ਦੁਨੀਆ ਦੇ ਸਭ ਤੋਂ ਬਿਹਤਰੀਨ ਦੇਸ਼ਾਂ ਦੀ ਸੂਚੀ ਵਿੱਚ ਕੈਨੇਡਾ ਪਛੜਿਆ

ਸਰੀ, (ਦਿਵਰੂਪ ਕੌਰ): ਦੁਨੀਆ ਦੇ ਸਭ ਤੋਂ ਬਿਹਤਰੀਨ ਦੇਸ਼ਾਂ ਦੀ ਗਲੋਬਲ ਰੈਂਕਿੰਗ ਸੂਚੀ ਵਿੱਚ ਕੈਨੇਡਾ ਕਈ ਸਥਾਨ ਹੇਠਾਂ ਖਿਸਕ ਗਿਆ ਹੈ। ਇਸ ਤਾਜ਼ਾ ਸੂਚੀ ਵਿੱਚ ਕੈਨੇਡਾ ਆਪਣੇ ਗੁਆਂਢੀ ਦੇਸ਼ ਅਮਰੀਕਾ ਤੋਂ ਵੀ ਇੱਕ ਸਥਾਨ ਪਿੱਛੇ ਰਹਿ ਗਿਆ ਹੈ। ਯੂਐਸ ਨਿਊਜ਼ ਬੈਸਟ ਕੰਟਰੀਜ਼ ਰੈਂਕਿੰਗ ਅਨੁਸਾਰ 2025 ਦੀ ਸੂਚੀ ਵਿੱਚ ਕੈਨੇਡਾ 19ਵੇਂ ਸਥਾਨ ‘ਤੇ ਆਇਆ ਹੈ ਜਦਕਿ ਅਮਰੀਕਾ 18ਵੇਂ ਸਥਾਨ ‘ਤੇ ਹੈ। ਕੈਨੇਡਾ ਲਈ ਇਹ ਰੈਂਕਿੰਗ ਇੱਕ ਵੱਡੀ ਗਿਰਾਵਟ ਹੈ ਕਿਉਂਕਿ 2024 ਵਿੱਚ ਦੇਸ਼ ਚੌਥੇ ਅਤੇ 2023 ਵਿੱਚ ਦੂਜੇ ਸਥਾਨ ‘ਤੇ ਸੀ। ਰੈਂਕਿੰਗ ਵਿੱਚ ਆਈ ਇਸ ਵੱਡੀ ਗਿਰਾਵਟ ਦਾ ਮੁੱਖ ਕਾਰਨ ਸੂਚੀ ਤਿਆਰ ਕਰਨ ਦੇ ਤਰੀਕੇ ਵਿੱਚ ਕੀਤਾ ਗਿਆ ਬਦਲਾਅ ਹੈ। ਪਿਛਲੇ ਸਾਲਾਂ ਦੌਰਾਨ ਇਹ ਰੈਂਕਿੰਗ ਲੋਕਾਂ ਦੀ ਧਾਰਨਾ ਉੱਤੇ ਅਧਾਰਤ ਹੁੰਦੀ ਸੀ। ਪਰ ਇਸ ਵਾਰ ਦੇਸ਼ਾਂ ਨੂੰ 8 ਵੱਖ-ਵੱਖ ਮਾਪਦੰਡਾਂ ਦੇ ਆਧਾਰ ‘ਤੇ ਰੈਂਕ ਦਿੱਤਾ ਗਿਆ ਹੈ। ਇਹਨਾਂ ਵਿੱਚ ਗਵਰਨੈਂਸ, ਸਿਹਤ, ਬੁਨਿਆਦੀ ਢਾਂਚਾ, ਕੁਦਰਤੀ ਵਾਤਾਵਰਣ, ਮੌਕੇ, ਨਾਗਰਿਕ ਸਿਹਤ, ਸੱਭਿਆਚਾਰ ਅਤੇ ਸੈਰ ਸਪਾਟਾ, ਅਤੇ ਆਰਥਿਕ ਵਿਕਾਸ ਸ਼ਾਮਲ ਹਨ। ਇਸ ਨਵੇਂ ਤਰੀਕੇ ਕਾਰਨ ਕੈਨੇਡਾ ਦੀ ਸਥਿਤੀ ਕਾਫੀ ਪ੍ਰਭਾਵਿਤ ਹੋਈ ਹੈ ਅਤੇ ਦੇਸ਼ ਨੂੰ ਪਿਛਲੇ ਸਾਲਾਂ ਦੇ ਮੁਕਾਬਲੇ ਕਾਫੀ ਨੁਕਸਾਨ ਝੱਲਣਾ ਪਿਆ ਹੈ। ਇਸ ਸੂਚੀ ਵਿੱਚ ਗਵਰਨੈਂਸ ਅਤੇ ਬੁਨਿਆਦੀ ਢਾਂਚੇ ਨੂੰ ਸਭ ਤੋਂ ਵੱਧ ਤਰਜੀਹ ਦਿੱਤੀ ਗਈ ਹੈ। ਕੈਨੇਡਾ ਗਵਰਨੈਂਸ ਵਿੱਚ 18ਵੇਂ ਅਤੇ ਬੁਨਿਆਦੀ ਢਾਂਚੇ ਵਿੱਚ 