜ਼ੋਰੀ ਆ ਜਾਂਦੀ ਹੈ। ਇਹ ਬਿਮਾਰੀ ਰੀੜ੍ਹ ਦੀ ਹੱਡੀ ਦੀਆਂ ਉਨ੍ਹਾਂ ਨਸਾਂ ਨੂੰ ਪ੍ਰਭਾਵਿਤ ਕਰਦੀ ਹੈ ਜੋ ਸਰੀਰ ਦੀਆਂ ਹਰਕਤਾਂ ਨੂੰ ਕੰਟਰੋਲ ਕਰਦੀਆਂ ਹਨ।
ਗੁਰਮੋਹ ਦੇ ਮਾਪੇ ਸਟਾਲਿਨ ਅਤੇ ਨਵਪ੍ਰੀਤ ਗਿੱਲ ਆਪਣੇ ਪੁੱਤਰ ਲਈ ਇੱਕ ਵਿਸ਼ੇਸ਼ ਜੀਨ ਥੈਰੇਪੀ ਤਿਆਰ ਕਰਵਾਉਣ ਵਾਸਤੇ 2.7 ਮਿਲੀਅਨ ਡਾਲਰ ਇਕੱਠੇ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਕੈਨੇਡਾ ਵਿੱਚ ਇਸ ਬਿਮਾਰੀ ਦਾ ਇਹ ਇੱਕੋ ਇੱਕ ਮਾਮਲਾ ਹੈ। ਇਕੱਠੀ ਕੀਤੀ ਗਈ ਰਕਮ ਇਸ ਥੈਰੇਪੀ ਨੂੰ ਵਿਕਸਤ ਕਰਨ ਅਤੇ ਲਾਗੂ ਕਰਨ ‘ਤੇ ਖਰਚ ਕੀਤੀ ਜਾਵੇਗੀ। ਨਵਪ੍ਰੀਤ ਗਿੱਲ ਨੇ ਦੱਸਿਆ ਕਿ ਮੈਕਗਿੱਲ ਯੂਨੀਵਰਸਿਟੀ ਨੇ ਉਨ੍ਹਾਂ ਦੇ ਬੱਚੇ ਲਈ ਇਹ ਥੈਰੇਪੀ ਤਿਆਰ ਕਰਨ ਦੀ ਜ਼ਿੰਮੇਵਾਰੀ ਲਈ ਹੈ। ਇਸ ਇਲਾਜ ਨੂੰ ਵਿਕਸਤ ਕਰਨ, ਖੋਜ ਕਰਨ ਅਤੇ ਕਲੀਨਿਕਲ ਟਰਾਇਲ ਪੂਰੇ ਕਰਨ ਲਈ ਕੁੱਲ ਖਰਚਾ 6 ਤੋਂ 8 ਮਿਲੀਅਨ ਡਾਲਰ ਦੇ ਵਿਚਕਾਰ ਆਉਣ ਦਾ ਅਨੁਮਾਨ ਹੈ। ਪਰਿਵਾਰ ਨੂੰ 2.7 ਮਿਲੀਅਨ ਡਾਲਰ ਦੇ ਸ਼ੁਰੂਆਤੀ ਟੀਚੇ ਤੱਕ ਪਹੁੰਚਣ ਲਈ ਹੁਣ ਸਿਰਫ਼ 700,000 ਡਾਲਰ ਦੀ ਹੋਰ ਲੋੜ ਹੈ। ਪੀੜਤ ਪਰਿਵਾਰ ਨੇ ਜ਼ਿਆਦਾਤਰ ਪੈਸਾ ਭਾਈਚਾਰਕ ਸਹਿਯੋਗ, ਗੋਫੰਡਮੀ (GoFundMe) ਅਤੇ ਰੇਡੀਓਥੌਨ ਰਾਹੀਂ ਇਕੱਠਾ ਕੀਤਾ ਹੈ।