20ਵੇਂ ਸਥਾਨ ‘ਤੇ ਰਿਹਾ ਹੈ। ਕੈਨੇਡਾ ਵਿੱਚ ਸਿਆਸੀ ਹਿੰਸਾ ਦੀ ਘਾਟ ਅਤੇ ਕਾਨੂੰਨ ਦੇ ਰਾਜ ਕਾਰਨ ਦੇਸ਼ ਨੂੰ ਚੰਗੇ ਅੰਕ ਮਿਲੇ ਹਨ। ਪਰ ਫੈਡਰਲ ਟੈਕਸ ਸਿਸਟਮ ਕਾਰਨ ਗਵਰਨੈਂਸ ਦਾ ਸਮੁੱਚਾ ਸਕੋਰ ਹੇਠਾਂ ਆ ਗਿਆ ਹੈ। ਬੁਨਿਆਦੀ ਢਾਂਚੇ ਦੇ ਮਾਮਲੇ ਵਿੱਚ ਕੈਨੇਡਾ ਨੂੰ ਬਿਜਲੀ ਦੀ ਪਹੁੰਚ ਲਈ ਪੂਰੇ ਅੰਕ ਮਿਲੇ ਹਨ ਪਰ ਨਵਿਆਉਣਯੋਗ ਬਿਜਲੀ ਦੇ ਮਾਮਲੇ ਵਿੱਚ ਦੇਸ਼ ਦਾ ਪ੍ਰਦਰਸ਼ਨ ਕਾਫੀ ਮਾੜਾ ਰਿਹਾ ਹੈ। ਇਸ ਕਾਰਨ ਇਹਨਾਂ ਅਹਿਮ ਖੇਤਰਾਂ ਵਿੱਚ ਕੈਨੇਡਾ ਹੋਰਾਂ ਦੇਸ਼ਾਂ ਤੋਂ ਪਛੜ ਗਿਆ ਹੈ। ਕੁਦਰਤੀ ਵਾਤਾਵਰਣ ਦੇ ਮਾਮਲੇ ਵਿੱਚ ਕੈਨੇਡਾ 63ਵੇਂ ਸਥਾਨ ‘ਤੇ ਰਿਹਾ ਹੈ ਜੋ ਕਿ ਕਿਸੇ ਵੀ ਮਾਪਦੰਡ ਵਿੱਚ ਦੇਸ਼ ਦਾ ਸਭ ਤੋਂ ਹੇਠਲਾ ਰੈਂਕ ਹੈ। ਰੈਂਕਿੰਗ ਮੁਤਾਬਕ ਇਸਦਾ ਮੁੱਖ ਕਾਰਨ ਉੱਚ ਕਾਰਬਨ ਨਿਕਾਸ ਅਤੇ ਸ਼ਹਿਰੀ ਹਰੇ ਸਥਾਨਾਂ ਦੀ ਭਾਰੀ ਘਾਟ ਹੈ। ਦੂਜੇ ਪਾਸੇ ਸੱਭਿਆਚਾਰ ਅਤੇ ਸੈਰ ਸਪਾਟੇ ਲਈ ਕੈਨੇਡਾ ਨੂੰ ਦੁਨੀਆ ਵਿੱਚ 8ਵਾਂ ਸਥਾਨ ਮਿਲਿਆ ਹੈ ਜੋ ਇਸਦਾ ਸਭ ਤੋਂ ਵਧੀਆ ਰੈਂਕ ਹੈ। ਸਿਹਤ ਦੇ ਖੇਤਰ ਵਿੱਚ ਦੇਸ਼ 27ਵੇਂ ਸਥਾਨ ‘ਤੇ ਰਿਹਾ ਹੈ। ਭਾਵੇਂ ਕੈਨੇਡਾ ਨੂੰ ਯੂਨੀਵਰਸਲ ਹੈਲਥ ਕਵਰੇਜ ਅਤੇ ਜੀਵਨ ਦਰ ਲਈ ਬਹੁਤ ਵਧੀਆ ਅੰਕ ਮਿਲੇ ਹਨ ਪਰ ਡਾਕਟਰਾਂ ਅਤੇ ਹਸਪਤਾਲ ਦੇ ਬਿਸਤਰਿਆਂ ਦੀ ਘਾਟ ਕਾਰਨ ਸਮੁੱਚਾ ਸਿਹਤ ਸਕੋਰ ਹੇਠਾਂ ਡਿੱਗ ਗਿਆ ਹੈ। ਇਹ ਸਾਰੇ ਅੰਕੜੇ ਦੱਸਦੇ ਹਨ ਕਿ ਕੈਨੇਡਾ ਨੂੰ ਆਪਣੇ ਕਈ ਅੰਦਰੂਨੀ ਮੁੱਦਿਆਂ ਵੱਲ ਧਿਆਨ ਦੇਣ ਦੀ ਸਖਤ ਲੋੜ ਹੈ। This report was written by Divroop Kaur as part of the Local Journalism Initiative.