ਇਹ ਪੈਦਲ ਮਾਰਚ ਵੀਰਵਾਰ 21 ਮਈ ਨੂੰ ਸਵੇਰੇ 10:30 ਵਜੇ ਡਾਊਨਟਾਊਨ ਵੈਨਕੂਵਰ ਦੇ ਕੈਨੇਡਾ ਪਲੇਸ ਤੋਂ ਸ਼ੁਰੂ ਹੋਇਆ ਅਤੇ 25 ਮਈ ਨੂੰ ਵਿਕਟੋਰੀਆ ਵਿਧਾਨ ਸਭਾ ਪਹੁੰਚ ਕੇ ਸਮਾਪਤ ਹੋਵੇਗਾ। ਗੁਰਮੋਹ ਦੀ ਮਾਤਾ ਡਾਕਟਰ ਨਵਪ੍ਰੀਤ ਗਿੱਲ ਨੇ ਕਿਹਾ ਕਿ ਉਹ ਇਸ ਲਈ ਤੁਰ ਰਹੇ ਹਨ ਕਿਉਂਕਿ ਉਨ੍ਹਾਂ ਦਾ ਪੁੱਤਰ ਜ਼ਿੰਦਗੀ ਜਿਉਣ ਦਾ ਹੱਕਦਾਰ ਹੈ। ਉਨ੍ਹਾਂ ਕਿਹਾ ਕਿ ਹਰ ਕਿਲੋਮੀਟਰ ਗੁਰਮੋਹ ਅਤੇ ਬਿਨਾਂ ਸਹਿਯੋਗ ਤੋਂ ਦੁਰਲੱਭ ਬਿਮਾਰੀਆਂ ਨਾਲ ਲੜ ਰਹੇ ਹਰ ਪਰਿਵਾਰ ਨੂੰ ਸਮਰਪਿਤ ਹੈ। ਉਨ੍ਹਾਂ ਨੇ ਬ੍ਰਿਟਿਸ਼ ਕੋਲੰਬੀਆ ਦੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਉਨ੍ਹਾਂ ਦੇ ਨਾਲ ਤੁਰਨ, ਰਸਤੇ ਵਿੱਚ ਮਿਲਣ ਜਾਂ ਵਿਧਾਨ ਸਭਾ ਵਿੱਚ ਉਨ੍ਹਾਂ ਦਾ ਸਾਥ ਦੇਣ। ਇਸ ਸਫ਼ਰ ਦੌਰਾਨ ਫੰਡ ਇਕੱਠਾ ਕਰਨ ਲਈ ਕਈ ਥਾਵਾਂ ‘ਤੇ ਰੁਕਿਆ ਜਾਵੇਗਾ ਜਿਨ੍ਹਾਂ ਵਿੱਚ ਨਿਊ ਵੈਸਟਮਿੰਸਟਰ ਦਾ ਗੁਰਦੁਆਰਾ ਸੁਖ ਸਾਗਰ ਅਤੇ ਤਵਾਸਨ ਮਿਲਜ਼ ਸ਼ਾਮਲ ਹਨ।
ਤੈਅ ਕੀਤੇ ਗਏ ਪ੍ਰੋਗਰਾਮ ਅਨੁਸਾਰ ਪਹਿਲੇ ਦਿਨ ਵੀਰਵਾਰ 21 ਮਈ ਨੂੰ ਸਵੇਰੇ 10:00 ਵਜੇ ਕੈਨੇਡਾ ਪਲੇਸ ਵਿਖੇ ਮੀਡੀਆ ਨਾਲ ਗੱਲਬਾਤ ਕੀਤੀ ਗਈ ਅਤੇ 10:30 ਵਜੇ ਸਫ਼ਰ ਸ਼ੁਰੂ ਹੋਇਆ। ਦੁਪਹਿਰ 12:00 ਵਜੇ ਕਿੰਗਸਕਰੈਸਟ ਪਾਰਕ ਅਤੇ 2:30 ਵਜੇ ਸੈਂਟਰਲ ਪਾਰਕ ਵਿਖੇ ਆਰਾਮ ਕੀਤਾ ਗਿਆ। ਪਹਿਲੇ ਦਿਨ ਦਾ ਸਫ਼ਰ ਸ਼ਾਮ 5:45 ਵਜੇ ਨਿਊ ਵੈਸਟਮਿੰਸਟਰ ਦੇ ਗੁਰਦੁਆਰਾ ਸੁਖ ਸਾਗਰ ਵਿਖੇ ਸਮਾਪਤ ਹੋਇਆ ਜਿੱਥੇ ਸ਼ਾਮ 7:00 ਵਜੇ ਤੱਕ ਫੰਡ ਇਕੱਠਾ ਕਰਨ ਦਾ ਕੰਮ ਚੱਲਿਆ। ਦੂਜੇ ਦਿਨ ਸ਼ੁੱਕਰਵਾਰ 22 ਮਈ ਨੂੰ ਸਵੇਰੇ 9:00 ਵਜੇ ਗੁਰਦੁਆਰਾ ਸੁਖ ਸਾਗਰ ਤੋਂ ਚਾਲੇ ਪਾਏ ਜਾਣਗੇ। ਸਵੇਰੇ 11:30 ਵਜੇ ਮਾਲਟੀਨਾ ਪੀਜ਼ਾ ਕਿਚਨ, ਦੁਪਹਿਰ 2:00 ਵਜੇ ਡੀਸ ਆਈਲੈਂਡ ਪਾਰਕ ਅਤੇ ਸ਼ਾਮ 4:30 ਵਜੇ ਡੈਲਟਾ ਦੇ ਸੇਵ ਔਨ ਫੂਡਜ਼ ਵਿਖੇ ਰੁਕਣ ਤੋਂ ਬਾਅਦ ਸ਼ਾਮ 6:00 ਵਜੇ ਤਵਾਸਨ ਮਿਲਜ਼ ਵਿਖੇ ਦੂਜੇ ਦਿਨ ਦੀ ਸਮਾਪਤੀ ਹੋਵੇਗੀ।
ਤੀਜੇ ਦਿਨ ਸ਼ਨੀਵਾਰ 23 ਮਈ ਨੂੰ ਪਰਿਵਾਰ ਅਤੇ ਬੱਚਿਆਂ ਦੇ ਦਿਨ ਵਜੋਂ ਮਨਾਇਆ ਜਾਵੇਗਾ। ਸਵੇਰੇ 9:00 ਵਜੇ ਤਵਾਸਨ ਮਿਲਜ਼ ਤੋਂ ਰਵਾਨਾ ਹੋ ਕੇ 10:15 ਵਜੇ ਫੈਰੀ ਰਾਹੀਂ ਵੈਨਕੂਵਰ ਆਈਲੈਂਡ ਵੱਲ ਜਾਇਆ ਜਾਵੇਗਾ ਅਤੇ ਦੁਪਹਿਰ 12:30 ਵਜੇ ਸਵਾਰਟਜ਼ ਬੇ ਫੈਰੀ ਟਰਮੀਨਲ ਤੋਂ ਬਾਅਦ 3:00 ਵਜੇ ਸਿਡਨੀ ਮਿਊਜ਼ੀਅਮ ਵਿਖੇ ਦਿਨ ਦਾ ਅੰਤ ਹੋਵੇਗਾ। ਚੌਥੇ ਦਿਨ ਐਤਵਾਰ 24 ਮਈ ਨੂੰ ਸਵੇਰੇ 9:00 ਵਜੇ ਸਿਡਨੀ ਮਿਊਜ਼ੀਅਮ ਤੋਂ ਸ਼ੁਰੂਆਤ ਕਰਕੇ, ਹੈਰੀਟੇਜ ਏਕੜ, ਪਾਰਕਰ ਬੀਚ ਅਤੇ ਮੈਕਮਿਨ ਪਾਰਕ ਵਿੱਚੋਂ ਹੁੰਦੇ ਹੋਏ ਸ਼ਾਮ 7:00 ਵਜੇ ਵਿਕਟੋਰੀਆ ਦੇ ਗੁਰਦੁਆਰਾ ਸਿੰਘ ਸਭਾ ਪਹੁੰਚਿਆ ਜਾਵੇਗਾ। ਪੰਜਵੇਂ ਅਤੇ ਆਖਰੀ ਦਿਨ ਸੋਮਵਾਰ 25 ਮਈ ਨੂੰ ਸਵੇਰੇ 9:00 ਵਜੇ ਗੁਰਦੁਆਰਾ ਸਿੰਘ ਸਭਾ ਤੋਂ ਤੁਰ ਕੇ 9:45 ਵਜੇ ਬੀ.ਸੀ. ਵਿਧਾਨ ਸਭਾ ਵਿਖੇ ਪਹੁੰਚਣ ਦਾ ਪ੍ਰੋਗਰਾਮ ਹੈ। ਪਰਿਵਾਰ ਵੱਲੋਂ 25 ਅਤੇ 26 ਮਈ ਨੂੰ ਵਿਧਾਨ ਸਭਾ ਦੇ ਬਾਹਰ ਜਾਗਰੂਕਤਾ ਮੁਹਿੰਮ ਚਲਾਈ ਜਾਵੇਗੀ ਤਾਂ ਜੋ ਦੁਰਲੱਭ ਬਿਮਾਰੀਆਂ ਨਾਲ ਲੜ ਰਹੇ ਪਰਿਵਾਰਾਂ ਲਈ ਬਿਹਤਰ ਸਹੂਲਤਾਂ ਅਤੇ ਸਹਿਯੋਗ ਦੀ ਮੰਗ ਕੀਤੀ ਜਾ ਸਕੇ।